ރަޒީގެ ޑިޒައިނަރ މާސްކުތަކާއެކު ހީނުކުރާފަދަ ތުހުމަތުތަކެއް!
ރަޒީނާ ތައުފީޤް ނުވަތަ އާއްމުން ދަންނަ ނަމުންނަމަ "ރަޒީ" އަކީ ނަން މަޝްހޫރު ފެޝަން ޑިޒައިނަރުންގެ ތެރެއިން ގުނާލެވޭ އެކަކެވެ.
ގިނަ ފިލްމީތަރިންނާއި އެހެން ފަންނާނުންގެ ލޯބިވެސް ލިބިގެންވާ ރަޒީ އަކީ، އޭނަގެ ރީތި ހެދުންތަކުން ގިނަ ބަޔަކު އާޝޯޚު ކޮށްލާފައިވާ "ޑިޒައިނަރ ރަޒީ" ބުޓީގްގެ ފައުންޑަރ ވެސް މެއެވެ.
ކޮވިޑްގެ މިދުވަސްވަރާއި ދިމާކޮށް އެކިމީހުން އަންނަނީ ތަފާތު އެކި ގޮތްގޮތަށް މާސްކު ފަހަމުންނެވެ. އެފަދަ ޑިޒައިނަރ މާސްކުތަކެއްގެ ކަލެކްޝަނެއް ރަޒީވެސް ވަނީ ދާދި ފަހުން އުފައްދާ އާއްމުކޮށްފައެވެ.
ނަމަވެސް އެއާއެކު ރަޒީއާއި ބެހޭގޮތުން މީސްމީޑިއާގައި ފެތުރެމުން ދިޔައީ މުޅިން ތަފާތު ވާހަކަތަކެކެވެ. ކައިވެނީގެ ހެދުމެއް ފަހަން ރަޒީއާއި ހަވާލުކުރުމުން، ބުނި ދުވަސް ޖެހެން ކައިރިވީއިރު ހެދުމުގެ މަސައްކަތް ވެސް ނުފެށުމުގެ އިތުރުން އެޑްވާންސްކޮށް ކަސްޓަމަރު ދިން 5000 ރުފިޔާވެސް އެެއިރު ނުދިން ވާހަކައެވެ.
ތުހުމަތު ކުރި ފަރާތުން ބުނެފައިވަނީ އެޑްވާންސްކޮށް ފައިސާ ނަގާފައި ކޮވިޑްގެ ކަންތައްޖެހުމުން ރަޒީގެ އައުޓްލެޓް ބަންދު ކޮށްފައިވާ ކަމަށް ވެސް ބުނި ކަމަށެވެ. އަދި އެޑްވާންސް ފައިސާގެ ރީފަންޑު ދޭން ބުނުމުން އެފަދައިން ދެވެން ނެތް ކަމަށާއި ރަޒީ ނުދޭ ޚިދުމަތެއްގެ ޖީއެސްޓީ ނަގަން އުޅުނު ކަމަށް ވެސް ބުނެފައިވެއެވެ.
މިހާރު އެފައިސާ އަނބުރާ ރައްދުކޮށްފައިވީ ނަމަވެސް، އެދިނީ ފުލުހަށް މައްސަލަ ޖެއްސުމުން ކަމަށް ބުނާ ކަމަށް ރަޒީ ބުނެފައިވެއެވެ.
މިކަމާއި ގުޅިގެން ރަޒީ މިއަދު ވަނީ އޭނަގެ ފޭސްބުކް ޕޭޖު މެދުވެރިކޮށް އެތުހުމަތުތަކަށް ރައްދު ދީފައެވެ. ރަޒީ ބުނީ އެޑްވާންސްކޮށް ނެގި 5000 ރުފިޔާއަކީ އެހެދުން ތައްޔާރު ކުރުމަށް ބޭނުންވާ ތަކެތި ގަތުމަށް ނެގުނު ފައިސާ ކަމަށާއި ޖުމްލަ އަގަކީ 10،600 ރުފިޔާ ކަމަށެވެ.
ހެދުން ނުފެހި ލަސްވީ ކޮވިޑް ގެ ހާލަތާއި ގުޅިގެން ކަމަށާއި ރަޒީގެ މުވައްޒިފަކުވެސް މިބައްޔަށް ފައްސިވި ކަމަށް ރަޒީ ބުނެފައިވެއެވެ. އެހެން ކަމުން ރަޒީ ދިރިއުޅޭގެ ވެސް އެއިރު ހުރީ މޮނީޓަރިންގެ ހާލަތުގައި ކަމަށް ރަޒީ ބުނެފައިވެއެވެ. އަދި ފައިސާ އަނބުރާ ދިނީ ފުލުހަށް މައްސަލަ ޖެއްސުމުން ކަމަށް ބުނާ ބުނުން ރަޒީ ވަނީ ދޮގުކޮށްފައެވެ.
ރަޒީގެ ރައްދަށްވެސް، ތުހުމަތުކުރި ފަރާތުން ރައްދު ދިނެވެ. އެގޮތުން ބުނެފައިވަނީ ރަޒީމެން ދިރިއުޅޭ އިމާރަަތުގައި އުޅޭ އެހެން ބަޔަކު މައުލޫމާތު ދީފައިވާ ގޮތުގައި، ރަޒީމެން ގެ މޮނީޓަރިންގެ ހާލަތަށް އެއްވެސް އިރަކު ނުލާކަމަށެވެ.
Ads by STO
