އަންނަ މަހު 1 ގައި މާވަރުލު އެއާޕޯޓަށް ޝެޑިއުލް ދަތުރުތަށް ފަށަނީ
އަންނަ ޖުލައި މަހުގެ 1 ވަނަ ދުވަހު ގދ. މާވަރުލު އެއާޕޯޓަށް ޝެޑިއުލް ދަތުރުތަށް ފަށުމަށް ތައްޔާރުވެފައިވާކަމަށް ރީޖަނަލް އެއަރޕޯޓްސްއިން ބުނެފިއެވެ.
މުޅިން އަލަށް ޚިދުމަތްފަށާ މި އެއާޕޯޓްގެ މަސައްކަތް ނިންމައި ޓެސްޓް ފްލައިޓް ބާއްވާފައި ވަނީ މިއަހަރުގެ މާރިޗުމަހުގެ 11 ވަނަ ދުވަހުއެވެ. ނަމަވެސް ރާއްޖޭގައި ކޮވިޑް-19 ފެތުރެން ފެށުމާއެކު އެ އެއާޕޯޓަށް ޝެޑިއުލް ދަތުރުތައް ކުރުން ވަނީ މަޑުޖައްސާލާފައެވެ.
ދައުލަތުގެ މީޑިއާ "ޕީއެސްއެމް"އަށް މަޢުލޫމާތު ދެމުން ރީޖަނަލް ރީޖަނަލް އެއާޕޯޓްސް އިން ބުނެފައި ވަނީ ދަތުރުތައް ޖުލައި އެއްވަނަ ދުވަހު ފެށުމަށް ތައްޔާރުވެފައިވާކަމަށެވެ. އަދި މިހާރު މިކަމަށް އެއާޕޯޓް ތައްޔާރުވެފައިވާކަމަށާއި، ބޭނުންވާ މުވައްޒަފުން ނަގައި އޮޕަރޭޝަން ފެށުމަށް ތައްޔާރަށްއޮތް ކަމަށެވެ.
މާވަރުލު އެއަރޕޯޓް ތަރައްޤީކޮށްފައި ވަނީ އެތެރޭގެ އުދުހުންތަކަށް ޚާއްސަކޮށްގެންނެވެ. 1200 މީޓަރު ދިގު ރަންވޭއަކާއި، ޓެކްސީވޭ އަދި ފްލަޓް ޕަރކިންގ އޭރިއާ އާއި ޓާމިނަލް ހެދުމުގެ ޢަމަލީ މަސައްކަތް ކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ އެމްޓީސީސީ އާއި ހަވާލުކޮށް 57 މިލިއަން ރުފިޔާއަށެވެ.
