ދިޝާއާއެކު "އެކް ވިލަން" އެނބުރި އަންނަނީ
"އެކް ވިލަން" ގެ ދެވަނަ ބައިގެ ފުރަތަމަ ޕޯސްޓަރު ރިލީސް ކޮށްފިއެވެ.
މި ޕޯސްޓަރު މިއަދު ދައްކާލާފައިވާއިރު، ފިލްމު ރިލީޒްކުރާނީ މީގެ 365 ދުވަސް ފަހުން ކަމުގައި ބުނެފައިވެއެވެ. އެއީ އަންނަ އަހަރުގެ ފެބްރުއަރީ މަހުގެ 11 ވަނަ ދުވަހުއެވެ.
އެކް ވިލަންގެ ދެވަނަ ބައިގައި ޖޯން އަބްރަހަމް، އަދިތިޔާ ރޯއި ކަޕޫރު އަދި ދިޝާ ޕަޓާނީ ލީޑު ރޯލުން ފެނިގެންދާނެ ކަމަށް ރިޕޯޓުތައް ބުނެއެވެ.
މޯހިތު ސޫރީ ޑައިރެކްޓް ކުރާ "އެކް ވިލަން" ގެ ދެވަނަ ބައިން މިތަރިން ފެނިގެންދާނެ ކަމަށް ރިޕޯޓުތައް ބުނާއިރު، މިއީ ޖޯން އާއެކު ދިޝާ ފެންނަ ފުރަތަމަ ފަހަރު ކަން ފާހަގަކޮށްލެވެއެވެ.
މީގެ އިތުރުން ބާލާޖީ މޯޝަން ޕިކްޗާޒް އިން މީގެ ކުރި ޓުވީޓެއްގައި "އޭކް ވިލަން 2" އަށް ތާރާ ހަމަޖެހުނުކަން ވަނީ އިއުލާން ކޮށްފައެވެ.
"އޭކް ވިލަން" އަކީ 2014 ގައި އުފެއްދި ވަރަށް ކާމިޔާބު ފިލްމެކެވެ. އެ ފިލްމުގެ ތަރިންނަކީ ސިދާރްތު މަލްހޯތުރާ އާއި ޝްރައްދާ ކަޕޫރު އަދި ރިތޭޝް ދޭޝްމުކް އެވެ.
ދާދި ފަހުން މޯހިތު ވަނީ އަދިތުޔާ ރޯއި ކަޕޫރާއި ދިޝާ ޕަޓްނާ އާއެކު "މަލަންގް" އުފައްދާފައެވެ. އަދި "އޭކް ވިލަން 2"ގައި މި ދެ ތަރިން ބައިވެރިކޮށްފައި ވަނީ އެ ފިލްމުގައި ދެއްކި އެކްޓިންގެ މޮޅު ކަމުން ކަމަށް ވެސް މޯހިތު މީގެ ކުރިން ދީފައިވާ އިންޓަވިއު އެއްގައި ބުނެފައި ވެއެވެ. ނަމަވެސް "އޭކް ވިލަން 2"ގައި އަދިތުޔާގެ ލޯބިވެރިޔާގެ ރޯލު ކުޅޭނީ ތާރާ އެވެ. ދިޝާ ކާސްޓް ކޮށްފައި ވަނީ ޖޯންގެ ލޯބިވެރިޔާގެ ރޯލަށެވެ.
Ads by STO
