ދީނުގެ ހުކުމްތައް ބަޔާން ކުރުމަކީ ޢިލްމުވެރިންގެ ޒިންމާއެއް: އިސްލާމިކް މިނިސްޓްރީ
އިސްލާމްދީނުގެ ހުކުމްތައް ބަޔާންކުރުމަކީ، ޢިލްމުވެރިންގެ ޒިންމާއެއް ކަމުގައި އިސްލާމިކް މިނިސްޓްރީން ބުނެފިއެވެ.
މިއުޒިކަކީ އިސްލާމް ދީނުގައި ހަރާމް އެއްޗެއް ކަމަކަށް މި ޒަމާނުގެ ދީނީ އިލްމުވެރިންނަށް ކަނޑައެއް ނޭޅޭނެ ކަމަށް މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ ވިދާޅުވުމާ ގުޅިގެން، އިސްލާމިކް މިނިސްޓްރީން ބުނީ އިސްލާމް ދީނުގެ ހުކުމްތަކަށް އިހްތިރާމްކޮށް މަތިވެރިކުރުމަކީ ކޮންމެ މުސްލިމެއްގެ މައްޗަށް ވާ ވާޖިބެއް ކަމަށެވެ.
ދީނުގެ ހުކުމްތައް ބަޔާންކުރުމަކީ ދީނުގެ އިލްމު އުނގެނިގެން ތިބި، ދީނީ ނަސޭހަތް ދިނުމާއި ވައުޒު ބުނުމުގެ ހުއްދަ ލިބިފައިވާ އިލްމުވެރިންގެ ޒިންމާއެއް ކަމަށް ވެސް އެމިނިސްޓްރީން ވަނީ ބުނެފައެވެ.
އިމްތިޔާޒް މިހެން ވިދާޅުވީ، މާލޭގައި ޒުވާނުންނަށް ފަސޭހަކަމާއެކު މިއުޒިކް އަޑުއަހާލާ އެކުވެރިންނާ ބައްދަލުކޮށްލައި، ހާސްކަމުން ބޭރުގައި އުފާވެރި މާހައުލެއްގައި ހީ ސަމާސާކޮށް މަޖާކޮށްލާ އެއްވެ ތިބެވޭނެ ފަދަ މަރުކަޒެއް ގާއިމްކޮށްދިނުމަށް ސަރުކާރަށް ގޮވާލައި ހެންވޭރު ހުޅަނގު ދާއިރާގެ މެމްބަރު އަދި އެމްޑީޕީގެ ޗެއާޕާސަން ހަސަން ލަތީފް ހުށަހެޅުއްވި ގަރާރަށް ބަހުސް ކުރައްވަމުނެވެ.
އެގޮތުން އިމްތިޔާޒް ވިދާޅުވީ ރޮކް މިއުޒިކަކީ ހަރާމް އެއްޗަކަށް ވާން ޖެހޭނެ ކަމަށާއި މަނާ ކުރެވެން ޖެހޭނެ ކަމަށް ދީނީ އިލްމުވެރިއެއް ކަމަށް ބުނާ ބޭފުޅަކު ވިދާޅުވެފައިވާ ކަމަށެވެ.
"ރޮކް މިއުޒިކަކީ ހަރާމް އެއްޗެއް ކަމަށް އިލްމުވެރިއަކަށް ބުނެވެންވީ ކިހިނެއްތޯ؟ އަދި އެހެން ބައެއް މިއުޒިކަކީ ވެސް ހަރާމް އެއްޗެއް ކަމަށް ދައްކަން އެބަ މަސައްކަތް ކުރޭ، އަދި މި ގައުމުގައި މިއުޒިކް ކުޅޭ ޒުވާން ފަންނާނުންނަށް ހުރަސް އެޅުމަށް ވެސް އެބަ މަސައްކަތް ކުރަމުންދޭ. އެ ޒުވާނުން ހުރަސް އަޅަން ކުރާ ކަންކަމަށް ދައުލަތުން ފުރުސަތު ދީގެން ނުވާނެ" އިމްތިޔާޒް ވިދާޅުވިއެވެ.
އާޓިސްޓުންގެ އަގު ވަޒަންކުރަން ޖެހޭނެ ކަމަށް ވެސް އިމްތިޔާޒު ވިދާޅުވިއެވެ.
Ads by STO
