ތިނަދޫން ނެގި ރެންޑަމް ސާމްޕަލްތަކުން މީހަކު ކޮވިޑަށް ފައްސި ވެއްޖެ
ތިނަދޫން ނެގި ރެންޑަމް ސާމްޕަލްތަކުން މީހަކު ކޮވިޑަށް ފައްސި ވެއްޖެއެވެ.
ގދ.ތިނަދޫ ޑރ.އަބްދުއްސަމަދު މެމޯރިއަލް ހޮސްޕިޓަލުން ބުނީ ކޮވިޑް-19 ވައިރަސް ފެތުރިފައިވާ މިންވަރު ދެނެގަތުމަށްޓަކައި 07 ފެބްރުވަރީ 2021 ގައި ނެގުނު ރެންޑަމް ސާމްޕަލްއެއް ކޮވިޑް-19 އަށް ފައްސިވެފައިވާ ކަމަށެވެ.މިއާއެކު ފައްސިވި މީހާގެ ކޮންޓެކްޓް ޓްރޭސިންގެ މަސައްކަތް މިހާރު ފަށާފައި ވާ ކަމަށް ވެސް އެ ހޮސްޕިޓަލުން ބުނެއެވެ.
މީގެ ކުރިން އައްޑޫން ތިނަދުއަށް ދިޔަ މީހަކު ކޮވިޑް-19 އަށް ފައްސިވުމާ ގުޅިގެން އެ ރަށް ވަނީ މޮނިޓަރިން އަށް ލެވިފައެވެ.
ތިނަދޫ މޮނީޓަރިން އަށް ލާފައިވަނީ ބަލި އޮތްތޯ ބަލައި، ކޮންޓެކްޓް ޓްރޭސިން ހެދުމަށެވެ. މި ހާލަތުގައި އެރަށަށް އަރައި ފޭބުން މަނާ ވާނެއެވެ.
ކޮވިޑް 19 ރާއްޖޭގައި ފެތުރުން ކޮންޓްރޯލު ކުރުމަށް މިމަހުގެ ހަތަކުން ފެށިގެން މީހުން ދިރިއުޅޭ ހުރިހާ ރަށެއްގައި މާސްކު އެޅުން މަޖުބޫރުކޮށް އެކަން ތަންފީޒު ކުރަން ވަނީ ނިންމައިފައެވެ.
މީގެ އިތުރުން ހާއްސަ ހުއްދައިގެ ދަށުން ރަށްރަށަށް ދާ މީހުންވެސް 72 ގަޑިއިރު ހަމަނުވާ ޕީސީއާރު ޓެސްޓެއް ހަދައިގެން ނޫނީ ދަތުރު ނުކުރެވޭ ގޮތަށް ވަނީ ބަދަލު ކޮށްފައެވެ.
