ޔުނައިޓެޑް މޮޅު ނުވުމުން ކުރީގެ ކެޕްޓަން ރޮއީ ކީން ޑެޚެއާ "ނޮޅާލައިފި"
އިނގިރޭސި ޕްރިމިއަރ ލީގުގައި ޓޮޓްނަމް ހޮޓްސްޕަރ އަތުން މެންޗެސްޓަރ ޔުނައިޓެޑް މޮޅު ނުވެވުމުން އެޓީމްގެ ކުރީގެ ކުޅުންތެރިން ޑޭވިޑް ޑެޚެއާއަށް ވަރަށް ބޮޑަށް ފާޑުކިޔައިފިއެވެ.
ޕްރިމިއަރ ލީގުގައި ޔުނައިޓެޑާއި ޓޮޓްނަމް ވާދަކުރި މެޗް ނިމުނީ އެކެއް އެކަކުން އެއްވަރުވެގެންނެވެ. މެޗުގައި ޓޮޓްނަމުން ޖެހި ފުރަތަމަ ގޯލާއިއެކު ޔުނައިޓެޑްގެ ޑިފެންސްލައިނަށް ގިނަ ބައެއްގެ ފާޑުކިޔުންވަނީ އަމާޒުވެފައެވެ.
އެޓީމްގެ ކުރީގެ ކެޕްޓަން ރޮއީ ކީން ބުނީ ޔުނައިޓެޑް ކޮޅަށް ވަތް ގޯލަށްފަހު ޓީމްގެ ޑިފެންސް މަތިން ފޫހިވެއްޖެކަމަށެވެ. ދުނިޔޭގެ އެންމެ މޮޅު އެއް ކީޕަރަކީ ޑެޚެއާކަމަށް މީހުން ބުނަނީ ކީއްވެކަން މިހާރު އޮޅިއްޖެކަމަށާއި، ޑެޚެއާ ނޫން ގޮތެއް މިހާރު ހޯދަން ވެއްޖެކަމަށެވެ. ޓޮޓްނަމުން ޖެހި ގޯލަށް ފަހު ޑެޚެއާއަށް އެހެން މީހުންނާއި ކުރިމަތިލާން ލަދުގަންނަން ޖެހޭކަމަށައި، ޔުނައިޓެޑް ޓީމްގައި އޭނާ ހުރި ނަމަ ހާފް ޓައިމްގައި ޑެޚެއާ ގައިގައި ތަޅައިގަންނަ ވަރަށް އޭނާ ރުޅި އަތުވެއްޖެކަމަށް ވެސް ކީން ބުންޏެވެ.
ކީން ބުނީ ޔުނައިޓެޑްގެ ޑިފެންޑަރުން އެ އުޅެނީ ކުޑަކުދިން އުޅޭހެންކަމަށާއި، ހެރީ މެގުއާ ކަހަލަ ކުޅުންތެރިއެއް ކައިރިން އެހާ ފަސޭހައިން ދެވޭނީ އެއްވެސް އޮއްޓަރެއް އޭނާގެ ކިބައިގައި ނެތުމުންކަމަށެވެ. އޭނާއަކީ ޔުނައިޓެޑްގެ ކޯޗު ނަމަ ޑެޚެއާއާއި މެގުއާ ޓީމް ބަހަށް ވެސް ނާރުވާނެކަމަށާއި، ދެ ކުޅުންތެރިން އެނބުރި ދާން ޖެހޭނީ ވަކިން ޓެކްސީއެއްގައި ކަމަށް ވެސް އޭނާ ބުންޏެވެ.
މި މެޗުގައި ޔުނައިޓެޑުން ނަތީޖާ ހަމަހަމަކުރީ ލިބުނު ޕެނަލްޓިއަކުންނެވެ. މިއީ ގިނަ ދުވަސްތަކެއްވަންދެން ކުޅުމާއި ދުރުގައި ހުރުމަށްފަހު ކުޅެން ނިކުތް ،ޕައުލް ޕޮގްބަ ހޯދައިދިން ޕެނަލްޓީއެކެވެ. ޕޮގްބާ ކުޅުން ނިކުތީ ދެވަނަ ހާފުގައެވެ. ޔުނައިޓެޑަށް ޕެނަލްޓީ ކާމިޔާބުކޮށްދިނީ ބްރޫނޯ ފެނާންޑޭސްއެވެ.
މި މެޗާއިއެކު މެންޗެސްޓަރ ޔުނައިޓެޑްވަނީ ބަލިނުވެ 12 މެޗު ހަމަކޮށްފައެވެ. 12 މެޗުގައި އެޓީމުން 30 ގޯލް ޖެހިއިރު ބައިކޮޅަށްވަނީ އެންމެ ތިން ގޯލެވެ.
ރޭގެ މެޗަކީ ޕްރިމިއަރ ލީގުގެ ގަދަ ހަތަރެއްގައި ހަމަޖެހިލުމަށް ދެ ޓީމަށްވެސް މުހިންމު މެޗެކެވެ. ޔުނައިޓެޑް ލީގުގެ 5 ވަނައިގައި އޮތީ 30 މެޗުން 46 ޕޮއިންޓާ އެކު އެވެ. 8 ވަނައިގައި ޓޮޓެނަމް އޮތީ 30 މެޗުން 42 ޕޮއިންޓް ހޯދައިގެންނެވެ.
Ads by STO
