ކޮވިޑް ވެކްސިނާ ގުޅޭ ބިލާއެކު ސަރުކާރުން ހުށަހަޅާ 33 ބިލެއް
ރައްޔިތުންގެ މަޖިލީހުގެ އާ ދައުރަށް ސަރުކާރުގެ ފަރާތުން 33 ބިލެއް ހުށަހެޅުމަށް ނިންމާފައިވާ ކަމަށް އެޓާނީ ޖެނެރަލް (އޭޖީ)ގެ އޮފީހުން ބުނެފިއެވެ.
އެ އޮފީހުން ބުނީ މަޖިލީހުގެ މި އަހަރުގެ ފުރަތަމަ ދައުރަށް ސަރުކާރުގެ ފަރާތުން ހުށަހަޅަން ގަސްދު ކޮށްފައިވާ ބިލުތަކުގެ ލިސްޓު ރައީސް އޮފީހުން މަޖިލިހުގެ އިދާރާއަށް ފޮނުވާފައިވާ ކަމަށެވެ.
އޭގެ ތެރޭގައި ކޮވިޑް ވެކްސިން ދިނުމާ ގުޅޭ އުސޫލުތައް ކަނޑައެޅުމުގެ ބިލާއި ނަފުސާނީ ސިއްހަތުގެ ބިލު ހިމެނެއެވެ. އަދި ކޮވިޑު ވެކްސިން ދިނުމާ ގުޅޭ އުސޫލުތައް ކަނޑައެޅުމުގެ ބިލާއި ކާބޯތަކެތީގެ ރައްކާތެރިކަމުގެ ބިލާއި އަބުރާ ބެހުމުގެ ސަބަބުން ލިބޭ ގެއްލުމުގެ ބަދަލު ނަގައިދިނުމުގެ ބިލާއި ކޯޓުތަކުގެ ގާނޫނަށް އިސްލާހު ގެނައުމުގެ ބިލު ވެސް ހިމެނެ އެވެ.
މަޖިލީހުގެ މި ދައުރުގެ ރިޔާސީ ބަޔާން އިއްވާފައިވަނީ މިދިޔަ ބުރާސްފަތި ދުވަހުއެވެ. އަދި މިދިޔަ ހޯމަ ދުވަހުން ފެށިގެން މަޖިލީހުގެ ރަސްމީ ޖަލްސާތައް ވަނީ ފަށައިފައެވެ.
ކޮވިޑުން ރައްކާތެރިވުމަށް ރާއްޖޭގައި ވެކްސިން ޖަހަން ފަށާފައިވާއިރު މިހާތަނަށް މުޅި ރާއްޖެއިން ޖުމްލަ 25،327 މީހުންނަށް ވެކްސިން ދީފައި ވެއެވެ. ނަމަވެސް ވެކްސިން ޖެހުމާ ގުޅޭ ގާނޫނެއް އަދި މިހާތަނަށް ރާއްޖޭގައި އެކުލަވާލެވިފައެއް ނުވެއެވެ.
