ބައްޕާއެވެ! ތިވަރަށް ދޮގު ނުހަދާށެވެ!
"މިއަދަކީ ބައްޕައިންގެ ދުވަހެވެ. އެހެންކަމުން މިދުވަހުގެ މުނާސަބަތުގައި އަހަރެންގެ ބައްޕައާއި ބެހޭގޮތުން ވެސް ލިޔެލާނަމެވެ.
އަހަރެންގެ ބައްޕަ އަކީ ދޮގު ވެރިއެކެވެ. ކޮންމެ ދުވަހަކު ކިތަންމެ ދޮގެއް ބައްޕަ ހަދައެވެ.
އެގޮތުން އަހަރެންގެ ބައްޕަ ހަދާ ބައެއް ދޮގު ކިޔައިދެން ހެއްޔެވެ؟
ކޮންމެ ދުވަހަކު އިރު އެރުމުގެ ކުރިން ބައްޕަ ހޭލައެވެ. އިތުރަށް ނިދި ނާންނަ ކަމަށް އަދި ވަރުބަލިވެސް ނުވާކަމަށް ބައްޕަ ބުނެއެވެ.
ސައިބޮއެ ނިމިގެން ދަނީ މަސައްކަތުއެވެ. އަހަރެންގެ ބައްޕައަކީ ގާޑިޔަލެއްގައި ތަރުކާރީ ވިއްކަން އުޅޭ މީހެކެވެ. އެހެންކަމުން އެންމެ ފުރަތަމަ ވެސް ބައްޕަ ދަނީ ދަނޑަށެވެ. ދަނޑުގައި ހުރި ގަސްތަކަށް ފެންދީ، ނެގެން ހުންނަ ތަރުކާރީތައް ނަގައިގެން ވިއްކަން ދިޔުމަށް ދަތުރު ފަށައެވެ.
ސްކޫލް ބަންދު ދުވަހެކެވެ. އެދުވަހު ބައްޕަ ގާތުގައި ވަރަށް އާދޭސް ކޮށްގެން އަހަރެން ވެސް ބައްޕައާއެކު ގާޑިޔަލަށް ދާން ނިންމީމެވެ. ކޮންމެވެސް ސަބަބަކާއިހެދި ބައްޕަ އުޅުނީ އަހަރެން ނުގެންދާށެވެ. ނަމަވެސް ވަރަށް ބޮޑަށް ބޮޑާހޭކުމުން ބައްޕަ އަހަރެން ގޮވައިގެން ދިޔައެވެ.
އެދުވަހުގެ ހެނދުނު 8:00 ޖަހާކަންހާއިރު އަހަރުމެން ގޮސް ގާޑިޔަލުގައި ތަރުކާރީތައް ވިއްކުމަށް ތައްޔާރު ވެގެން ތިބީމެވެ. އެތަކެތި ގަންނަން މީހަކު އަންނާނެ ކަމުގެ އުންމީދުގައެވެ.
އަހަރުމެން ކައިރިން މީހުން ވެސް ދެއެވެ. ތަރުކާރީ ވިއްކުމަށް ބައްޕަ މަސައްކަތް ކުރަމުން ދިޔައެވެ. އެތަކެތި ވިއްކަނީ ވަރަށް އަގުހެޔޮކޮށް ކަމަށާއި އެއީ ތާޒާ ތަކެތި ކަމަށް ވެސް ބުންޏެވެ. ނަމަވެސް ގިނަ މީހުން ބައްޕަ ދެއްކި ވާހަކަ އަޑުވެސް ނާހާ ދިޔައެވެ. އަނެއްބަޔަކު ތަރުކާރީއެއް ނަގާފައި މޫނަށް ގޮތެއް ހަދާލާފައި އެތަނުން ދިޔައެވެ.
އަހަރެންގެ ބައްޕަގެ މޫނުމައްޗަށް ވެރިވި ލަދުވެތިކަމާއި، މާޔޫސްކަން އަހަންނަށް ފެނުނެވެ. ނަމަވެސް ބައްޕަ އަހަރެން ގާތު ބުނީ އެއީ އެއްވެސް ކަމެއް ނޫން ކަމަށާއި ބައެއް ދުވަސް ދުވަހު އެހެންވެސް ވާނެ ކަމަށެވެ. އަދި ބައްޕަ ދެރަވެސް ނުވާ ކަމަށް ބުންޏެވެ.
މެންދުރުވުމުން އަހަރެން ބަނޑުހައިވިއެވެ. އެވާހަކަ ބައްޕަގާތު ބުނުމުން ބައްޕަ އަތުގައި ހުރި ފައިސާކޮޅަށް ނަޒަރު ހިންގާލާފައި އަހަރެން ގޮވައިގެން، ކާއެއްޗެހި ވިއްކާ ގާޑިޔަލަކަށް ދިޔައެވެ. އެތަނުން ސޭންޑްވިޗެއް ގަނެފައި އަހަންނަށް ދީފައި އެކާލުމަށް ބުންޏެވެ. ބައްޕައަށްވީ ސޭންޑްވިޗް ކޮބައިތޯ އެހުމުން ބުނީ ބައްޕަ ބަނޑުހައި ވެސް ނުވާ ކަމަށެވެ. އެހެންކަމުން އަހަރެންގެ ސޭންޑްވިޗުން އެއްބައި ބައްޕަ އަނގައަށް ލެވީމެވެ.
އެދުވަހުގެ މެންދުރުފަހު 15:00 ހާއިރެވެ. ބައްޕަގެ މޫނުމަތިން ފެންނަމުން ދިޔައީ ހާސްކަމާއި، މަޑުމޮޅިކަމާއި، ވަރުބަލިކަމާއި، މާޔޫސް ކަމެވެ. ވަރުބަލިވަނީ ދޯއޭ، ގެއަށް ދާން ހިނގާށޭ ބުނުމުން ބައްޕަ ބުނީ ވަރުބަލިވެސް ނުވާ ކަމަށެވެ.
އޭގެ އިރުކޮޅެއް ފަހުން ގާޑިޔާ ކައިރިއަށް އަންހެނަކު ކުޑަކުއްޖަކު ގޮވައިގެން ދިޔައެވެ. އޭނާ ވަރަށް ބައިވަރު ތަރުކާރީ ގަނެފައި އެތަކެތި ކިރުމަށް ބުންޏެވެ. ހުރިހާ ތަރުކާރީއެއް ކިރާފައި ބައްޕަބުނީ އެތަކެއްޗަށް މުޅިއަކު އަރަނީ 500 ރުޕީސް ކަމަށެވެ. ނަމަވެސް އެކަމާއި އެއަންހެން މީހާ ދެކޮޅުހަދާ ޖަދަލު ކުރިއެވެ. ބުނީ އެވަރެއް ނުވާނެ ކަމަށާއި 50 ރުޕީސް އަށްވުރެ އިތުރަށް ނުދޭނެ ކަމަށެވެ.
އަހަރެންގެ ބައްޕަ ރޮވިފައި ކަހަލަ ގޮތަކަށް އެއަންހެން މީހާ ގާތު އާދޭސް ކުރިއެވެ. އެންމެ 50 ރުޕީސުން ގޭތެރޭގެ ޚަރަދުތައް ބަލަހައްޓާނީ ކިހިނެއްތޯއާއި، އެހުރިހާ ތަރުކާރީއަށް އެއަށްވުރެ ގިނައިން އަރާނެކަމަށާއި ބައްޕަ ބުނީ ހަމަ އަގު ކަމަށް ވެސް ބުންޏެވެ. ނަމަވެސް އެއަންހެން މީހާ އެންމެ ގިނަ ވެގެން ވެސް ދޭން ބުނީ 100 ރުޕީސް އެވެ.
އަހަރެން އެއަންހެން މީހާއަށާއި އެކުޑަ ކުއްޖާއަށް ބަލައިލީމެވެ. އެމީހުން ފެންނަނީ ވަރަށް މުއްސަނދި ބައެއްގެ ގޮތުގައެވެ. އެކަހަލަ ކިތަންމެ 500 ރުޕީސް އެއް އެމީހުންނަށް ދެވިދާނެކަން އަހަންނަށް އެނގުނެވެ.
ނަމަވެސް އޭނާ ނުދޭން އުޅޭ އެއްޗެއް ނުލިބޭނެކަން އެނގިގެން ބައްޕަ 100 ރުޕީސް އަށް އެއްބަސްވިއެވެ. އަދި އަހަންނާއި ދިމާލަށް އެނބުރިފައި ބުނީ އެއީ އެއްވެސް ކަމެއް ނޫން ކަމަށެވެ.
ހަވީރުވުމުން އަހަރުމެން ގެއަށް އައީމެވެ. މަންމަ އަތަށް 100 ރުޕީސް ދިއްކޮށްލުމުން، މަންމަ ބައްޕައާއި ދިމާލަށް އެއްޗެހި ކިއެވެ. ގޭގެ ޚަރަދުތައް ބަލަހައްޓަން ޖެހެނީ މަންމައަށް ކަމަށާއި ހުރިހާ ކަމަކާއި ވިސްނަން ޖެހެނީ ވެސް މަންމައަށް އެކަނި ކަމަށް ބައްޕައާއި ދިމާލަށް ބުންޏެވެ.
މަންމަގެ އެބަސްތަކަށް ބައްޕަ އެއްވެސް އެއްޗެކޭ ނުބުނެއެވެ.
އެރޭ އަހަރެން ނިންދަވަން އައުމުން، ބައްޕައާއި ދިމާލަށް މަންމަ އެއްޗެހި ކިޔުމުން ދެރަ ނުވޭތޯ އެހުމުން ބައްޕަ އަނެއްކާވެސް ދޮގު ހެދިއެވެ. ބުނީ ބައްޕަ ދެރަނުވާ ކަމަށާއި ބައްޕަ އަކީ އެންމެ ހިތްވަރުގަދަ މީހާކަމަށެވެ.
މިއީ އަހަރެންގެ ބައްޕަ ކޮންމެ ދުވަހަކު ކުރިމަތިލާ ކަންކަމެވެ. ކޮންމެ ދުވަހަކު ހަދަމުންދާ ދޮގުތަކެވެ."
