މިއީ "ފެއާރ އެންޑް ލަވްލީ" ގެ ނަން ބަދަލު ކުރުމުގެ ފަހަތުގައި ހުރިކުއްޖާ!
ހަމުން ކަޅު މީހުންނާއިމެދު އެކި ކަހަލަ ތަފާތު ކުރުންތަށް ގެންގުޅޭ ކަމަށް ބުނެ، މީގެ ދުވަސްތަކެއް ކުރިން ފެށުނު މުޒާހަރާތަކަކާއި ގުޅިގެން، އޭގެ އެންމެ ބޮޑު އަސަރެއް ކުރި އެއް ފަރާތަކީ ޒީނަތްތެރިވުމުގެ ސާމާނު އުފައްދާ މީހުންނެވެ.
މޫނުގައި ވަކި އެއްޗެއް އުނގުޅުމުން ހަމުގެ ކުލަ ބަދަލުވެ "ދޮންވާ" މަންޒަރު ދައްކުވައިދޭ އިޝްތިހާރުތަކެއް އުފެއްދި މީހުންގެ ތެރޭގައި އެންމެ ގިނަ މީހުންގެ ފާޑުކިޔުން އަމާޒުވީ މަޝްހޫރު ކޮސްމެޓިކް ބްރޭންޑެއް ކަމަށްވާ "ފެއާރ އެންޑް ލަވްލީ" އަށެވެ.
ދޮންވެ ރީތިވާނެ ކަމަށް ބުނެ، ޒަމާނުއްސުރެ އެފަދަ ގޮތަކަށް އިޝްތިހާރު ކޮށްފައިވާ މިބްރޭންޑަށް އާއްމުންގެ ނުރުހުން ވަރަށް ބޮޑަށް އަމާޒުވެ، މިހާރު އެކުންފުނިން ނިންމާފައިވަނީ "ފެއާރ އެންޑް ލަވްލީ" ރީ ބްރޭންޑުކޮށް، އޭގައި އިންނަ "ފެއާރ" ބައި ކަނޑާލާށެވެ.
ނަމަވެސް މިނިންމުމަކީ ހަމައެކަނި ބަޔަކު މަގުމައްޗަށް ނިކުމެ މިކަމާއި ދެކޮޅަށް އަޑު އުފުލާ، މީސްމީޑިއާގައި ވެސް މިކަމާއި ދެކޮލަށް އެންޓި-ކެމްޕޭނު ކޮށްގެން ކާމިޔާބުވީ ކަމެއް ނޫނެވެ. މިކަންވީ "ފެއާރ އެންޑް ލަވްލީ" ގެ ނަން ބަދަލު ކުރުމަށް ބަޔަކު ހުށަހެޅި ޕެޓިޝަނަކާއި ވެސް ގުޅިގެންނެވެ.
އެގޮތުން މިޕެޓިޝަންގެ ފަހަތުގައި އެންމެ އިސްކޮށް ހަރަކާތްތެރިވެ ޕެޓިޝަން ފެށި ފަރާތަކީ އުމުރުން 22 އަހަރުގެ ޗަންދަނާ ހިރަން އެވެ.
ޗަންދަނާ ބުނިގޮތުގައި ފެއާރ އެންޑް ލަވްލީ ބޭނުން ކުރަން ފެށުމުން "ދޮންވާނެ" ކަމަށް ބުނެ އިޝްތިހާރު ކުރަމުންދާތީ އޭނާ ހުރީ ކުރިންވެސް އެކަމާއި ކަންބޮޑުވެފައެވެ. ނަމަވެސް މިފަދަ ޕެޓިޝަނެއް ފެށުމަށް އެއިރު ހިތްވަރު ނުލިބުނު ކަމަށް ކަމަށް ވެސް އޭނާ ބުނެފައިވެއެވެ.
ނަމަވެސް މިފަހަރު އޭނާ ފެށި ޕެޓިޝަންގެ ސަބަބުން 10،000 އަށްވުރެ ގިނަ މީހުން އެޕެޓިޝަންގައި ސޮއިކުރުމުން، ފެއާ އެންޑް ލަވްލީގެ ނަން ވަރަށް އަވަހަށް ބަދަލު ކުރާނެ ކަމުގެ ނިޝާނެއް އެކުންފުނިން ވަނީ ދީފައެވެ. އެގޮތުން އެމީހުންގެ ޝިއާރަކަށް ވެސް މިހާރު ވެފައިވަނީ "އޯލް ޝޭޑްސް އާ ލަވްލީ" (ހުރިހާ ކުލައެއް ވެސް ރީތި) އެވެ.
