ކޮވިޑް ޖެހިދާނެ ކަމަށް 90 ޕަސެންޓް މީހުން ތިިބީ ގޭގައި!
ކޮވިޑް19 އިން ރައްކާތެރިވެ، ބަލި ފެތުރުން ކޮންޓްރޯލް ކުރުމަށް، 90 ޕަސެންޓް މީހުން ކަމާބެހޭ ފަރާތްތަކުގެ އިރުޝާދުތަކަށް ބޯލަނބައި ގޭގައި ތިބި ކަމަށް ހެލްތު ޕްރޮޓެކްޝަން އެޖެންސީ އާއި ދިވެހި ގައުމީ ޔުނިވަސިޓީ ގުޅިގެން ކުރިއަށް ގެންދިޔަ ސާވޭއަކުން ދައްކައިފިއެވެ.
ރާއްޖޭގައި ކޮވިޑާ ގުޅިގެން ކުރިމަތިވި އިގުތިސާދީ އަދި އިޖުތިމާއީ ކަންތައްތައް ބެލުމަށް އެޗްޕީއޭ އާއި އެމްއެންޔޫ ގުޅިގެން މިދިޔަ މެއި މަހުގެ ތެރޭގައި އޮންލައިން ސާވޭތަކެއް ވަނީ ކޮށްފައެވެ.
އެ ސާވޭގެ ފުރަތަމަ ބުރުގައި 2871 މީހެއްގެ ފަރާތުން މައުލޫމާތު އެއްކުރިއިރު، ފުރަތަމަ ބުރުގެ ސާވޭން ދައްކާގޮތުގައި ކޮވިޑާ ދެކޮޅަށް ގައުމީ ފެންވަރުގައި ކުރާ މަސައްކަތްތަކަށް ސާވޭގައި ބައިވެރިން ދީފައިވަނީ 10/7 އެކެވެ.
ސާވޭގައި ބައިވެރިވި 90 ޕަސެންޓް މީހުން ބުނެފައި ވަނީ، އެމީހުން ކޮންމެހެން ޒަރޫރީ ކަމެއްގައި މެނުވީ ގެއިން ބޭރަށް ގޮސްފައި ނުވާނެ ކަމަށާއި، ބަލިން ރައްކާތެރިވުމަށް ތިބީ ގޭގައި ކަމަށެވެ. އެއީ 2،583 މީހުންނެވެ.
އަދި 94 ޕަސެންޓް މީހުންނަށް ކޮވިޑުގެ އަލާމާތްތައް އެނގޭއިރު ކޮވިޑް ފެތުރުން ހުއްޓުވުމަށް އަޅަންޖެހޭ ރަނގަޅު ފިޔަވަޅުތައް އެނގެނީ ސާވޭގައި ބައިވެރިވި 85 ޕަސެންޓް މީހުންނަށެވެ.
ބައްޔާ ގުޅިގެން ކަރަންޓީން ކޮށްފިނަމަ، ނުވަތަ އެކަހެރިކޮށްފި ނަމަ މީހުން ތިމާއާމެދު ދެކޭނެ ގޮތް ބަދަލުވެދާނެ ކަމާމެދު ކަންބޮޑުވުން ފާޅުކޮށްފައި ވަނީ ސާވޭގައި ބައިވެރިވި މީހުންގެ ތެރެއިން 37 ޕަސެންޓު މީހުންނެވެ.
