އެމްޑީޕީއަށް ވޯޓު ދޭންވީ މުނިފޫހިފިލުވުމަށް ޖާގަ ތަނަވަސްކުރުމަށް: ފާޠިހު
ކުރިއަށް އޮތް ކައުންސިލް އިންތިޚާބުގައި އެމްޑީޕީއަށް ވޯޓު ދޭން ޖެހެނީ، ކުޅިވަރާއި، މުނިފޫހިފިލުވުމާއި، ހުނަރުން ކުރިއަރައިދާ އުފެއްދުންތެރި، ޒުވާން ޖީލެއް ބިނާ ކުރުމަށް ބޭނުންވާ ޖާގަ ތަނަވަސް ކުރުމަށް ކަމަށް އެޕާޓީން ބުނެފިއެވެ.
ކެންޕޭންގެ ސްޕޯސްޕާރސަން މުޙައްމަދު ސައިފް ފާތިޙް މިހެން ވިދާޅުވެފައި ވަނީ ކައުންސިލް އިންތިޚާބާ ގުޅޭގޮތުން އޮންލައިންކޮށް ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.
ފާތިޙް ވިދާޅުވީ މަރުކަޒީ ސަރުކާރުގެ އަތްދަށުން ބާރުތައް ވީއްލައި، ލާމަރުކަޒު ކުރުމުގެ ހުވަފެނަކީ ދިވެހި ރައްޔިތުންގެ ޙައްޤުގައި އެމް.ޑީ.ޕީއިން ދުށް ހުވެފެނެއް ކަމަށެވެ. އަދި ލޯކަލްކައުންސިލްގެ އިންތިޚާބު ކޯވިޑްގެ ބަލިމަޑުކަމުގެ ބިރުގައި ދިވެހި ރައްޔިތުންގެ ސަލާމަތާއި ރައްކާތެރިކަމަށް ޓަކައި ފަސްކުރަން ޖެހުމާއެކު އައު ލާމަރުކަޒީ ނިޒާމު ގެނެސްދިން ގިނަ ބާރާއި ބޮޑެތި އިޚްތިޔާރުތައް ބޭނުން ނުހިފޭ ގޮތަށް ކައުންސިލްތަކުގެ ދައުރު ދަންމަން ޖެހުނު ކަމަށެވެ.
އަދި ކުރިއަށް އޮތް ލޯކަލް ކައުންސިލް އިންތިޚާބުގައި ތިލަފަތަށް ވޯޓު ދެއްވާއިރު އެ ވޯޓު ދެއްވެނީ ކުޅިވަރާއި މުނިފޫހިފިލުވުމާއި ހުނަރުން ކުރިއަރައިދާ އުފެއްދުންތެރި ޒުވާން ޖީލެއް ބިނާކުރުމަށް ބޭނުންވާ ޖާގަ ތަނަވަސް ކުރުމަށް ކަމަށެވެ. އަދި ޒުވާނުންނަށް މިއުޒިކު ކުޅެ އަޑުއެހޭނެ ޖާގަތަކެއް ނެތްކަމާއި މިއުޒިކީ ފަންނުގައި ކުރިއަށް ދިއުމަށް ބޭނުންވާ ތަމްރީނާއި ތަޢުލީމު ފުރުސަތު އަދި ރެކޯޑިންގް ސްޓޫޑިއޯ އުފެއްދުމުގެ ބާރު ލިބިގެންވަނީ ލޯކަލް ކައުންސިލުތަކަށް ކަމަށެވެ.
ފާތިޙް މިހެން ވިދާޅުވެފައި ވަނީ މާލޭގައި ޒުވާނުން ހިތްފަސޭހަ ކޮށްލައި މުނިއަވަސް ފިލުވައި ހާސްކަމެއް ނެތި މަޖާކޮށް މިއުޒިކު ކުޅެ މިއުޒިކު އަޑުއަހައި ނަށާލާނެ މަރުކަޒެއް ޤާއިމު ކުރުމަށް ގޮވައިލާ ރައްޔިތުންގެ މަޖިލިހުގެ ހެންވޭރު ހުޅަނގު ދާއިރާ މެންބަރު ޙަސަން ލަޠީފު ހުށަހެޅުއްވި ޤަރާރާއި ގުޅިގެންނެވެ.
