ރިސޯޓުތަކާއި ބިންތަކުގެ ކުލި އެއް އަހަރަށް ފަސްކޮށްދޭން ނިންމައިފި
ރިސޯޓުތަކުގެ ކުއްޔާއި ބިންތަކުގެ ކުލި އެއް އަހަރަށް ފަސްކޮށްދިނުމަށް ފިނޭންސް މިނިސްޓްރީން ނިންމައިފިއެވެ.
ފިނޭންސް މިނިސްޓްރީން މިއަދު ނެރުއްވި ސާކިއުލާއެއްގައި ބުނީ ކޮވިޑް-19ގެ ބަލިމަޑުކަމާ އެކު އިގުތިސާދަށް ދިމާވެފައިވާ ތަދުމަޑުކަމާއި، ބަލި ފެތުރުން ކޮންޓްރޯލްކުރުމަށްޓަކައި އަޅައިފައިވާ ފިޔަވަޅުތަކުގެ ސަބަބުން ވިޔަފާރިތަކުގެ ހިންގުމަށް ދަތިވެ، ވިޔަފާރިއާއި ރައްޔިތުންނަށް މާލީ ހީނަރުކަމާ ކުރިމަތިލާން ޖެހިފައިވާ ކަމަށެވެ.
މި ދަތި އުނދަގޫ ދަނޑިވަޅުގައި ވިޔަފާރިތަކަށާއި އާންމު ރައްޔިތުންނަށް އެހީވުމަށާއި ވިޔަފާރި ދެމެހެއްޓުމަށްޓަކައި ސަރުކާރުން މާލީ އެހީތެރިކަމާއި އިތުރު ލުއިތައް ފޯރުކޮށްދެމުން އަންނަ ކަމަށް ފިނޭންސް މިނިސްޓްރީން ބުނެއެވެ. އަދި ސަރުކާރުން ދޫކޮށްފައިވާ ބިންތަކަށް 2020 ވަނަ އަހަރު ދައްކަންޖެހޭ ކުލި ދެއްކުމުގައި ލުއި ދިނުމަށް ނިންމާފައިވާ ކަމަށެވެ.
އެގޮތުން 2020 ވަނަ އަހަރުގެ ތިންވަނަ ކުއާޓަރާއި ހަތަރު ވަނަ ކުއާޓަރަށް ނިސްބަތްވާ ރިސޯޓުތަކުގެ ކުއްޔާއި، ޖޫން 2020 އިން ޑިސެންބަރު 2020 އާ ދެމެދު ދައްކަންޖެހޭ ބިމު ކުލި 1 ޖޫން 2021 އިން ފެށިގެން ދެއްކުމަށް ފަސްކޮށްދިނުމަށް ނިންމާފައިވާ ކަމަށް ބުނެފައިވެއެވެ.
އަދި ފަސްކޮށްދޭ ކުލި އަނބުރާ ދައްކަންވާނީ އެއް އަހަރުގެ މުއްދަތަށް ބަހައިލައިގެން ކަމަށާއި، މިގޮތުން ކުލި ދައްކަނީ ތިން މަހުން އެއްމަހު ނަމަ، ފަސްކޮށްދީފައިވާ މުއްދަތުގެ ކުލި ދައްކާނީ 1 ޖޫން 2021 އިން ފެށިގެން 4 ކުއާޓަރަށް ބަހާލައިގެން ކަމަށެވެ.
ކުލި ދައްކަނީ މަހުން މަހުންނަމަ، ފަސްކޮށްދީފައިވާ މުއްދަތުގެ ކުލި ދައްކާނީ 1 ޖޫން 2021 އިން ފެށިގެން 12 މަސް ދުވަހަށް ބަހައިލައިގެން ކަމަށް ބުނެފައިވެއެވެ.
މީގެއިތުރުން ކުލި ދެއްކުން ފަސްކޮށްދިން މުއްދަތުގެ ތެރޭގައި ފަރާތަކުން ފައިސާ ދައްކައިފައިނުވުމަކުން ޖޫރިމަނާއެއް
ނުހިނގާނެ ކަމަށް ފިނޭންސް މިނިސްޓްރީން ބުނެއެވެ.
