ލޮކްޑައުންއާ ހިލާފުވި މީހަކު ޖޫރިމަނާގެ ގޮތުގައި 28000 ރުފިޔާ ދައްކަން ޖެހިއްޖެ
މާލޭގައި ކޮވިޑް-19 ފެތުރެން ފެށުމާ ގުޅިގެން އިއުލާން ކުރި ލޮކްޑައުންއާ 28 ފަހަރެއްގެ މަތިން ހިލާފުވި މީހަކު ޖޫރިމަނާގެ ގޮތުގައި 28000 ރުފިޔާ ދައްކަން ޖެހިއްޖެއެވެ.
ރާއްޖެ ޓީވީގެ ޕްރޮގްރާމެއްގައި ވާހަކަ ދައްކަވަމުން ސްޕްރިންޓެންޑެންޓް އޮފް ޕޮލިސް ހުސައިން ސަމީރު ވިދާޅުވީ ލޮކްޑައުންގެ ތެރޭގައި އެންމެ މީހަކު 28 ފަހަރު ޖޫރިމަނާ ކުރެވުނު ކަމަށެވެ.
އެހެންކަމުން ޖޫރިމަނާ ކުރާ ކޮންމެ ފަހަރަކު 1000 ރުފިޔާ ދައްކަން ޖެހޭ އުސޫލުގެ ތެރެއިން އެ މީހާއަށް ޖުމްލަ 28،000 ރުފިޔާ ދައްކަން ޖެހޭނއެވެ.
ފުލުހުންގެ ތަފާސް ހިސާބުތައް ދައްކާގޮތުން ލޮކްޑައުންއާ ހިލާފުވެގެން ޖުމްލަ 9361 މީހަކު ޖޫރިމަނާ ކޮށްފައިވެއެވެ. މީގެ ތެރެއިން 8378 މީހަކު ޖޫރިމަނާކުރީ މާލެއިންނެވެ. އަދި ހުޅުމާލެއިން 833 މީހަކު ޖޫރިމަނާ ކުރި އިރު ވިލިމާލެއިން 150 މީހަކު ވަނީ ޖޫރިމަނާ ކޮށްފައެވެ.
މީގެ އިތުރުން ލޮކްޑައުންއާ ހިލާފުވެގެން 626 މީހަކު ހައްޔަރު ކޮށްފައިވާއިރު މީގެ ތެރެއިން މާލެއިން 576 މީހަކު ވަނީ ހައްޔަރު ކޮށްފައެވެ. އަދި ހުޅުމާލެއިން 47 މީހަކު އަދި ވިލިމާލެއިން 3 މީހަކު ވަނީ ހައްޔަރުކޮށްފައެވެ.
