މިދިޔަ ޓްރާންސްފަރގައި ބާސެލޯނާއާއި ޔުނައިޓެޑުން ހުށަހެޅުން ލިބުނު: ރިޗާލިސަން
މިދިޔަ ޖެނުއަރީ ޓްރާންސްފަރގައި ސްޕެއިންގެ ބާސެލޯނާއާއި އިނގިރޭސި ކުލަބު މެންޗެސްޓަރ ޔުނައިޓެޑުން ހުށަހެޅުން ލިބުނުކަމަށް އެވަޓަންގެ ބްރެޒިލް ފޯވާޑް ރިޗާލިސަން ބުނެފިއެވެ.
ޕްރިމިއަރ ލީގުގެ އެވަޓަންއަށް 2018ގައި ބަދަލުވި ފޯވާޑަކީ މިހާރު އެކުލަބުގެ އެންމެ މުހިންމު ކުޅުންތެރިޔާއެވެ. އެވަޓަންގައި ދެއްކި މޮޅު ކުޅުމާއިއެކު ރިޗާލިސަންއަށް ބްރެޒިލްގެ ޤައުމީ ޓީމުން ޖާގަ ލިބުނުއިރު، ބްރެޒިލްއާއިއެކު 2019ގެ ކޮޕަ އެމެރިކާވެސް އޭނާވަނީ އުފުލާލާފައެވެ.
ރިޗާލިސަން ގަންނަން ބާސެލޯނާއިން 100 މިލިއަން ޔޫރޯގެ ބިޑެއް ކުރިމަކަށް މިދިޔަ ޖެނުއަރީ މަހު މީޑިޔާތަކުން ރިޕޯޓްކުރިއެވެ. ނަމަވެސް އެކަމާއި ގުޅިގެން ކުޅުންތެރިޔާވެސް އަދި އެޖެންޓްވެސް ވާހަކަދައްކާފައެއް ނުވެއެވެ.
ދާދިފަހުން އިނގިރޭސި ނޫސްތަކަށް ދިން އިންޓަވިއުއެއްގައި ރިޗާލިސަން ބުނީ ބާސެލޯނާއިން ބިޑުކުރި ވާހަކައަކީ ތެދެއްކަމަށާއި، އެވަޓަންއިން އެ ހުށަހުޅުން ގަބޫލު ނުކުރީ ކަމަށެވެ. ބާސެލޯނާ ކަހަލަ ކުލަބަކުން ހުށަހެޅުން ލިބުމުން ހުރީ އާޝޯހުވެފައި ކަމަށް ވެސް އޭނާ ބުންޏެވެ.
"ބާސެލޯނާއިން ހުށަހެޅުން ލިބުނީމަ ހިތަށްއެރި ރަނގަޅަށް ކުޅެވޭތީ އެކަހަލަ ކުލަބަކުން ފުރުސަތު ލިބޭނީ. ސީޒަންގެ މެދުތެރެއިންވީމަ އަސްލު އަމިއްލައަށްވެސް ކުލަބު ދޫކޮށްލަން ބޭނުންނުވީ، އެއީ ސަޕޯޓަރުންނަށާއި، ކުލަބަށްދެވޭނެ ވަރަށް ބޮޑު ދެރައެއް."
އޭނާ ބުނީ ބާސެލޯނާގެ އިތުރުން މެންޗެސްޓަރ ޔުނައިޓެޑުންވެސް ހުށަހެޅުމެއް ލިބުނުކަމަށާއި، އިތުރު ކުލަބުތަކުން ވެސް ރަނގަޅު ހުށަހެޅުންތަކެއް ލިބުނުކަމަށެވެ. ނަމަވެސް ބޭނުންވީ އެވަޓަންގައި މަޑުކުރަންކަމަށާއި، މިވަގުތު ކެރިއަރުގައި ރަނގަޅު ހިސާބަކަށްދެވޭނީ މި ކުލަބުގައި މަޑުކޮށްގެން ކަމަށް ވެސް އޭނާ ބުންޏެވެ.
23 އަހަރުގެ ރިޗާލިސަންއަކީ އެކުލަބު ސަޕޯޓަރުންގެ ފޭވަރިޓެކެވެ. ފުރަތަމަ ސީޒަންގައި 13 ގޯލު އެކުލަބަށް ޖަހައިދިން ފޯވަޑްވަނީ މި ސީޒަންގައި މިހާތަނަށް 10 ގޯލް ޖަހާފައެވެ.
