ހުވަފެނުގައި ސުޝާންތު އަހަންނާއި ބައްދަލުކޮށްފި، ބުނީ އަހަރެންގެ ދަރިއަކަށް ވެގެން އެނބުރި އަންނާނަމޭ: ރާކީ ސާވަންތު
މިހާރު އިންޑިއާގައި އެންމެ ގަދަޔަށް ދެކެވޭ އެއް ވާހަކައަކީ ބޮލީވުޑްގެ އެކްޓަރ ސުޝާންތު ސިންގް ރާޖްޕޫތުގެ މަރުގެ ވާހަކައެވެ.
އޭނާގެ މަރާއި ގުޅިގެން އެތައް ބަޔަކު ދެރަވެ ޕޯސްޓުތައް ހިއްސާ ކުރަމުންދާއިރު، އަނެއްބަޔަކު ދަނީ ހަދަހަދައިގެން ވީޑިއޯތަކާއި ވާހަކަތައް ވެސް ފަތުރަމުންނެވެ.
އެގޮތުން އެފަދަ ވާހަކައެއް ބޮލީވުޑްގެ ނެށުންތެރިއެއް ކަމަށްވާ ރާކީ ސާވަންތު ވެސް މިވަނީ ދައްކާފައެވެ.
ރާކީ އަމިއްލައަށް ކުރި ވީޑިއޯއެއްގައި ބުނީ ހުވަފެނުން ސުޝާންތު އޭނާއާއި ބައްދަލު ކުރި ކަމަށާއި އެނބުރި އަންނާނެ ކަމަށް ބުނި ކަމަށެވެ.
"ސުޝާންތު އަހަރެން ކައިރީގައި ބުނީ އޭނަގެ ފޭނުންނަށް މެސެޖެއް ދިނުމަށް. އަހަރެން އެހިން ކޮން މެސެޖެއްހޭ. އެހީމަ ބުނީ ބުނެދޭށޭ ތިމަންނަ އެނބުރި އަންނާނަމޭ. ކިހިނެއްހޭ އެހީމަ ބުނީ ފަހުން އިނގޭނެއޭ، އަހަރެން ބުނިން ނޫނެކޭ މިހާރު ބުނެބަލާށޭ ފޭނުން ކައިރީ ބުނަން ބޭނުމޭ. ސުޝާންތު ބުނީ އަހަރެން (ރާކީ) މީހަކާއި އިނީމަ، އަހަރެންގެ ބަނޑުންނޭ ތިމަންނަ އަލުން އުފަންވާނީ." ރާކީ ސާވަންތު ބުންޏެވެ.
މީގެއިތުރުން ރާކީ ސާވަންތު ބުނީ، ސުޝާންތާއިމެދު ބޭއިންސާފުން ބޮލީވުޑްގެ ގިނަ މީހުން ކަންތައް ކޮށްފައިވާ ކަމަށް ބުނިކަމަށާއި މަރުވީ އެހެންވެގެން ކަމަށް ބުނި ކަމަށެވެ. އަދި ބަދަލު ހިފުމަށް އެނބުރި އަންނާނެ ކަމަށް ވެސް ބުނި ކަމަށެވެ.
ރާކީ ސާވަންތުގެ މިވާހަކަތައް ޚުދު އިންޑިއާ މީހުންވެސް ޤަބޫލެއް ނުކުރެއެވެ. ޕަބްލިސިޓީ ހޯދުމަށް ރާކީ ދުވަސްކޮޅު ކޮޅުން މިފަދަ ކަންކަން ކުރަމުން އަންނާތީ ގިނަ ބެލުންތެރިން ވަނީ މިކަމާއި ނުރުހުން ފާޅުކޮށް، ރާކީ ސާވަންތަކީ މޮޔައެއް ކަމަށް ވެސް ބުނެފައެވެ.
