އިދިކޮޅުން "ހައެއްކަ މީހުން" ގޮވައިގެން އެކުރަނީ މުޒާހަރާއެއް ނޫން، ލާހޫރެނީ: ނަޝީދު
އިދިކޮޅު ޕްރޮގްރެސިވް ކޯލިޝަނުން "ހައެއްކަ މީހުން" ގޮވައިގެން އެކުރަނީ މުޒާހަރާ ނޫން ކަމަށާއި، އެމީހުން "ލާހޫރެނީ" ކަމަށް ވިދާޅުވެ އެމްޑީޕީގެ ލީޑަރު ރައީސް ނަޝީދު ފާޑުވިދާޅުވެއްޖެއެވެ.
މިރޭ އެމްޑީޕީން ބޭއްވި އެ ޕާޓީގެ ގައުމީ މަޖިލީހުގެ ޖަލްސާއެއްގައި ވާހަކަފުޅު ދައްކަވަމުން ރާއްޖޭގައި ކުރިން ތިން އަހަރު ދުވަހުގެ ވެރިކަމެއް ކުރެއްވި ރައީސް ނަޝީދު ވަނީ އިދިކޮޅު ޕާޓީތަކުން މަގުމަތީ ހިންގާ ސިޔާސީ ހަރަކާތްތަކަށް ފާޑުވިދާޅުވެފައެވެ.
އެގޮތުން އެމަނިކުފާނު ވިދާޅުވީ މުޒާހަރާ ކަމަށް ބުނެ އިދިކޮޅުން ހިންގާ ހަރަކާތުން ފެންނަނީ ހައެއްކަ މީހުން ކަމަށާއި އެއީ މުޒާހަރާއަކަށް ނުވެ މަގުމައްޗަށް ނުކުންނަ ހައެއްކަ މީހުން "ލާހުރެނީ" ކަމަށެވެ.
ރައްޔިތުންގެ މަޖިލީހުގެ ރައީސްކަން ވެސް ކުރައްވާ ނަޝީދު އިތުރަށް ވިދާޅުވީ އިދިކޮޅުން މަގުމައްޗަށް ނުކުމެ އެއްޗަކަށް ނުވާ ކަމެއް ކުރާއިރު ފުލުހުންގެ ވަރަށް ގިނަ ވަގުތު ވެސް ގެއްލޭ ކަމަށާއި އެކަމާ ކަންބޮޑުވާ ކަމަށެވެ. އަދި ހައެއްކަ މީހުން ހުއްޓުވަން ގިނަ ފުލުހުންތަކެއް ނެރެންޖެހޭ ސަބަބެއް ނެތް ކަމަށް ވެސް ރައީސް ނަޝީދު ވިދާޅުވިއެވެ.
"މަގުމަތީގައި ހައެއްކަ މީހުން އެބަ 'ލާހޫރޭ'... ބުނަނީ މުޒާހިރާއޭ. މުޒާހިރާއަކަށް ނުވެސްވޭ. އަދި ހަގީގަތުގައި އެކައްޗަކަށް ވެސް ނުވޭ. ހައެއްކަ މީހުން މަގުމައްޗަށް ނިކުމެ 'ލާހޫރު' ން އެއީ އަޅުގަނޑުމެން ނުދެކެން އެއްވެސް ހާލެއްގައި މުޒާހަރާއެއް ކަމަކަށް. ދެން ވަރަށް ފުލުހުންގެ ވަގުތުތައް ނަގާލަން ޖެހޭ ކަމާއި ފުލުހުން އެތަންތަނުގައި ތިބެން ޖެހޭ ކަމީ. ދެން އަޅުގަނޑުމެންނަށް އެނގޭ ހައެއްކަ މީހުން ބަލަހައްޓަން ފުލުހުން ނެރެގެން އުޅޭކަން ނުވެސް ޖެހޭކަން،" ރައީސް ނަޝީދު ވިދާޅުވިއެވެ.
Ads by STO
