ބޯރޑް ގޭމްތަކުން މޮޅުވާނެ އައު އުކުޅެއް ކެޓްރީނާ ދަސްކޮށްފި
ބޮލީވުޑްގެ މަޝްހޫރު ތަރި، ކެޓްރީނާ ކައިފް މިދިޔަ ހުކުރު ދުވަހު ބޯރޑް ގޭމްއެއްގެ އަޖުމަ ބަލައިފިއެވެ.
ކެޓްރީނާ އިންސްޓަގްރާމްއަށްލި ފޮޓޯއަކުން ފެނިގެންދަނީ "ސީކުއެންސް" ނަމަކަށް ކިޔާ ބޯރޑް ގޭމްއެއް ކުޅެން މަޝްއޫލުވެގެން އޭނާ އިންނަ ތަނެވެ. ހިނިތުންވެލައިގެން އިން އެ ފޮޓޯގެ ކެޕްޝަނުގައި އޭނާ ލިޔެފައިވަނީ "ދެމީހުން ކުޅުމުގެ އެންމެ ސަޅި ކަމަކީ ކޮންމެވެސް އެކަކު އަވަހަށް މޮޅުވުން" ކަމުގައެވެ.
ލޮކްޑައުން ތެރޭގައި ކެޓްރިނާ ވަނީ އޭނާގެ އަމިއްލަ ދިރިއުޅުމުގެ މަންޒަރުތައް މީސްމިޑިއާގައި ވަރަށް ގިނައިން ހިއްސާކޮށްފައެވެ. އޭނާ ގެ ސާފު ކުރާ ގޮތުން ފެށިގެން ގޭގައި ކަސްރަތު ކުރާނެގޮތް އޭނާގެ ފޮލޯވަރުންނަށް ކިޔައިދީފައިވެއެވެ. ލޮކްޑައުން ތެރޭގައި އޭނާ ވަނީ ކައްކަންވެސް ފަށައިފައެވެ. އޭޕްރީލް މަހުގައި އޭނާ ހިއްސާކުރި ވީޑިއޯއަކުން ފެނިގެން ދިޔައީ ޗީޒް ނޫނީ ކެބެޖް ކަހަލަ އެއްޗެއް ކޮށަން އޭނާ ހުއްޓައެވެ. ކައްކަން އުޅެނީ ކޮންއެއްޗެއްތޯ މީހަކު އެހުމުން އޭނާ ބުނީ ކައްކަން އުޅޭ އެއްޗެއް އޭނާއަށްވެސް ނޭނގޭ ކަމަށެވެ.
ކެޓްރީނާ އެންމެ އަވަހަށް ފެނިގެންދާނެ އެއް ފިލްމަކީ އަކްޝޭކުމާރާއެކީ ކުޅުނު ރޯހިތު ޝެޓީގެ "ސޫރްޔަވަންޝީ" އެވެ.
