"ޑިފެންޑަރުން ސަމާލުވޭ! އެލިސަންއަށް އަބަދު ސަލާމަތެއް ނުކޮށްދެވޭނެ!"
ލިވަޕޫލްގެ ޑިފެންސް ރަނގަޅު ކުރަން ޖެހޭކަމަށައި، ކީޕަރު އެލިސަން ބެކާއަށް އަބަދު ޓީމް ސަލާމަތް ނުކޮށްދެވޭނެ ކަމަށް ލިވަޕޫލްގެ ކޯޗު ޔާގެން ކްލޮޕް ބުނެފިއެވެ.
އިނގިރޭސި ޕްރިމިއަރ ލީގުގައި އެވަޓަންއާއި ލިވަޕޫލް ވާދަކުރި މެޗުގައި އެއްވެސް ޓީމަކަށް ލަނޑެއް ނުޖެހި ނިމުނުއިރު، މެޗުގައި ލިވަޕޫލްގެ ހީރޯއަކީ ކީޕަރު އެލިސަންއެވެ. ހުސް ފުރުސަތުތައް ދެ ޓީމަށްވެސް މަދުން ލިބުނު މި މެޗުގައި ގޯލް ޖަހަން އެންމެ ރަނގަޅު ފުރުސަތުތައް ލިބުނީ އެވަޓަންއަށެވެ. މިގޮތުން ފޯވާޑް ކެލްވާޓް ލެވިން ފޮނުވާލި ހަމަލާއެއް ކީޕަރު އެލިސަން ބެކާވަނީ ހުށިޔާރުކަމާއިއެކު ދިފާއުކޮށްފައވެ.
ލިވަޕޫލްގެ ކޯޗަށް އޮތް އެންމެ ބޮޑު ކަންބޮޑުވުމަކީ އޭނާ ބޭނުންވާ ވަރުގެ ހަމަލާތަކެއް އެޓީމަށް ނުއުފެއްދުމެވެ. އަނެއްކޮޅުން ގޯލް ނުޖެހި ބައިކޮޅަށް އަންނަ ބޯޅަތައް ނުރައްކާވާތީ އެކަން އޭނާ ފާހަގަކުރިއެވެ.
ކޯޗު ޔާގެން ކްލޮޕް ބުނީ އެލިސަންގެ މޮޅުވާހަކަ މީގެ ކުރިންވެސް އެތައް ފަހަރަކު ފާހަގަކޮށްފައި ވާނެ ކަމަށާއި މިދިޔަ އަހަރު ޗެމްޕިއަންސް ލީގު އެޓީމުން ހޯދުމުގައިވެސް އެލިސަންގެ ހިއްސާ ބޮޑުކަމަށެވެ. ހަމައެހެންމެ މި ސީޒަންގެ ޕްރިމިއަރ ލީގުގައި ލިވަޕޫލް ހަނި ތަފާތަކުން ގިނަ މެޗުތަކުން މޮޅުވިއިރު އެންމެ މުހިންމުވީ ކީޕަރުގެ ސޭވްތައްކަމަށް އޭނާ ބުންޏެވެ.
ކްލޮޕް ބުނީ ކޮންމެ ފަހަރަކު އެލިސަންއަށް ޓިމް ސަލާމަތްނުކުރެވޭނެކަމަށާއި، އެހެން ކުޅުންތެރިން އެކަން ދަންނަން ޖެހޭކަމަށެވެ. އެލިސަންއަކީ ކިހާ ފެންވަރެއްގެ ކީޕަރެއްކަން ދިފާއުކުރަން ޖެހުނު މަދު ބޯޅަތަކުންވެސް އޭނާ ސާބިތުކޮށްދިންކަމަށް ކްލޮޕް ބުންޏެވެ.
"ނުވަދިހަ މިނެޓުގައި އޭނާގެ ބޭނުން ޖެހުނީ ކުޑަހިނދުކޮޅަކަށް. އެވަގުތު ކޮޅުގައި ފެންވަރު ސާބިތުކޮށްދީ ޓީމް ސަލާމަތްކޮށްދިނީ އެލިސަން. އެކަމަކު މިއީ އަހަރުމެން އަބަދުވާނެކަމަށް އުއްމީދުކޮށްގެން ތިބެން ޖެހޭނެ ކަމެއް ނޫން"
އެވަޓަން އަތުން ބަލިވިޔަސް ލިވަޕޫލަށް މާބޮޑު ހާސްކަމެއް ނެތެވެ. ބާކީ އޮތް 8 މެޗުން އެޓީމް ލީގު ކަށަވަރުކުރަން ބޭނުންވަނީ 5 ޕޮއިންޓެވެ. އެޓީމް އެއްވަނައިގައި 83 ޕޮއިންޓާއިއެކު އޮތްއިރު، މެންޗެސްޓަރ ސިޓީ ދެވަނައިގައި އޮތީ 60 ޕޮއިންޓާއިއެކުގައެވެ.
ލީގުގައި ރޭ ކުޅުނު އެހެން މެޗުތަކަށް ބަލާއިރު، ޗެލްސީންވަނީ ފަހަތުން އަރާ އެސްޓަން ވިލާ ބަލިކޮށް ޗެމްޕިއަންސް ލީގަށް ކޮލިފައިވުމުގައި ފިޔަވަޅެއް ކުރިއަށް ޖެހިލާފައެވެ. 4ވަނަގައި 51 ޕޮއިންޓާއެކު އެޓީމް އޮތްއިރު 5ވަނަގައި މެންޗެސްޓަރ ޔުނައިޓެޑް އޮތީ 46 ޕޮއިންޓާއިއެކުގައެވެ.
