ޔުނިވާސަލްގެ ރިސޯޓުތައް އޮކްޓޯބަރު މަހު ހުޅުވަނީ
ޔުނިވާސަލްގެ ރިސޯޓުތައް އޮކްޓޯބަރު މަހު ހުޅުވާލާނެ ކަމަށް އެ ކުންފުނީގެ ދަށުން ހިންގާ ރިސޯޓުތަކުން ބުނެފިއެވެ.
ޔުނިވާސަލް އިން ރާއްޖޭގައި ހިންގާ ރިސޯޓުތަކުން މީސް މީޑިއާގައި އާންމު ކުރި ޕޯސްޓުތަކުގައި ބުނީ ރިސޯޓު ހުޅުވާލުން އޮކްޓޯބަރަށް ފަސްކޮށްފައިވާ ކަމަށެވެ.
ޔުނިވާސަލްގެ ރިސޯޓުތައް ބަންދު ކުރީ ޖުލައިމަހުއެވެ. އެ ކުންފުނީގެ މުވައްޒަފުންނަށް ހާއްސަ ޕޭ ޕެކޭޖަކާއެކު ތިން މަހުގެ ލީވް ދިން ނަމަވެސް ފަތުރުވެރިންނާއި މުވައްޒަފުންގެ ސަލާމަތާއި ރައްކާތެރިކަމަށްޓަކާ، މިހާރު ނިންމާފައިވަނީ އަންނަ އޮކްޓޯބަރު އެކަކުން ފެށިގެން ރިސޯޓުތައް ހުޅުވާލުމަށް ކަމަށް އެ ކުންފުނީގެ ދަށުން ހިންގަ ރިސޯޓު ތަކުން ވަނީ ބުނެފައެވެ.
މީގެ އިތުރުން މީގެެ ކުރިން ރިސޯޓު ހުޅުވަން އޮތް މުއްދަތުގައި އެއްވެސް ފަތުރުވެރިއެއްގެ ބުކިން ހަދާފައިވާނަމަ، ރިޒަވޭޝަން ޓީމާ ނުވަތަ ޓްރެވަލް އެޖެންޓާ ގުޅުމަށްވެސް ވަނީ އެދިފައެވެ.
ޔުނިވާސަލް އިން ބުނީ ރިސޯޓުތައް ހުޅުވުން ފަސްކުރީ މިހާރުގެ ހާލަތަށްބަލައި،ގައުމުތަކުގެ ބޯޑަރު ނުހުޅުވާނެތީ ރާއްޖެއަށް އެ މުއްދަތުގައި ފްލައިޓުތައް އަންނާނެ ކަމަށް ލަފާ ނުކުރެވޭތީ ކަމަށެވެ.
ކޮވިޑާ ގުޅިގެން އަޅާފައިވާ ފިޔަވަޅުތަކަށް ލުއިތައް ދޭން ފަށާފައިވާއިރު، ސަރުކާރުން މިހާރު ނިންމާފައިވަނީ ޖުލައި މަހުގެ ތެރޭގައި ފަތުރުވެރިކަން އަލުން ފެށުމަށެވެ.
ޔުނިވާސަލް އިން ރާއްޖޭގައި 8 ރިސޯޓެއް ހިންގައެވެ.
Ads by STO
