11 އަހަރުގެ ކުއްޖާ ރޭޕްކުރި އަނީސް ޝަރީއަތް ނިމެންދެން ބަންދު ކުރަން ނިންމައިފި!
މާލޭ ގެސްޓް ހައުސް އަކަށް ގެންގޮސް އުމުރުން 11 އަހަރުގެ ކުޑަ ކުއްޖަކު ރޭޕް ކުރިކަމުގެ ތުހުމަތު އުފުލާފައިވާ ހއ. ބާރަށް ސިލްސިލާގޭ އަނީސް ހިލްމީ، ޝަރީޢަތް ނިމެންދެން ބަންދު ކުރުމަށް ކްރިމިނަލް ކޯޓުން ނިންމައިފިއެވެ.
މިކަން އިއުލާނު ކުރަމުން ފުލުހުން ވެސް މިއަދު ބުނެފައިވަނީ، މިތުހުމަތުގައި ހައްޔަރުކޮށްފައިވާ މީހާގެ ޝަރީޢަތް ނިމެންދެން ބަންދުގައި ބެހެއްޓުމަށް ކްރިމިނަލް ކޯޓުން އިއުލާނު ކޮށްފައިވާ ކަމަށެވެ.
މިތުހުމަތުގައި އަނީސް ހައްޔަރު ކޮށްފައިވަނީ މިމަހުގެ 10 ވަނަ ދުވަހުގެ މެންދުރުފަހުގެ ވަގުތެއްގައި އުމުރުން 11 އަހަރުގެ ކުއްޖަކު ގެސްޓްހައުސް އަކަށް ގެންގޮސް ރޭޕް ކޮށްފައިވާ މައްސަލައެއްގައި ކޯޓު އަމުރެއްގެ ދަށުންނެވެ. އޭނާ ހައްޔަރުކުރީ މިމަހުގެ 12 ވަނަ ދުވަހުގެ ރެ 22:13 ހާއިރު ގޭގައި ހުއްޓައެވެ.
މިކަމާއި ގުޅޭގޮތުން ޕަބްލިކް ޕްރޮސެކިއުޓާ އާދަމް ޝަފީއު ވިދާޅުވެފައިވަނީ، ކްރިމިނަލް ކޯޓުން މި އަމުރު ނެރުއްވާފައިވަނީ ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްޞަ އުޞޫލުތަކަކަށް ޢަމަލުކުރުމުގެ ޤާނޫނުގެ 30 ވަނަ މާއްދާގެ ދަށުން، ކުށުގެ ތުހުމަތުކުރެވޭ މީހާ ޝަރީޢަތުގެ މަރުޙަލާ ނިމެންދެން ބަންދުގައި ބެހެއްޓުމުގެ އަމުރެއް ހޯދުމަށް ކޯޓަށް ހުށަހަޅައިދިނުމަށް އެދި ކޮމިޝަނަރ އޮފް ޕޮލިސް ޕްރޮސިކިއުޓަރ ޖެނެރަލް ގާތުގައި އެދިވަޑައިގަތުމުން، ޕްރޮސިކިއުޓަރ ޖެނެރަލްގެ ފަރާތުން ވެސް އެފަދަ އަމުރަކަށް އެދި ކޯޓަށް ހުށަހަޅާފައިވުމުން ކަމަށެވެ.
ކްރިމިނަލް ކޯޓުން މިފަދައިން ނިންމާފައިވަނީ މިއަދު އެކޯޓުގައި ކުރިއަށްދިޔަ މިމައްސަލައިގައި ތުހުމަތު ކުރެވޭ ފަރާތުގެ ބަންދާމެދު ގޮތެއް ނިންމުމުގެ އަޑުއެހުމުގައެވެ.
މިހާތަނަށް މިމައްސަލައިގެ ތަހުގީގުން އެނގިފައިވާ ގޮތުގައި ކުޑަކުއްޖާ ރޭޕް ކޮށްފައިވަނީ އެކުއްޖާ ގްރޫމް ކޮށްގެން ކަމަށް ފުލުހުން ވިދާޅުވެފައިވެއެވެ.
ކުޑަކުދިންނަށް ޖިންސީ ގޯނާ ކުރާ ފަރާތްތަކާއި، ކުޑަކުދިން ރޭޕްކޮށް ބްލެކްމެއިލްކޮށް، ގްރޫމްކުރުވައިގެން ކުށްކުރުމުގައި ކުދިން ބައިވެރިކުރުވައި އަދި ކުޑަކުދިންގެ ކަރާމާތަށް އުނިކަން އަންނަ ގޮތަށް އަމަލުކުރާ ފަރާތްތަކާމެދު ޤާނޫނީގޮތުން އެޅެން އޮންނަ އެންމެ ހަރުކަށި ފިޔަވަޅު އަޅާނެ ކަމަށް ފުލުހުން ވިދާޅުވެފައިވެއެވެ.
