ތެރަސް ފުޅި ތެރޭގައި ތެރަސް ހުންނައިރު ތަތް ނުލަވަނީ ކީއްވެ؟ޖަވާބު މިއޮތީ!
ތެރަސް ފުޅި ތެރޭގައި ތެރަސް ހުންނައިރު ތެރަސް ތަތް ނުލަވަނީ ކީއްވެތޯ އަމިއްލަ ނަފްސާ ކިތައް ފަހަރު ސުވާލު ކޮށްލިން ހެއްޔެވެ. އަދި ރަހުމަތްތެރިންނާއެކު އުޅޭއިރު މި ސުވާލުކޮށް މަޖާ ކޮށް ހެދިން ހެއްޔެވެ. ކިތަންމެ ވަރަކަށް ވިސްނި ނަމަވެސް މި ސުވާލުގެ ޖަވާބު ގިނަ ބަޔަކަށް ނޭނގެއެވެ. އެނގެން ބޭނުންވި ނަމަވެސް ވިސްނާ ވިސްނާ ވެސް މި ސުވާލުގެ ޖަވާބު ހޯދެނީ މަަދު ފަހަރަކުއެވެ.
ބައެއް މީހުންނަށް ހީވެފައި އޮންނަނީ މިއީ "ޖާދޫ"އެއް ކަމަށެވެ. ނަމަވެސް ހަގީގަތުގައި އެއީ ޖާދޫއަކުން ވާ ކަމެއް ނޫނެވެ. އެއީ ސައިންސްގެ ސަބަބުން ވާ ކަމެކެވެ. އަދި އެކަމުގެ ފަހަތުގައިވާ އެއްޗަކީ ފެނެވެ، މިހާރަކަށް އައިސް އާންމުކޮށް ސުކޫލް ދަރިވަރުން ވެސް ބޭނުންކުަރާ "ވައިޓް ގުލޫ" އަކީ ގިނަ އަދަދެއްގެ ކެމިކަލް ބޭނުން ކޮށްގެން ތައްޔާރު ކޮށްފައި ހުންނަ އެއްޗެކެވެ.
ޕޮލީމާސް ނަމަކަށް ކިޔާ މި ކެމިކަލަކީ ވަރަށް ތަތްގަދަ އެއްޗެކެވެ. އަދި މި ކެމިކަލްގެ އިތުރުން "ވައިޓް ގުލޫ"ގައި ފެން ވެސް އެކުލެވިގެން ވެއެވެ. ފުޅީގެ ތެރޭގައި ތެރަސް ދިޔާކޮށް، ފުޅީގެ ތެރޭގައި ތަތް ނުލަވާ ހުންނަނީ މި ފެނުގެ ސަބަބުންނެވެ. އަދި ތެރަސް ބޭނުން ކުރުމަށް ތަނެއްގައި ނުވަތަ އެއްޗެއްގައި ހޭކުމުން ތެރަސް ހިކެނީ ފުޅިން ބޭރުވުމުން ޖައްވުގައި ހުންނަ ވަޔާ ތެރަސްތައް އެއްވާތީއެވެ. އެހެންކަމުން އޭގެ ސަބަބުން އޭގައި ހުންނަ ފެންތައް ހިނދި ތެރަހުގައި ހުންނަ "ޕޮލީމާސް" ކެމިކަލްގެ ބާރު ގަދަވެ ތަތްވެގެން ދެއެވެ.
މިހާ ހިސާބުން އުފެދޭ ސުވާލަކީ ތެރަސް ފުޅީގެ އެތެރޭގައި މި ތެރަސްތައް ހުންނައިރު ތަތް ނުލަވަނީ ކީއްވެގެން ބާވައެވެ. އެ ސުވާލުގެ ޖަވާބު ހޯދުމަށް ޓަކައި ކުރެވިދާނެ ވަރަށް މޮޅު ކަމެއް އެބައޮތެވެ. އެގޮތުން، ފުރަތަމަ ކަމަކަށް ދެ ، ތެރަސްފުޅި ހޯދާށެވެ. އަދި އެއް ފުޅި މަތި ޖަހާފައި ބެހެއްޓުމަށް ފަހު އަނެއް ފުޅި މަތި ނަގާފައި ބަހައްޓާށެވެ. މިގޮތަށް ހެދުމުން، މަތި ނަގާފައި ހުންނަ ތެރަސް ފުޅީގެ އެތެރޭގައި ހުންނަ ތެރަސްތައް ހިކި ފުޅީގެ ތެރޭގައި ތަތްލަވާ ތަން ފެނިގެން ދާނެއެވެ.
މިކަމުން އެނގިގެން ދަނީ ތެރަސް ތަތްނުލަވާ، ދިޔާކޮށް ފުޅީގެ ތެރޭގައި ބެހެއްޓުމަށް ޓަކައި ވައި ބަންދު ކުރަން ޖެހޭ ކަމެވެ. ސަބަބަކީ ވައިގެ ސަބަބުން ތެރަހުގައި ހުންނަ ފެންތައް ހިނދި ތެރަހުގައި ހުންނަ "ޕޮލީމާސް" ކެމިކަލްގެ ބާރު ގަދަވެގެން ދާތީއެވެ.
