ފޮޓޯގްރާފަރ ޤައިޝްގެ އެކައުންޓު ހެކްކޮށް، އޭގެން މީހުންނާ ބަދު އަޚްލާގީ ވާހަކަ ދައްކަނީ!
ފޮޓޯގްރާފަރ އަލީފް ގެ އިންސްޓަގްރާމް އެކައުންޓް ހެކްވެ، އެއެކައުންޓު އަލުން ލިބުނު ޚަބަރު އަޅުގަނޑުމެން ލިޔުނުތާ މާގިނަ ދުވަހެއް ނުވެ، ރާއްޖޭގެ އެހެން ފޮޓޯގްރާފަރެއްގެ އިންސްޓަގްރާމް އެކައުންޓު އަނެއްކާވެސް މިވަނީ ހެކް ވެފައެވެ.
އުމުރުން އެންމެ 15 އަހަރުގެ އިބްރާހިމް ޤައިޝް އަންވަރުގެ ރަސްމީ އިންސްޓަގްރާމް އެކައުންޓު "ޤައިޝް ފޮޓޯގްރަފީ" ހެކްވެފައިވަނީ އިއްޔެ ހަވީރު ކަމަށް "ދެން" އަށް މައުލޫމާތު ދެމުން އޭނާ ބުންޏެވެ.
"އިއްޔެ ހަވީރު ހެކް ވެފަ އިނީ. އަޅުގަނޑު ދުވަންދަން ކޮންމެ ދުވަހަކުވެސް ހަވީރު ގަޑީގަ. އިއްޔަ ދުވަސް ގޮސްފަ އައި އިރު ޕްރޮފައިލް ފޮޓޯއަށް ހުރީ ނޭކެޑް އަންހެނެއްގެ ފޮޓޯލާފަ. ދެން ފީޑްއަށްވެސް އިން ނޭކެޑް ފޮޓޯއެއްލާފަ. ދެން އޭގަ ތިބި މީހުންނަށް މެސެޖްކޮށްފަ ހުންނަނީ 'ޑީއެމް މީ ފޮ ނޫޑްސް' އޭ ޖަހާފަ. އަޅުގަނޑުގެ ބައްޕަ އަށްވެސް މެސެޖުކުރި، އެއިރު އަޅުގަނޑު ހުރީ ބައްޕަ ކައިރީގަ" ޤައިޝް ބުންޏެވެ.
ާޤައިޝް އޭނާގެ އެކައުންޓު އަލުން ހޯދޭތޯ މަސައްކަތް ކުރުމުން، އޭނަގެ އަމިއްލަ އެކައުންޓަށް ހެކަރ މެސެޖު ކުރި ވާހަކަ ވެސް ބުންޏެވެ.
"ބުނީ މާ ފުއްޕަންޏާ އެކައުންޓު ޑިލީޓޭ ކޮށްލާނީ. ދެން އެކައުންޓު އެއިން ގޮތަށް ބައިންދާފަ އިންދާ ރޭގައި ބައްޕައަށް މެސެޖު ކޮށްފަ ބުނީ އެކައުންޓު އަނބުރާ ލިބޭނީ މިވެނި ވަރަކަށް ލާރި ދިނީމައޭ. ބުނަނީ 3000 ނޫނީ 5000 ރުފިޔާވަރު ދިނީމައޭ އެކައުންޓު އަނބުރާ ލިބޭނީ." ޤައިޝް ބުންޏެވެ.
އިންސްޓަގްރާމް އެކައުންޓު އިންނާނީ "ޓޫ ސްޓެޕް އޯތެންޓިކޭޝަން" ހަދާފަ ކަމަށާއި އޭނާގެ އެކައުންޓު ހެކްވީ އެހެން މީހަކު އޭނަގެ އެކައުންޓުން ސްޕޭމް ލިންކެއް ހުޅުވުމުން ކަމަށް ވެސް ޤައިޝް ބުނެފައިވެއެވެ.
"އެކައުންޓް ހެކްކުރި މީހާ ބުނީ އަޅުގަނޑާއި އެކީ ވަރަށް އެއްކޮށް އުޅޭ މީހަކު ބުނެގެން އޭނައަށް ކޮށްދޭ ހެޔޮކަމެކޭ މިއީ. އޭނަ ކާންބޯން ކުރާ މަސައްކަތަކީ މީހުންގެ އެކައުންޓު ކޮޅުމޯ ބުނަނީ. އެއީ ކާކު ކަމެއް އެއްވެސް ގޮތަކަށް ނުބުނޭ، އެއްވެސް މައުލޫމާތެއް ނުދޭ" ޤައިޝް ބުންޏެވެ.
ފޮޓޯ ނެގުމުގައި ޤައިޝް އުޅޭތާ މިވީ އަހަރެކެވެ. ފްރީލޭންސަރެއްގެ ގޮތުގަައި އުޅެފައި މިހާރު އޭނާ "ވަގުތު" ނޫހަށްވެސް ފޮޓޯ ނަގާދެއެވެ. މިދުވަސްކޮޅުގައި ޤައިޝްގެ އެކައުންޓު ހެކްވެފައިވުމުން އެކަން އޭނަގެ ފޮލޯވަރުންނަށް އަންގަމުން އޭނާ ބުނީ އެކައުންޓް އަނބުރާ ހޯދުމުގެ މަސައްކަތް ވެސް ކުރަމުން އަންނަ ކަމަށެވެ.
"ފުލުހުންނަށް ގުޅާލިން. ގުޅާލީމަ އެމީހުން ބުނީ ތިހެން ވަކި ފަރާތެއް ނޭނގެނީސް ވަރަށް އުނގަދޫވާނެއޭ ކަމެއް ކުރަން. އެހެންވީމަ ބަލާލާށޯ ރިކަވަރ ވޭތޯ. އިންސްޓަގްރާމަށް ވެސް މެއިލް ކުރިން އެކަމަކު އަދި ޖަވާބެއް ނުލިބޭ. އަޅުގަނޑުމެން އޭގެ ޕާސްވޯޑް ބަދަލު ކޮށްލިން. އެކަމަކު ބަދަލު ކޮށްލީމަ އޭނަ އަނެއްކާ އަޅުގަނޑުގެ ފޯނު ތެރެއަށް ވަންނަނީ. ސްކޭމް ލިންކެކޯ އެއީ. ގިނަ މީހުން ބުނަނީ އެއްކޮށް އުޅުނު ކުއްޖެއް އަތައް ފޯނު ދީފަ އޮއްވާ އޮތީ އެލިންކަށް ފިތާލާފައޭ. އެހެންވެ އޮޓޯއިން ލޯޑް ވެފައޭ އެއިންނަނީ" ޤައިޝް ބުންޏެވެ.
ޤައިޝް ގެ ރަސްމީ އެކައުންޓުގައި ވަރަށް ގިނަ ގެސްޓްހައުސްތަކަށް ނަގާދިން ފޮޓޯތަކާއި ޤައިޝްގެ އުފަން ރަށްކަމަށްވާ އއ. އުކުޅަސް ގެ ބައިވަރު ޕްރޮމޯޝަނަލް ވީޑިއޯތަކާއި ފޮޓޯތައް ވެސް ހިމެނޭނެ ކަމަށް އޭނާ ބުނެފައިވެއެވެ.
ޤައިޝް އެދެނީ އޭނަގެ ފޮލޯވަރުން އޭނައަށް ނުގެއްލުމާއި، އޭނަގެ އެކައުންޓު އަލުން އަނބުރާ ހޯދުމުގައި އެންމެންގެ އެހީތެރިކަމެވެ.
