ކޮވިޑް-19: ދެ މީހަކު ވެންޓިލޭޓަރަށް ލައިފި!
ފެތުރެމުން އަންނަ ކޮވިޑް-19 ޖެހިފައިވާ ދެ މީހަކު ވެންޓިލޭޓަރަށް ލާފައިވާ ކަމަށް އެންއީއޯސީން ބުނެފިއެވެ.
ކޮވިޑް އާއި ގުޅޭގޮތުން މައުލޫމާތު ދެއްވުމަށް ސަރުކާރުގެ ފަރާތުން ބާއްވަމުން ގެންދާ ސިލްސިލާ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ. އިބްރާހިމް އަފްޒަލް ވިދާޅުވީ، ކޮވިޑް ޖެހިގެން ޓްރީޓޮޕް ހޮސްޕިޓަލުގައި މިވަގުތު ތިބި ތިން މީހުންގެ ތެރެއިން އެކަކު ވަނި ވެންޓިލޭޓަރަށްލާފައި ކަމަށާއި ހުޅުމާލޭ މެޑިކަލް ހޮސްޕިޓަލުގައި މިބައްޔަށް ފައްސިވެ ފަރުވާހޯދަމުންދާ އަށް މީހުންގެ ތެރެއިން އެކަކު މިހާރު ވެންޓިލޭޓަރަށް ލާފައިވާ ކަމަށެވެ.
ނަމަވެސް ދަރުމަވަންތަ ހޮސްޕިޓަކުގެ ޑީއެޗް11 ގައި މިވަގުތު މިބައްޔަށް އެއްވެސް މީހަކަށް ފަރުވާ ދެމުން ނުދާ ކަމަށް ވެސް ޑރ. އަފްޒަލް ވިދާޅުވިއެވެ.
ރާއްޖެއިން މިހާތަނަށް ކޮވިޑް އަށް ފައްސި ވެފައިވަނީ 2187 މީހުންނެވެ. އަދި ބަލިން ރަނގަޅުވީ މީހުންގެ ޖުމްލަ އަދަދު މިހާރު 1788 އަށް އަރައެވެ.
