ރައީސް ޔާމީންގެ ސަރުކާރުގައި ފްލެޓް ދޭން ހެދި ލިސްޓްގައި ގިނައީ އެމްޑީޕީ މީހުން: މުޢިއްޒު
ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް ގެ ސަރުކާރުގައި ފްލެޓު ދޭން ހެދި ލިސްޓުގައި ގިނައީ މިހާރު ސަރުކާރު ހިންގާ މައިޕާޓީ ކަމުގައިވާ އެމްޑީޕީގެ މެންބަރުން ކަމުގައި ކުރީގެ ހައުސިންގ މިނިސްޓަރ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އިދިކޮޅު ޕީޕީއެމް/ޕީއެންސީ ގެ ފަރާތުން މިހާރު ކުރިއަށްގެންދާ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ. މުޢިއްޒު ވިދާޅުވީ ރައީސް ޔާމީންގެ ސަރުކާރުން ފްލެޓު ދިނުމާ ގުޅޭގޮތުން އެންމެ ގިނަ ބަޔަކު ދެއްކި އެއް ވާހަކައަކީ، ރައީސް ޔާމީން ސަރުކާރުގައި ފްލެޓު ދީފައިވަނީ ޕާޓީއަށް ބަލައިގެން ކަމަށެވެ. އެފަދަ އިލްޒާމު އަޅުވާތީ، މިވެރިކަން އައީމަ ފްލެޓު ލިބުނު މީހުން ނިސްބަތްވަނީ ކޮން ޕާޓީއަކަށްތޯ ވަރަށް މަސައްކަތުން ބެއްލެވި ކަމަށް ޑރ. މުޢިއްޒު ވިދާޅުވިއެވެ.
"7000 މީހުންގެ ތެރެއިން 3591 މީހުންނަކީ އެމްޑީޕީ މީހުން. 1959 މީހުންނަކީ ޕީޕީއެމް މީހުން. އެކިއެކި ޕާޓީއަށް ނިސްބަތްވާ 517 މީހުން. ބާކީތިބި 933 މީހުންނަކީ އެއްވެސް ޕާޓީއަކަށް ނިސްބަތް ނުވާ މީހުން. އެހެންވީމަ ކޮބައިތޯ އަޅުގަނޑުމެން ޕީޕީއެމް މީހުންނަށް އިސްކަން ދެވިފަ؟" ޑރ. މުޢިއްޒު ވިދާޅުވިއެވެ.
މީގެއިތުރުން ޑރ. މުޢިއްޒު ވިދާޅުވީ، އެމަނިކުފާނަށް އެމްޑީޕީ ގެ އިސް އެކްޓިވިސްޓެއް އިއްޔެ ވެސް ގުޅި ކަމަށާއި އޭނާގެ ހާލަތު ކިޔައިދެއްވި ކަމަށެވެ.
"އެބޭފުޅާގެ ގެއަށް ގޮސް، އެބޭފުޅާގެ އެނދުމަތީގައި އިނދެގެން އެއްޗެހިތަކެއް ނޯޓުކޮށްގެން ގޮސްފަ، ދިރިއުޅުމުގެ ހާލަތު ރަނގަޅު ވެގެންތޯ ފްލެޓު އަތުލީ." ޑރ. މުޢިއްޒު ވިދާޅުވިއެވެ.
Ads by STO
