ކަރިޝްމާގެ މިފޮޓޯގައި އޭނަ ވައްތަރީ ފިރިހެނަކާއި ކަމަށް ބުނުމުން ރަތަށް!
ބޮލީވުޑްގައި ހަރަކާތްތެރިވާ އެއް އާާއިލާއެއްގެ މީހުން އިންތިހާއަށް ގިނައެވެ. އޭގެ ތެރެއިން ވެސް ފާހަގަ ކޮށްލެވޭ ދެބެންނަކީ ކަޕޫރް ޚާންދާނަށް ނިސްބަތްވާ ކަރިޝްމާ ކަޕޫރާއި ކަރީނާ ކަޕޫރް ޚާން އެވެ.
އަބަދުވެސް ވަރަށް ލޯބިން، އެކުއެކީގައި އުޅުނު މިދެބެން ދުވަހަކު ވެސް އެއްވެސް މައްސަލައެއް ނުޖެހޭ ކަމަށް މީގެ ކުރިން އިންޓަވިއު އެއްގައި ދެމީހުން ވެސް ވަނީ ބުނެފައެވެ. އަދި އެއްވެސް ކަމަކާއި ދެމީހުން އެކަކު އަނެކަކުދެކެ ކުޑަކޮށްވެސް ރުޅި ނާންނަ ކަމަށް ވެސް ބުނެފައިވެއެވެ.
ނަމަވެސް މިފަހުން ވަނީ ކަންކަން ކުޑަކޮށް ބަދަލުވެފައެވެ.
މިމަހުގެ 25 ވަނަ ދުވަހު އިންސްޓަގްރާމަށް ކަރީނާ ވަނީ އޭނަގެ ދައްތައާއެކު އިން ކުޑައިރުގެ ފޮޓޯއެއް ލާފައެވެ. އެފޮޓޯއިން ދެމީހުން ވެސް ފެންނަނީ އެއްގޮތަކަށް ހެދުން އަޅައިގެން ކޮންމެވެސް އެއްޗެއް ކާން ތިއްބައެވެ.
ޔުނިސެފް ޓެގްކޮށް، ކުޑަކުއްޖެއްގެ ގޮތުގައި ހުރި ދުވަސްތަކުގެ ހަނދާނުގައި ކަރީނާ ކުރި އެޕޯސްޓު، ދައްތަ ކަރީނާއަށް ވެގެން ދިޔައީ ވަރަށް ލަދުވެތި ފޮޓޯ އަކަށެވެ.
އެފޮޓޯއަށް ބައެއް މީހުން ކޮށްފައިހުރި ކޮމެންޓުތަކުގައި ބުނެފައިވަނީ ކަރީނާ އެއިރުވެސް މިހާރު ވެސް ވަރަށް "ލޯބިކޮށް" ހުރިއިރު، ކަރިޝްމާ އެއިރު ޖަހަނީ ފިރިހެން ކުއްޖެއް ވައްތަރު ކަމަށާއި ކަރިޝްމާ ބޮޑަށް ވައްތަރީ އެމިޙުންގެ ދެބެންގެ ދެދަރި ކޮއްކޮ އަދި ބޮލީވުޑް ގެ އެކްޓަރ ރަބީރު ކަޕޫރާއި ކަމަށެވެ.
މިކޮމެންޓުތަކުގެ ސަބަބުން ކަރިޝްމާ ވަރަށް ބޮޑަށް ރުޅިއައި ކަމަށާއި، އެޕޯސްޓު ޑިލީޓު ކުރަން ކަރީނާ ކައިރީގައި ބުނިކަމަށް އިންޑިއާގެ ބައެއް ރިޕޮޓުތަކުގައި ބުނެފައިވެއެވެ.
