ސީރިޔާގެ ޔަތީމް ކުދިންނަށް ދީލަތި ދިވެހިން ކިޔަވައިދޭ އަލޫކާ މަދަރުސާ ،ކުޑަކުޑަ ޚަރަދަކުން ޔަތީމު ކުއްޖަކަށް ކިޔަވައިދިނުމުގެ ފުރުސަތު
މީގެ ނުވަ އަހަރު ކުރިއްސުރެ ސީރިއާގައި ހިނގަމުންދާ ހަމަނުޖެހުމުގެ ސަބަބުން އެތައް މުސްލިމުންނެއް ވަނީ ބިކަވެފައެވެ. ފިރިން ޝަހީދުވެ ، އެތައް އަނބިންނެއް ވަނީ ނިކަމެތިވެފައެވެ. އެތައް ކުޑަކުދިންނެއް ވަނީ އާއިލާއާއި ވަކިވެ ބިކަވެފައެވެ. ރެފިޔުޖީ ކޭމްޕްތަކާއި އެތަންމިތާގައި ދިރިއުޅޭ އެތައް ހާސް ކުދިން ، ބަނޑު ފުރާނަ މުއްތިކޮށް ، އެެހެނިހެން ޒުރޫރީ ބޭނުންތައް ފުއްދަނީ އެކި ފަރާތްތަކުގެ އެހީގައެވެ. މި ގޮތުން މިފަދަ ކުދިންނަށް ތަޢުލީމް ފޯރުކޮށްދިނުމުގެ މަޤުޞަދުގައި ސީރިއާގެ އިދްލީބްގައި ދިވެހިން ވަނީ މަދަރުސާއެއް ޤާއިމް ކޮށްފައެވެ.
އިންޓަނޭޝަނަލް އެއިޑް ކެމްޕޭން (އައިއޭސީ) ގެ އިސްނެގުމުގެ ދަށުން ދިވެހި ރައްޔިތުންގެ އެހީތެރިކަމާއިއެކު ޤާއިމްކޮށް ހިންގާ އަލޫކާ ނަމަކަށް ކިޔާ މި މަދަރުސާގައި އެކި އުމުރުފުރާގެ ކުދިންނަށް ތަޢުލީމް ފޯރުކޮށްދެއެވެ. މި މަދަރުސާގައި ތަޢުލީމް ހާސިލްކުރާ 249 ދަރިވަރެއްގެ ކިޔެވުން ވަނީ ސީދާ ދީލަތި ދިވެހިން ވަނީ ސްޕޮންސަރ ކޮށްފައެވެ.
2019 ވަނަ އަހަރުގެ މާރޗް މަހުގެ 17 ވަނަ ދުވަހު ރަސްމީކޮށް ކިޔަވައިދޭން ފެށި މަދަރަސަތުލް އަލޫކާގައި ތަޢުލީމް ހާސިލް ކުރަމުންދާ ދަރިވަރުންގެ ތެރޭގައި ޔަތީމް ކުދިންނާއި، ހަނގުރާމައިގެ ސަބަބުން ގެދޮރު ގެއްލި ފަގީރު ހާލަތުގައި ދިރިއުޅެމުންދާ ދަރިވަރުން ހިމެނެއެވެ.
ދުނިޔޭގެ އެކި ކަންކޮޅުތަކުގައި ހާލުގައި ޖެހިފައިވާ މީހުންނަށް އެހީ ފޯރުކޮށްދިނުމަށް ހަރަކާތްތެރިވާ އިންޓަނޭޝަނަލް އެއިޑް ކެމްޕޭން (އައިއޭސީ) އިން ހިންގާ މަދަރަސަތުލް އަލޫކާގައި ތަޢުލީމް ހާސިލް ކުރަމުންދާ ދަރިވަރުންނަށް ސްޕޮންސާރޝިޕް ދިނުމުގެ ފުރުސަތު އެ ޖަމްއިއްޔާއިން ވަނީ ހުޅުވާލާފައެވެ.އެގޮތުން މަދަރަސަތުލް އަލޫކާގައި ތަޢުލީމް ޙާޞިލްކުރާ ދަރިވަރެއްގެ ކިޔެވުމުގެ މަހެއްގެ ޚަރަދު 700 ރުފިޔާއިން ސްޕޮންސަރކޮށް ޞަދަޤާ ޖާރިޔާ ނުވަތަ މަރުވުމަށް ފަހު ވެސް ހެޔޮކަން ލިބިލިބި ހުންނަ ސަދަޤާތެއް ކޮށްލެވިދާނެއެވެ.
މި މަދަރުސާގެ ދަރިވަރެއްގެ ކިޔެވުން ސްޕޮންސަރ ކުރާ ފަރާތްތަކަށް ، އަމިއްލަ ދަރީންގެ ކިޔެވުމުގެ ކަންކަން ބަލާ ފަދައިން އެކުއްޖެއްގެ ކިޔެވުމުގެ ކަންކަން ބެލުމުގެ ފުރުސަތު ވެސް ލިބޭނެއެވެ. އެގޮތުން ސްޕޮންސަރކުރާ ދަރިވަރުގެ ކޮންމެ މަހެއްގެ ކިޔެވުން ކުރިޔަށްދާ ގޮތުގެ އަޕްޑޭޓާއި، ތަފްސީލު ވީޑިއޯ އަދި ފޮޓޯގެ ޒަރިއްޔާއިން ލިބޭނެ އިންތިޒާމް ހަމަޖެހިފައިވެއެވެ.
މަދަރަސަތުލް އަލޫކާގައި ގްރޭޑް 1 އިން ފެށިގެން ގްރޭޑް 6 އާއި ހަމަޔަށް ހިސާބު، އިނގިރޭސީ، ޕީ.އީ، ޕީ.އޭ، އަރަބި އަދި ޤުރުއާން ކިޔަވައިދެއެވެ. މި މަދަރުސާގައި 7 ކްލާސް ރޫމް ހިމެނޭއިރު، ކުދިން ނަމާދު ކުރާނެ ކޮޓަރިއެއް ވެސް ވަނީ ހަދާފައެވެ. ހަމައެހެންމެ، ކުދިންނަށް ކުޅެލަން ނިކުމެވޭ ގޮތަށް ކޮމްޕައުންޑެއް ވެސް އޮވެއެވެ. މި މަދަރުސާގެ މަސައްކަތް ކުރަމުންދާ ގަޑިތަކަކީ ހެނދުނު 10:00 އިން މެންދުރު 12:00 އަށް އަދި މެންދުރު 14:00 އިން 16:00 އަށެވެ.
މަދަރަސަތުލް އަލޫކާގެ މަޢުލޫމާތު ހޯއްދަވަން ބޭނުންވާ ފަރާތްތަކަށް އަދި ކުދިން ސްޕޮންސަރ ކުރައްވަން ބޭނުންވާ ފަރާތްތަކުން 7322112 ނަމްބަރު ފޯނާއި ގުޅުއްވުމުން އެކަން ހަމަޖެހިގެން ދާނެއެވެ. ހަމައެހެންމެ އައިއޭސީގެ (ފޭސްބުކް ޕޭޖް) އިން ވެސް އިތުރު މައުލޫމާތު ސާފުވެ ވަޑައިގަންނަވާނެއެވެ. މީގެއިތުރުން،މަދަރަސަތުލް އަލޫކާގެ (ފޭސްބުކް ޕޭޖް) އިން ވެސް އެމަދަރުސާގެ ހަރަކާތްތައް ބައްލަވާލެއްވޭނެއެވެ.
ދިވެހި ރައްޔިތުން ސްޕޮންސަރ ކޮށްދީފައިވާ ދަރިވަރުންނަށް ނިމިދިޔަ ރަމަޟާން މަހު ޚާއްޞަ ކާބޯތަކެތީގެ ޕެކޭޖެއް ވެސް ފޯރުކޮށްދީފައިވެއެވެ. ހަމައެހެންމެ މި ސްކޫލުގެ ދަރިވަރުންނަށް ޢީދު ހަދިޔާގެ ގޮތުގައި އައު ހެދުން ވެސް ފޯރުކޮށްދީފައި ވެއެވެ. މި ހުރިހާ ހަރަކާތެއްގެ ފޮޓޯ އައިއޭސީން ވަނީ ކުދިން ސްޕޮންސަރުންނާއި ހިއްސާކޮށްފައެވެ.
އައިއޭސީން ޤާއިމްކުރި މި މަދަރުސާ ހިންގުމަށް ދުނިޔޭގެ އެކި ކަންކޮޅުތަކުން ސްޕޮންސާރ ލިބިފައިވީ ނަމަވެސް އެންމެ ބޮޑު އެހީތެރިކަމެއް ލިބިފައިވާނީ ދިވެހި ރައްޔިތުންގެ ފަރާތުންނެވެ.
އަހަރެމެންގެ ކޮންމެ މީހަކު ވެސް އެމީހެއްގެ ދަރިއަކާމެދު ވިސްނަމުއެވެ. މީރު ކާއެއްޗެހި ދީ ، ބޭނުންވާ ކޮންމެ ކަމެއް ކޮށްދިނުމުގައި މި ތިބެނީ ތައްޔާރަށެވެ. ދަރިންގެ ދުލުން ބަސް ބުނާހާ އަވަހަކަށް އަހަރެމެން އެކަން ކޮށްދެމުއެވެ. ވީމާ ، ނިކަމެތި މުސްލިމް ކުއްޖެއް ވެސް ތިބާގެ އާއިލާގެ ތެރޭގައި ހިމެނުއްވުން ކީއްތޯއެވެ. ގާތުގައި ނެތް ނަމަވެސް އަމިއްލަ ދަރިއެއް ފަދައިން ކިޔަވައިދީ ސުކޫލުގެ ޤުުރުއާން މުބާރާތާއި ކޮންސެޓްފަދަ ހަރަކާތްތަކުގައި އެހީތެރިވެދީ ޢީދު ހަދިޔާ ދިނުން ފަދަ ކަންކަން ކުރުމުގެ ފުރުސަތު އައިއޭސީން އެވަނީ ފަހިކޮށްދީފައެވެ.
ޞަދަޤާ ޖާރިޔާގެ މި މުހިންމު ހަރަކާތުގައި ބައިވެރިވުމުކީ އުފަލެއް ކަމުގައި ދެކެމާ ހެއްޔެވެ؟
