ކޮވިޑް-19: މާމެންދޫއިން އިތުރު ދެމީހަކު މިބައްޔަށް ފައްސިވެއްޖެ!
ގއ. މާމެންދޫއިން އިތުރު ދެމީހަކު ކޮވިޑް-19 އަށް ފައްސިވެއްޖެއެވެ.
އެނގިފައިވާ ގޮތުގައި ކޮވިޑް އަށް ޓެސްޓު ކުރުމަށް އެދެމީހުންގެ ސާމްޕަލް ނަގާފައިވަނީ އިއްޔެއެވެ. އެމީހުން މިބައްޔަށް ފައްސި ވެފައިވާކަން އެނގިފައިވަނީ މިއަދު ހަވީރުއެވެ.
މިދެމީހުންނަކީ މާމެންދޫއިން ކޮވިޑް އަށް މިދިޔަ ބުރާސްފަތި ދުވަހު ފައްސިވީ މީހާއާއި އެއްގެއެއްގައި އުޅުނު ދެމީހުންނެވެ.
އެނގިފައިވާ ގޮތުގައި މިއަދު އެރަށުން ފައްސިވެފައިވާ މިދެމީހުން މާމެންދޫއަށް ދިޔައީ މިމަހުގެ 13 ވަނަ ދުވަހު ކޫއްޑޫ މަގުންނެވެ. އެފްލައިޓުން އެމީހުންނާއެކު 40 މީހުން ދަތުރު ކުރިކަމަށް ވެސް މައުލޫމާތު ލިބިފައިވެއެވެ.
މާމެންދޫއިން ފައްސިވެފައިވާ މިދެމީހުންނާއެކީ ދެން އެފްލައިޓުގައި ތިބީ ގެމަނަފުށްޓަށް ދަތުރުކުރި މީހުން ތަކެކެވެ.
މާމެންދޫއިން ފެނުނު ފުރަތަމަ ކޭސްއާއެކު އެންއީއޯސީން މީގެކުރިން ބުނެފައިވަނީ، މާމެންދޫ އަދި ގެމަނަފުށި މޮނިޓަރިންގެ ހާލަތަށްލުމާމެދު ގޮތެއް ނިންމާނެ ކަމަށެވެ.
