ރެއާލް މެޑްރިޑް ލަލީގާގެ ކޮންޓްރޯލް ހޯދައިފި، ހުރިހާ ޝުކުރެއް ވީއޭއާރަށް!
ރެއާލް ސޮސިއެދާދް ބަލިކޮށް ސްޕެނިޝް ލަލީގާ ތާވަލްގެ އެއްވަނައަށް ޖެހިލައި ރެއާލް މެޑްރިޑުން ލަލީގާ ހޯދުމުގެ ރޭހުގެ ކޮންޓްރޯލް ހޯދައިފިއެވެ.
2-1އިން ސޮސިއެދާދް އަތުން ރެއާލް މޮޅުވި މެޗުގައި ވީއޭއާރުގެ ނިންމުންތަކަށް ގިނަ ބައެއްގެ ސަމާލުކަންވަނީ އަމާޒުވެފައެވެ. މެޗު ފަށައިގެން ފުރަތަމަ ހާފުގައި ދެ ޓީމުގެ ފަރާތުންވެސް ފެނުނީ ހަމަހަމަކުޅުމެކެވެ. މެޗުގެ އޮއިވަރު އެއްކޮށް ބަދަލުވީ ދެވަނަ ހާފުގެ ކުރީކޮޅު ރެއާލްއަށް ޕެނަލްޓީއެއް ލިބުނު ހިސާބުންނެވެ.
ރެއާލްގެ ވިނީސިއަސްއަށް ކުރި ފައުލަކަށް ރެފްރީ ދިން ޕެނަލްޓީ ކާމިޔާބުކޮށް އެޓީމަށް ލީޑް ނަގައިދިނީ ސާޖިރޯ ރާމޯސްއެވެ. މި ލަނޑާއިއެކު ލަލީގާގެ ތާރީޚުގައި އެންމެ ގިނަ ލަނޑު ޖެހި ޑިފެންޑަރުގެ ރެކޯޑް ރާމޯސްވަނީ މުގުރާލާފައެވެ. 68 ގޯލާއިއެކު ރާމޯސް އެއްވަނައިގައި އޮތްއިރު 67 ގޯލާއިއެކު ދެވަނައިގައި އޮތީ ބާސެލޯނާގެ ކުރީގެ ޑިފެންޑަރ ރޮނާލްޑް ކޯމާންއެވެ.
މެޗުގެ 69ވަނަ މިނެޓުގައި ރެއާލް ސޮއިއެދާދުން މެޗުގެ ނަތީޖާ ހަމަހަމަކުރަން ގޯލެއް ޖެހިއެވެ. އަދުނާން ޔަނޫޒާއީ ޖެހި ހިތްގައިމު ގޯލް ރެފްރީ ގަބޫލެއް ނުކުރިއެވެ. އޭރިއާ ބޭރުން އޭނާ ފޮނުވާލި ހަމަލާ ގޯލަށް ވަތްއިރު، ކީޕަރު ކޯޓުއާގެ ކުރިމަތީގައި ސޮސިއެދާދުގެ ކުޅުންތެރިއެއް ހުރުމުން ރެފްރީ ނިންމީ މިއީ އޮފްސައިޑް ގޯލެއްކަމަށެވެ.
އޭގެ މިނެޓެއްފަހުން ރެއާލް މެޑްރިޑުން ލީޑް ފުޅާކުރިއެވެ. ކަރިމް ބެންޒެމާ ޖެހި މި ގޯލް ވީއޭއާރު ބެލުމަށްފަހު ރެފްރީ ގަބޫލުކުރިއެވެ. ވަލްވާޑޭ ނަގައިދިން ހުރަސް ބެންޒެމާ ކޮންޓްރޯލްކުރީ އަތުންކަމަށް ސޮސިއެދާދު ކުޅުންތެރިން ދިޔައީ އެޕީލްކުރަމުންނެވެ.
މެޗުގެ ފަހު ހާފުގައި ލިބުނު އަނިޔާއެއްގެ ސަބަބުން ކެޕްޓަން ސާޖިއޯ ރާމޯސްވަނީ ބަދަލުކުރަން ޖެހިފައެވެ.
ލީގުގައި ބާކީ އަށް މެޗު އޮތްއިރު މި މޮޅާއިއެކު ރެއާލް މެޑްރިޑްވަނީ އެއްވަނައަށް ޖެހިލާފައެވެ. ދެވަނަގައި ބާސެލޯނާއަށްވެސް މި އަދަދަށް ޕޮއިންޓް ލިބިފައިވާއިރު، ރެއާލްއަށް ކުރި ލިބެނީ ހެޑް ޓު ހެޑުން ކުރި ލިބޭތީއެވެ. މި ދެ ޓީމް ލަލީގާގައި ބާސެލޯނާގެ ދަނޑުގައި ކުޅުނު މެޗު ލަނޑެއް ނުޖެހި އެއްވަރުވިއިރު، ރެއާލް މެޑްރިޑްގެ ދަނޑުގައި ކުޅުނު މެޗުން ބާސާ ބަލިވީ ދޭއް ސުމަކުންނެވެ.
