ބަންގްލަދޭޝްއަށް ފުރުވާލި 3 މީހަކު ކޮވިޑަށް ފައްސިވެއްޖެ
ރާއްޖެއިން ބަންގްލަދޭޝްއަށް ފުރުވާލި ތިން މީހަކު ކޮވިޑް-19 އަށް ފައްސިވެފައިވާ ކަމަށް ނޭޝަނަލް އިމަޖަންސީ އޮޕަރޭޝަން ސެންޓަރު (އެންއީއޯސީ) އިން ބުނެފި އެވެ.
މިހާރު ބާއްވަމުން އަންނަ ނޫސްވެރިންގެ ބައްދަލުވުމުގައި ތަރުޖަމާނު މަބްރޫކް އަޒީޒް ވިދާޅުވީ، އެގައުމަށް އަނބުރާ ފޮނުވާލި ތިން މީހަކު ބައްޔަށް ފައްސިވެފައިވާ ކަމަށެވެ. އަދި އެގައުމުގައި އެތިން މީހުން ކަރަންޓީނުވާނެ ކަމަށް ވެސް އޭނާ ވިދާޅުވި އެވެ.
އެޗްޕީއޭ އިން ބުނީ މިއަދު އިތުރު 14 މީހަކު ކޮވިޑަށް ފައްސިވި ކަމަށާއި އޭގެ ތެރޭގައި ހިމެނެނީ 8 ދިވެއްސަކާއި، ބަންގްލަދޭޝްގެ 3 މީހެއްގެ އިތުރުން އިންޑިއާގެ ދެ މީހަކާއި ސްރީލަންކާގެ މީހެއް ކަމަށެވެ.
މި 14 މީހުންނާއެކު މި ބައްޔަށް ރާއްޖެއިން ފައްސިވި މީހުންގެ އަދަދު މިހާރު ވަނީ 2217 އަށް އަރާފައެވެ. މީގެތެރެއިން ފަރުވާ ދެމުން މިހާރު އަންނަނީ 391 މީހަކަށެވެ.
މި ބަލީގައި ރާއްޖެއިން އަށް މީހަކު ވަނީ މަރުވެފައެވެ. އޭގެތެރޭގައި ހިމެނެނީ ބަންގްލަދޭޝްގެ ހަތަރު މީހުންނާއި ހަތަރު ދިވެހިންނެވެ.
Ads by STO
