އެއްވުންތައް ބޭއްވުން މަނާކުރިޔަސް, ރާވާފައިވާ މުޒާހަރާ އޮންނާނެ: ނަވާނަވައި
ފެތުރެމުން އަންނަ ކޮވިޑް-19 ގެ ސަބަބުން މާލެ ސަރަޙައްދަށް ގެނެސްފައިވާ ފުރަބަންދަށް މިހާރު ލުއިދިންނަމަވެސް، އެއްވުންތައް ނުބޭއްވުމަށް ފުލުހުން ކުރި އިލްތިމާސްއަށް ވާތުފިޔައިގެ ސިޔާސީ ހަރަކާތެއް ކަމަށްވާ ނަވާނަވައިން ރައްދު ދީފިއެވެ.
އެގޮތުން ނަވާނަވައިން ބުނެފައިވަނީ އެއްވުންތައް ނުބޭއްވުމަށް ފުލުހުން އިލްތިމާސް ކޮށްފައިވީނަމަވެސް، ރާވާފައިވާ މުޒާހަރާ އޮންނާނެ ކަމަށެވެ.
ނަވާނަވައިން އިސްވެހުރެ ރައްޔިތުންގެ މަޖިލިސް ކައިރީގައި އަންނަ ހޯމަ ދުވަހު މުޒާހަރާއެއް ބޭއްވުމަށް ވަނީ ހަމަޖެހިފައެވެ. މިއީ މި ބަލިމަޑުކަމުގެ ހާލަތުގައި އާންމު ފަރުދުންގެ މާލީ ހާލަތު ދަށްވިއިރު ވެސް ރައްޔިތުންގެ މަޖިލީހުން އެކަމަށްޓަކައި މަސައްކަތްތަކެއް ނުކުރާ ކަމަށް ބުނެ ބޭއްވުމަށް ހަމަޖެހިފައިވާ މުޒާހަރާއެކެވެ.
ނަވާނަވާއިން މިހެން ބުނެފައިވާއިރު، ފުލުހުން މިއަދު ކުރި ޓްވީޓެއްގައި ބުނެފައިވަނީ އެޗްޕީއޭގެ އެންގުންތަކާއި ޚިލާފަށް އެއްވުންތައް ނުބޭއްވުމަށާއި ލޮކްޑައުންގެ ހާލަތަށް ލުއި ދިނުމުގެ މި މަރުހަލާގައި ވެސް އާންމު ތަންތަނުގައި އުޅެވޭނީ އެކުގައި ގިނަވެގެން ތިން މީހުންނަށް ކަމަށެވެ.
ނަމަވެސް ނަވާނަވައި ހަރަކާތުގެ ސްޕޯކްޕާސަން ފާތިމަތު ސާއިރާ ވިދާޅުވީ، އެއްވުންތައް ނުބާއްވަން އިލްތިމާސްކޮށްފައިވީ ނަމަވެސް މިހާރު ވެސް އިންތިޒާމު ކޮށްފައިވާ ގޮތަށް އަންނަ ހޯމަ ދުވަހު މަޖިލިސް ކައިރީ މުޒާހަރާ ކުރާނެ ކަމަށާއި މުޒާހަރާ މަނާ ކުރާ ހާލަތެއްގައި ވެސް ބާއްވާނެ ކަމަށެވެ.
"މި ލޮކްޑައުންގެ ހާލަތު އައި ފަހުން އާންމު ރައްޔިތުން މި އުޅެނީ ވަރަށް ހާލުގައި، އާމްދަނީއެއް ނުލިބި ހަރަދުތައް ނުކުރެވިގެން، އެކަމަކު އެއަށް މަސައްކަތް ކުރުމުގެ ބަދަލުގައި އަޅުގަނޑުމެނަށް ފެންނަނީ މަޖިލީހުން މެންބަރުންގެ ސިޔާސީ ވާދަވެރިންގެ ކަންކަމުގަ އުޅޭ ތަން، މުޒަހާރާ ކުރަން ޖެހޭ އެބަ،" ސާއިރާ ވިދާޅުވި އެވެ.
Ads by STO
