ސްކޫލްތައް ހުޅުވަން ޓީޗަރުންނަށް ނަފްސާނީ ފުރަތަމަ އެހީ ދެނީ
ރާއްޖޭގެ ސްކޫލްތަކުގައި ކިޔަވައިދޭ ހުރިހާ ޓީޗަރުންނަށް ނަފްސާނީ ފުރަތަމަ އެހީ ނުވަތަ ސައިކޮލޮޖިކަލް ފަސްޓް އެއިޑްގެ ތަމްރީން ދިނުމުގެ ޕްރޮގްރާމެއް ފަށައިފި އެވެ.
އެޑިއުކޭޝަން މިނިސްޓްރީން ބުނީ މި ޕްރޮގްރާމްގައި މިހާތަނަށް 407 މުދައްރިސުންނަށް ތަމްރީނު ދެވިފައިވާ ކަމަށެވެ. އަދި ޕްރޮގްރާމް ނިމޭއިރު 11 ހާހަށްވުރެ ގިނަ މުދައްރިސުން ތަމްރީން ކުރެވޭނެ ކަމަށްވެސް މިނިސްޓްރީން މައުލޫމާތުދެއެވެ.
މި ޕްރޮގްރާމަކީ ކޯވިޑް-19ގެ ޙާލަތާއި ގުޅިގެން އެކިގޮތްގޮތުން ސްކޫލްތަކުގެ ދަރިވަރުންނަށް ދިމާވާ ނަފްސާނީ އުނދަގޫތަކަށް ފުރިހަމައަށް އެހީތެރިކަން ފޯރުކޮށްދިނުމުގެ ބޭނުމުގައި ފަށާފައިވާ ޕްރޮގްރާމެކެވެ.
މިފަދަ ޕްރޮގްރާމެއް ފަށާފައިވާއިރު ކޮވިޑް ބަލި ނެތް ރަށްރަށުގެ ސްކޫލްތައް އަންނަ މަހުގެ އެއްވަނަ ދުވަހު ހުޅުވުމަށް މިހާރު ވަނީ ނިންމާފައެވެ. ނަމަވެސް މާލޭގައި ސްކޫލުތައް ހުޅުވުމަށް އެޑިއުކޭޝަން މިނިސްޓްރީން ނިންމާފައިވަނީ ގްރޭޑް ނުވަޔަކުން މަތީގެ ދަރިވަރުންނަށް އެކަންޏެވެ.
އެޑިއުކޭޝަން މިނިސްޓްރީން ވަނީ ސްކޫލުތަކުގައި ރައްކާތެރިކަމުގެ ގިނަ ފިޔަވަޅުތަކެއް އެޅުމަށް ނިންމާފައެވެ.
