ބޮޑު ކުށަކަށް ނުވާތީ ކުޑަކުއްޖަކާ ބެހުނު މީހަކު ބަންދުން ދޫކޮށްލަން ޖެހިއްޖެ
ހައި ކޯޓުން މިހާރު އަމަލުކުރާ އުސޫލުގެ ދަށުން ޖިންސީ ކުށްތައް ބޮޑެތި ކުށްތަކުގެ ތެރޭގައި ނުހިމެނެތީ ކުޑަކުއްޖަކާ ބެހުނު މީހަކު ބަންދުން ދޫކޮށްލައިފިއެވެ.
އެގޮތުން ހައިކޯޓުން މިފަހުން ކަނޑައަޅާފައިވާ ގޮތުގައި، ޖިނާއީ އިޖުރާއަތުގެ ގާނޫނުގައި ބުނާ ބޮޑެތި ކުށްތައް ފިޔަވައި އެހެން ކުށްތަކުގެ ތުހުމަތަށް ހައްޔަރު ކުރާ މީހުން، 15 ދުވަހަށްވުރެ އިތުރަށް ބަންދެއް ނުކުރެވޭނެއެވެ.
ކުޑަ ކުއްޖަކާ މެދު ޖިންސީ އަމަލު ހިންގި ކަމަށް ތުހުމަތުކޮށްފައިވާ މީހާ މީގެކުރިން 15 ދުވަހަށް ބަންދު ކޮށްފައިވާއިރު، ޕްރޮސިކިއުޓާ ޖެނަރަލްގެ ފަރާތުން މިއަދު އެދިފައިވަނީ ޖިނާއީ އިޖުރާއަތުގެ ގާނޫނުގެ ދަށުން ތުހުމަތުވާ މީހާ ޝަރީއަތް ނިމެންދެން ބަންދުގައި ބެހެއްޓުމަށެވެ. ނަމަވެސް މަތީ ކޯޓުތަކުގެ އަމުރުތަކަށް ތަބާވުމަކީ ދަށު ކޯޓުތަކަށް ލާޒިމް ކަމަކަށްވާތީ އެކަން ކޮށް ދެވެން ނެތީ ކަމަށް ކުރިމިނަލް ކޯޓުގެ މިއަދުގެ އަމުރުގައިވެ އެވެ.
އެ އަމުރުގައި ބުނެފައިވަނީ އޭނާގެ މައްޗަށް ތުހުމަތު ކުރެވޭ މިންވަރަށް ހެކި ވެސް ލިބިފައިވާ ކަމަށާއި ނަމަވެސް ކުށަކީ ބޮޑު ކުށަކަށް ނުވާތީ، ބަންދުގައި އިތުރަށް ބެހެއްޓެން ނެތް ކަމަށެވެ. އަދި އޭނާގެ މައްޗަށް ކިތަންމެ ސީރިއަސް ތުހުމަތުތަކެއް ކުރެވުނު ނަމަވެސް ބަންދު އިތުރުކޮށް ދެވެން ނެތްކަން ހައިކޯޓުގެ ހުކުމަށް ރިއާޔަތްކޮށް އަމުރުގައި ބުންޏެވެ.
އަމުރުގައި އިތުރަށް ބުނެފައިވާ ގޮތުގައި، މީގެކުރިން ތުހުމަތުވާ މީހާ ބަންދު ކުރުމަށް ޖިނާއީ އިޖުރާއަތުގެ ގާނޫނުން ދަށުން އެދިފައިވާތީ، ދެން އޭނާ ބަންދު ކުރުމަށް ކުޑަކުދިންނަށް ޖިންސީ ގޯނާކުރާ މީހުންނާމެދު ހާއްސަ އުސޫލުތަކަކަށް އަމަލުކުރުމުގެ ގާނޫނުގެ ދަށުން އެދުމަކީ ހަމަޖެހޭ ކަމެއް ނޫން ކަމަށް މި މައްސަލަ ތަހުގީގުކުރާ އޮފިސަރު ބަންދު މަޖިލީހުގައި ވިދާޅުވެފައިވާ ކަމަށެވެ.
ދާދިފަހުން މާލޭގެ ގެސްޓްހައުސްއެއްގެ ތެރޭގައި 11 އަހަރުގެ ކުއްޖަކު ރޭޕްކުރި ކަމަށް ތުހުމަތުވާ އަނީސް ހިލްމީގެ މައްސަލާގައި ކޮމިޝަނަރު އޮޕް ޕޮލިސް، ވަނީ އޭނާ ޝަރީއަތް ނިމެންދެން ބަންދު ކޮށްފައި ބެހެއްޓުމުގެ އަމުރަކަށް އެދިފައެވެ. އެއާއެކު މި މަހުގެ 20 ވަނަ ދުވަހު އަނީސް ހިލްމީ، ޝަރީޢަތް ނިމެންދެން ބަންދު ކުރުމަށް ކްރިމިނަލް ކޯޓުން ވަނީ އަމުރުކޮށްފައެވެ.
