ސިޓީ މޮޅުވި މެޗުގައި އަގުއޭރޯއަށް އަނިޔާވެ އޭނާއަށް ސީޒަން ނިމުމުގެ ބިރު!
އިނގިރޭސި ޕްރިމިއަރ ލީގުގައި ބާންލީ އަތުން މެންޗެސްޓަރ ސިޓީ ފަސޭހަ މޮޅެއް ހޯދިއިރު ފޯވާޑް ސާޖިއޯ އަގުއޭރޯއަށް އަނިޔާވެއްޖެއެވެ.
5-0އިން ސިޓީ މޮޅުވި މެޗުގައި އަގުއޭރޯއަށް އަނިޔާވީ ފުރަތަމަ ހާފުގެ އެންމެ ފަހު ވަގުތުކޮޅުގެ ތެރޭގައެވެ. ޕްރިމިއަރ ލީގުގެ ލަނޑު ލިސްޓުގެ ތިންވަނައިގައި އޮތް ކުޅުންތެރިޔާއަށް ލިބުނު އަނިޔާގެ ސަބަބުން މި ސީޒަންގައި ދެން ނުކުޅެވުމުގެ ފުރުސަތު ބޮޑެވެ.
"ހީވަނީ އަނިޔާ ސީރިއަސްހެން، މިދިޔަ މަހުވެސް ކަކުލަށް ތަދުވާތީ އުޅުނު، އެކަމަކު މިހާރު ހިނގާނުލެވިގެން އެއުޅެނީ. ޔަގީނުންވެސް ދެތިން މެޗެއް ގެއްލޭނެ. މާދަމާ ހަދާ ސްކޭނުން ސިދާ ޖަވާބެއް ލިބޭނީ ކުރިއަށް އޮތް އަށް މެޗުވެސް ގެއްލުމުގެ ފުރުސަތު އެބައޮތްކަމަށް މެޑިކަލް ޓީމުން ބުނަނީ" 32 އަހަރުގެ ފޯވާޑާއި ގުޅޭގޮތުން ގާޑިއޯލާ ބުންޏެވެ.
ބާންލީ އަތުން ސިޓީ މޮޅުވި މެޗުގައި ޒުވާން ފޯވާޑް ފިލް ފޮޑެންވަނީ މޮޅު ކުޅުމެއް ދައްކާފައެވެ. މެޗުގެ ފުރަތަމަ ގޯލާއި ފަހު ގޯލް ފޮޑެން ޖެހިއިރު، އަނެއް ތިން ލަނޑުގެ ތެރެއިން ދެ ލަނޑު ޖަހައިދިނީ ރިޔާދް މާރޭޒްއެވެ. އަނެއް ލަނޑު ޖަހައިދިނީ ޑޭވިޑް ސިލްވާއެވެ.
މި ނަތީޖާއާއިއެކު ސިޓީންވަނީ ތާވަލްގެ އެއްވަނައިގައި އޮތް ލިވަޕޫލާއި ދެމެދު އޮތް ފަރަގު 20 ޕޮއިންޓަށް ކުޑަކޮށްފައެވެ. ލީގުގެ ޗެމްޕިއަންކަން ކަށަވަރުކުރަން ލިވަޕޫލަށް ބާކީ އޮތް އަށް މެޗުން ބޭނުންވަނީ 5 ޕޮއިންޓެވެ. ނަމަވެސް މެންޗެސްޓަރ ސިޓީން ކުރިއަށް ހުރި މެޗުން ބަލިވެއްޖެނަމަ އެންމެ މެޗަކުން މޮޅުވެގެންވެސް ލިވަޕޫލަށް ތަށި ލިބޭނެއެވެ. ލީގުގައި މި ދެޓީމް ވާދަކުރާ ފޯރިގަދަ މެޗުވެސް ބާކީ އެބައޮތެވެ.
