7 ފެބްރުއަރީގެ މައްސަލަ ބައްލަވާ، އެއްބާރުލުން ދޭނަން: ރައީސް ވަހީދު
2012 ވަނަ އަހަރުގެ ފެބްރުއަރީ މަހުގެ 7 ވަނަ ދުވަހު ކަންކަން ހިގައިދިޔަ ގޮތް ބެއްލެވުމަށާއި ފުރިހަމަ އެއްބާރުލުން ދެއްވާނެ ކަމަށް ކުރީގެ ރައީސް ޑރ. މުޙައްމަދު ވަހީދު ޙަސަން މަނިކު ވިދާޅުވެއްޖެއެވެ.
ރައީސް ވަހީދު ކުރިން ހުންނެވީ ކުރީގެ ރައީސް މުޙައްމަދު ނަޝީދުގެ ވެރިކަމުގައި ނައިބު ރައީސް ކަމުގެ މަގާމުގައެވެ.
ނަމަވެސް 2012 ވަނަ އަހަރުގެ ފެބްރުއަރީ މަހުގެ 7 ވަނަ ދުވަހު ރައީސް ނަޝީދު ވެރިކަމުން އިސްތިއުފާ ދެއްވުމާއި ގުޅިގެން ރައީސް ވަހީދު ވަނީ ދިވެހިރާއްޖޭގެ ރައީސް ކަމާއި ހަވާލުވެލައްވާފައެވެ.
އެދުވަހުން ފެށިގެން މިއަދާއި ހަމައަށް ވެސް އެމްޑީޕީން ޤަބޫލު ކުރަނީ ރައީސް ނަޝީދު އިސްތިއުފާ ދެއްވީ، އެއިރުގެ އިދިކޮޅު ފަރާތްތަކާއި ރައީސް ވަހީދު ގުޅިގެން ހިންގެވި ބަޣާވާތަކާއި ގުޅިގެން ކަމަށެވެ.
ރައީސް ނަޝީދުގެ ވެރިކަން ބަދަލުވީ ގޮތް ބެލުމަށް ޚާއްސަ ޤާނޫނެއް ހަދަން ޖެހޭ ކަމަށް ރައްޔިތުންގެ މަޖިލީހުގެ ބައެއް މެންބަރުން ވަނީ ގޮވާލައްވާފައެވެ.
އިދިކޮޅު ކޮންގްރެސުން މިރޭ ބޭއްވި ޖަލްސާގައި ވާހަކަ ދައްކަވަމުން ރައީސް ވަހީދު ވިދާޅުވީ އެމައްސަލަ ބައްލެވުމުގައި އެމަނިކުފާނުގެ އެއްވެސް މައްސަލައެއް ނެތް ކަމަށާއި ފުރިހަމައަށް އެއްބާރުލުން ދެއްވާނެ ކަމަށެވެ.
"އެއްވެސް މައްސަލައެއް ނެތް އެ މައްސަލަ ބެއްލެވުމާ ދޭތެރޭގައި. ހަމަ ބައްލަވަންވީރަނގަޅަށް. އަޅުގަނޑުގެ އެއްބާރުލުން ފުރިހަމަ އަށް ލިބިވަޑައިގަންނަވާނެ" ވަހީދު ވިދާޅުވިއެވެ.
Ads by STO
