ކިތަންމެ ނުފޫޒު ގަދަ ބަޔަކަށް ވިޔަސް ގާނޫނަށް ވުރެ މަތީގައި ނުތިބެވޭނެ، ރޭޕް ކޭސް ތަހުގީގު ކުރޭ: ޝަހީމް
ހުޅުމާލޭ ފަޅުގައި އޮތް ސަފާރީއަކަށް ދިޔަ ބިދޭސީ އަންހެނަކު ރޭޕުކުރި މައްސަލަ ފުރިހަމައަށް ތަހުގީގު ކުރުމަށް ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ގޮވާލައްވައިފިއެވެ.
އެ މައްސަލައިގެ ތުހުމަތުގައި ފުލުހުން ވަނީ އެ ސަފާރީ އިން 39 އަހަރުގެ ދެ ދިވެހިން ހައްޔަރުކޮށްފައެވެ. ފުލުހުން ބުނީ އެ މައްސަލާގައި ތަހުގީގަށް ހައްޔަރުކޮށްފައި ބެހެއްޓޭނެ އެކަށީގެންވާ ސަބަބެއް ނެތުމުން، އެ ދެމީހުން ވެސް މިހާރު ދޫކޮށްލާފައިވާ ކަމަށެވެ.
މި މައްސަލާގައި ތުހުމަތު ކުރެވޭ މީހުން ދޫކޮށްލުމާއެކު ގިނަ ބަޔަކު އަންނަނީ ފުލުހުންނަށް ފާޑުކިޔަމުންނެވެ.
މިކަމާ ގުޅިގެން ޝަހީމު ކުރެއްވި ޓުވީޓެއްގައި ވިދާޅުވެފައިވަނީ ސަފާރީ ރޭޕް ކޭސް ފުރިހަމައަށް ތަހުގީގުކޮށް ބިދޭސީ އަންހެން ކުއްޖާއަށް އިންސާފު ހޯދައިދީ ރާއްޖޭގެ ޝަރަފު ދެމެހެއްޓުމަށް ފުލުހުންނަށް ގޮވާލައްވާ ކަމުގައެވެ. އަދި އެކަމުގައި ޝާމިލުވާ މީހުންނަކީ ނުފޫޒު ގަދަ ބަޔަކަސް ޤާނޫނަށްވުރެ މަތީގައި ނުތިބެވޭނެ ކަމުގައެވެ.
އަޅުގަނޑުމެންގެ ގައުމަށް ޒިޔާރަތް މި ކުރި ކުއްޖާގެ ދިފާޢުގައި މުޅި ޤައުމުގެ ރައްޔިތުން ބަސްބުނަންޖެހޭ. މިކަމަކީ އާދައިގެ ކަމަކަށް ހަދައި ދޫކޮށްލައިފިނަމަ އެކަމުގެ ސަބަބުން ދިވެހިންގެ ޢިއްޒަތާއި ޝަރަފު ވެއްޔާއި މޮޑެވޭނެ. ތަޙުޤީޤުކޮށް ޤާނޫނު ހިންގަވާ." ޝަހީމް ވިދާޅުވިއެވެ.
Safaari Rape Case furihama gothugai Thahuqeeq koh,beyru Anhenkujjaa ah insaafu hoadhaidhee Raajjeyge sharaf dhamahattavai thahuqeeq koh Qaanoonu hingan jehey. Nufooz gadha bayakah viyas, Qaanoonah vure matheega nuthibeveyne. Fiyavavalhu Alhuvvaa @PoliceMv.
— Mohamed Shaheem Ali Saeed (@Mohamedshaheem1) June 28, 2020
މި މައްސަލާގައި ހައްޔަރުކުރި މީހުން ދޫކޮށްލާފައިވާއިރު އެ މައްސަލާގައި ތުހުމަތު ކުރެވެނީ މަޖިލިސް މެމްބަރެއްގެ ފިރިކަލުންނަށް ކަމަށް މީސް މީޑިއާގައި ބައެއް މީހުން އަންނަނީ ބުނަމުންނެވެ.
