ބަންގްލަދޭޝްގެ މަސައްކަތްތެރިންނަށް މުސާރަ ނުދީގެން ކައިލީ ހޫނު ފެނަށް!
ކައިލީ ޖެނަރގެ ހެދުން ވިއްކާ ބްރޭންޑްއާ ހަވާލުވެހުރި 'ދަ ގްލޯބަލް ބްރޭންޑް ގްރޫޕް' އިން ވަނީ ކޯވިޑް-19 ގެ ސަބަބުން އޯޑަރުތައް ހުއްޓާލުމަށް އަންގާފައެވެ. މީގެ އިތުރުން ލޮސް އެންޖެލެސް އަދި ބަންގްލަދޭޝްގެ މަސައްކަތްތެރިންނަށް މުސާރަ ނުދީ ވަޒީފާއިން ވަކިކޮށްފައިވެއެވެ. މިކަމުގެ ސަބަބުން 50،000 މަސައްކަތްތެރިންނަށް ވަނީ އަސަރުކޮށްފައެވެ. މީގެތެރެއިން ގިނަ މަސައްކަތްތެރިންނަކީ އަންހެނުންނެވެ.
182.3 މިލިއަން މީހުން ކައިލީގެ އިންސްޓަގްރާމް ފޮލޯ ކުރާއިރު، ގިނަ ބަޔަކު ވަނީ މިކަމާއި ގުޅޭގޮތުން އޭނާގެ ޕޯސްޓްތަކުގެ ކޮމެންޓްތަކުގައި ނުރުހުން ފާޅުކޮށްފައެވެ. ފެކްޓަރީގެ މަސައްކަތްތެރިންނަށް އަމިއްލަ ޖީބުން މުސާރަދޭން ޖެހުނަސް ދިނުމަށް ގޮވާލަމުންދާ މީހުންގެ އަދަދު މަދެއް ނޫނެވެ.
22 އަހަރުގެ ކައިލީގެ ބިލިއަނަރ ލަގަބު ގެއްލުނުތާ ގިނަ ދުވަސްތަކެއް ނުވި ކަމުގައިވިޔަސް އޭނާގެ މިލްކިއްޔާތުގައި 900 މިލިއަން ޑޮލަރު އެބަހުއްޓެވެ. ވީމާ، މަސައްކަތްތެރިން ކޮށް ނިންމާފައިވާ މަސައްކަތުގެ އަގަކީ ކައިލީއަށް ދޭން އުނދަގޫ އަގެއްނޫން ކަމުގައި ގިނަ ބަޔަކު ފާހަގަކުރަމުންދެއެވެ.
މިކަމާއި ގުޅޭގޮތުން "ޕޭ އަޕް" ކެމްޕެއިންގެ ނަމުގައި އާންމުންވަނީ ޕެޓިޝަނެއް ހަދާފައެވެ. އަދި މި ޕެޓިޝަނަށް 78،000 އަށްވުރެ ގިނަ ސޮއި ވަނީ ލިބިފައެވެ. ނަމަވެސް، މިކަމާއި ގުޅޭގޮތުން ކައިލީގެ ކޮމެންޓެއް ލިބިފައި ނުވެއެވެ.
Ads by STO
