ރާއްޖޭގައި މިއަދު އޮތީ "ޕޯން" އިކޮނޮމީއެއް: ބޮންޑެ
ރާއްޖޭގައި މިއަދު އޮތީ "ޕޯން" އިކޮނޮމީއެއް ކަމަށް މާފަންނު މެދު ދާއިރާގެ މެންބަރު އިބްރާހިމް ރަޝީދު (ބޮންޑޭ) ވިދާޅުވެއްޖެއެވެ.
ބޮންޑޭ ވިދާޅުވީ ދައުލަތުގެ ބަޖެޓުން ހޭދަކުރާ ބޮޑު ބައެއް އިންޓަރނެޓަށް ހޭދަ ކުރަންޖެހޭއިރު، އޮރިޔާން ސައިޓުތަކަށް ވަނުމާއި، އޮރިޔާން ސައިޓުތަކުގައި ހުންނަ މަންޒަރާއި ވީޑިއޯ ބެލުމަކީ ސަރުކާރުގެ ވުޒާރާތަކުގެ މެދުގައި އާންމު ކަމެއް ކަމަށެވެ.
މީގެ އިތުރުން މިފަދަ ސައިޓުތަކަށް ވަންނަ މީހުންގެ ނިސްބަތުން އެންމެ ގިނައީ ސަރުކާރުގެ ވުޒާރާތަކުން ކަން ފާހަގަ ކުރައްވައި ބޮންޑޭ ވިދާޅުވީ ޖިންސީ ފުރައްސާރައިގެ އަމަލުތަކާއި، ޖިންސީ ގޯނާގެ މައްސަލަތައް އެ މިނިސްޓްރީތަކުގައި ގިނަވެފައިވާ ކަމަށެވެ.
އިސްލާމިކް މިނިސްޓްރީން ވެސް މި ތަންތަނަށް ވަންނަ ކަމަށް ވެސް އޭނާ ވިދާޅުވިއެވެ.
"އިސްލާމިކް މިނިސްޓްރީގެ ވެބްސައިޓްތައް ބަލާ ކޯއްޗަކަށްތޯ ވަންނަނީ. އެތަންތަނަށް ވަދެފައި ޖިންސީ ފުރައްސާރަކޮށްފައި އެހުރިހާ ކަމެއް އެބަކުރޭ. ޕޯން ސައިޓުތަކަށް އެބަވެދެވޭ. ބައްލަވާ ޕޯން ސައިޓުތަކަށް ވަންނަނީ. ދައުލަތުން އެބަޖެހޭ 200 މިލިޔަން ރުފިޔާ ޚަރަދުކުރަން މިކަމަށް." ބޮންޑެ ވިދާޅުވިއެވެ.
ބޮންޑެ އިތުރަށް ވިދާޅުވީ ރާއްޖޭގައި އޮތީ އިޤްތިޞާދީ ފްރީ މާކެޓެއް ނޫން ކަމަށާއި، ރާއްޖޭގައި އޮތީ “ޕޯން” އިކޮނޮމީއެއް ކަމަށެވެ. އަދި މިކަމުގެ ޒިންމާ ސަރުކާރުގެ އިސްވެރިން ނަންގަވަން ޖެހޭނެ ކަމަށް ވެސް އޭނާ ވިދާޅުވިއެވެ.
