މުވައްޒަފަކު ފައްސިވުމާ ގުޅިގެން މަޖިލީހުގެ 29 މުވައްޒަފަކު އެކަހެރިކޮށްފި
ރައްޔިތުންގެ މަޖިލީހުގެ އިދާރީ މުވައްޒިފަކު ކޮވިޑް-19 އަށް ފައްސިވުމާ ގުޅިގެން އެތަނުގެ 29 މުވައްޒަފަކު އެކަހެރި ކޮށްފިއެވެ.
މަޖިލީހުގެ އިދާރާއިން އިއްޔެ ބުނީ އެ އިދާރާގެ މެއިންޓަނެންސް ޔުނިޓުގައި މަސައްކަތްކުރާ މުވައްޒަފަކު ކޮވިޑު-19 އަށް ފައްސި ވުމާއި ގުޅިގެން އަޅަން ޖެހޭ ރައްކާތެރިކަމުގެ ފިޔަވަޅުތައް އަޅަމުންދާ ކަމަށެވެ. އެގޮތުން ކޮންޓެކްޓް ޓްރޭސިން ހެދުމާއި މަޖިލީހުގެ އިދާރާ ޑިސްއިންފެކްޓް ކުރުމުގެ މަސައްކަތް ކުރެވެމުންދާ ކަމަށް ބުނެފައިވެއެވެ.
މިރޭ ބޭއްވި ނޫސްވެރިންގެ ބައްދަލުވުމެއްގައި ކޮވިޑްގެ ތަރުޖަމާން މަބުރޫކް އަޒީޒް ވިދާޅުވީ މަޖިލިސް ކޭސްއާއި ގުޅިގެން 29 މީހަކު އެކަހެރިކޮށްފައިވާ ކަމަށާއި ފައްސިވި މީހާގެ ކްލޯސް ކޮންޓެކްޓްގެ ގޮތުގައި 11 މީހަކު ފާހަގަ ކުރެވިފައިވާ ކަމަށެވެ.
މަޖިލީހުން ބުނީ އެއިދާރާގައި މަސައްކަތް ފެށިއިރުވެސް އެފަދަ ކަމެއް ވެދާނެ ކަމަށް ބަލައި ދުރާލާ ފިޔަވަޅު އެޅިފައިވާ ކަމަށާއި ރޯގާއާއި ގުޅޭގޮތުން އަޅަން ޖެހޭ ފިޔަވަޅުތައް އަޅަމުން އެހެން ނަމަވެސް މަޖިލީހުގެ މަސައްކަތް މަޖިލިސް ކުރާ ގޭގައި ކުރިއަށް ގެންދިޔުމަކީ މަޖިލީހުގެ އަމާޒު ކަމަށް އެ ބަޔާނުގައިވެއެވެ.
އަދި ކޮވިޑު-19 އާއި ގުޅޭ ގޮތުން އާންމުކޮށްފައިވާ އުސޫލުތަކާ އެއްގޮތަށް ރައްކާތެރިކަމުގެ ފިޔަވަޅުތައް އިތުރަށް ވަރުގަދަ ކުރުމަށްފަހު މަޖިލީހުގެ މަސައްކަތް މަޖިލީހުގެ އިދާރާގައި ކުރިއަށް ގެންދިޔުމުގެ މުހިންމުކަން ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ފާހަގަ ކުރައްވާކަމަށް މަޖިލީހުން ވަނީ ހާމަކޮށްފައެވެ.
