ލޮކްޑައުންއާ ހިލާފުވި 312 މީހެއްގެ މައްޗަށް ޖިނާއީ ދައުވާކުރަނީ
ކޮވިޑް-19އާ ގުޅިގެން މާލޭ ސަރަހައްދުގައި އިއުލާނުކުރި ލޮކްޑައުންއާ ހިލާފުވި 312 މީހެއްގެ މައްޗަށް ޖިނާއީ ދައުވާ ކުރަން ޕްރޮސެކިއުޓަ ޖެނެރަލްގެ އޮފީހަށް ފުލުހުން ފޮނުވައިފިއެވެ.
ދައުލަތުގެ މީޑިއާ "ޕީއެސްއެމް"ގެ ޕްރޮގްރާމެއްގައި ވާހަކަ ދައްކަވަމުން ޗީފް ސްޕްރިންޓެންޑެންޓް އޮފް ޕޮލިސް ޔޫނުސް ޞަބާޙު ވިދާޅުވީ، ފުރަބަންދުގެ ފިޔަވަޅުތަކާއި ގުޅުންހުރި 80 މައްސަލައެއް ފުލުހުންނަށް ހުށަހަޅާފައިވާކަމަށެވެ.
އަދި ފުރަބަންދާއި ގުޅިގެން އަޅާފައިވާ ފިޔަވަޅުތަކާއި ޚިލާފުވެގެން ފުލުހުންގެ ބެލުމުގެ ދަށަށް 582 މީހުން ގެންގޮސްފައިވާކަމަށާއި، އޭގެ ތެރެއިން 312 މީހެއްގެ މައްޗަށް ދައުވާ އުފުލުމަށް ޕްރޮސެކިއުޓަ ޖެނެރަލްގެ އޮފީހަށް މިހާރު ފޮނުވާފައިވާޗކަމަށް ޔޫނުސް ވިދާޅުވިއެވެ.
ޔޫނުސް ވިދާޅުވީ ލޮކްޑައުންއާ ހިލާފުވެގެން ހައްޔަރުކުރި މީހުންގެ ތެރެއިން މިވަގުތު ފުލުހުންގެ ބެލުމުގެ ދަށުގައު ތިބީ 37 މީހުންކަމަށެވެ.
ފުލުހުން އާންމުކޮށްފައިވާ އެންމެ ފަހުގެ ތަފާސް ހިސާބުތަކަށް ބަލާއިރު ފުރަބަންދާއި ގުޅިގެން އަޅަފައިވާ ފިޔަވަޅުތަކާއި ގުޅިގެން 9000 އަށް ވިރެ ގިނަ މީހުން ވަނީ ޖޫރިމަނާކޮށްފައެވެ.
Ads by STO
