ޝަމްވީލްގެ “ލަވް މެޝަޕް 3” : ހިތާ ކުޅެލައިފި!
މޯލްޑިވިއަން އައިޑަލް ސީޒަން 2 އިން ވިދާލި ޝަމްވީލް (ބަރޯ) އަކީ ލަވަކިޔުމުގެ ރޮނގުން ފުންނާބު އުސް ފަންނާނެކެވެ. އޭނާ ވަނީ "ލަވް މެޝަޕް"ގެ ނަމުގައި މީގެ ކުރިން 2 މެޝަޕެއް ނެރެފައެވެ. މިފަހަރު ވެސް ޝަމްވީލު ވަނީ އޭގެ ތިންވަނަ މެޝަޕެއް ތައްޔާރުކޮށް އާންމުންނާ ހިސާބަށް ގެނެސްދީފައެވެ.
"ލަވް މެޝަޕް 3" ގެ ނަމުގައި ޝަމްވީލު ގެނެސްދިިން މި މެޝަޕް ވެސް ގިނަ ބަޔަކަށް ވަނީ އެތައް ގޮތަކުން ކަމުގޮސްފައެވެ. ޖުމުލަ ފަސް ލަވަ އެކުލެވޭ ގޮތަށް ތައްޔާރު ކޮށްފައިވާ މި މެޝަޕް މިހާރު ސައުންޑް ކްލައުޑުން އަޑު އަހާލެވޭނެއެވެ.
މިފަހަރުގެ "ލަވް މެޝަޕް 3" ގެ ފަސް ލަވައިގެ ތެރެއިން ހަތަރު ލަވައަކީ ކޮޕީ ރާގެއް ނަމަވެސް އެއީ އައު ޅެން ތަކެވެ. އެގޮތުން އެ ހަތަރު ލަވައިގެ ޅެން ހަދާފައި ވަނީ މޫސާ ނަދީމު ކަމުގައި ޝަމްވީލު ބުންޏެވެ. ހަމަ ގައިމު ވެސް މި މެޝަޕް އަޑުއަހައި އޭގެ ޖާދޫގައި އެތައް ބަޔަކު ޖެހޭނެއެވެ. ޅެމުގެ ފުރިހަމަ ކަމާއި ޝަމްވީލު ކިޔާފައިވާ މި މެޝަޕްގެ ހިތްގައިމުކަމުގެ ސަބަބުންނެވެ.
މީގެ އިތުރުން މެޝަޕެއް ތައްޔާރު ކުރާއިރު، ލަވަ ކިއުމާއި ޅެން ހެދުމުގެ އިތުރުން، އިތުރު އެހެން މަސައްކަތް ތަކެއް އޭގެ ފަހަތުގައި ވާނޭކަން ކަށަވަރެވެ. އެގޮތުން، މި މެޝަޕަށް މިއުޒިކު ތައްޔާރުކޮށް މިކްސިންގް އާއި މާސްޓަރިންގް ގެ މަސައްކަތް ކޮށްދިން ފަރާތެއްގެ ގޮތުގައި ޝަމްވީލު ވަނީ ހުސައިން ތައުފީގުގެ ނަން ހިއްސާ ކޮށްފައެވެ.
މީގެ އިތުރުން، މެޝަޕް ހިއްސާ ކުރުމުގައި ބޭނުން ކޮށްފައިވާ ފޮޓޯއަކީ، އަހުމަދު ލުޖައިން އަލީގެ ހުނަރުވެރި މަސައްކަތް ކަމަށާއި، އޭގެ އާޓްގެ މަސައްކަތަކީ ހަމަ އެފަދަ ހުނަރުވެރި ފަރާތެއް ކަމަށްވާ އަބްދުﷲ ރިޒާގެ މިންނެތް މަސައްކަތް ކަމުގައި ޝަމްވީލު ވަނީ ފާހަގަ ކޮށްފައެވެ.
މިވަގުތު މި މެޝަޕް ހަމައެކަނި އަޑު އިވޭނީ ސައުންޑްކްލައުޑުން އެކަނި ނަމަވެސް ކުރިއަށް އޮތް ދެތިން މަސް ތެރޭގައި މިމެޝަޕަށް ވީޑިއޯ ކުޅެވި ޔޫޓިއުބުން މި މެޝަޕް އަޑު އަހާލުމުގެ ފުރުސަތު ލިބިގެންދާނެ ކަމުގައި ޝަމްވީލު ވަނީ "ދެން"އާ ހިއްސާ ކޮށްފައެވެ. މި މެޝަޕް ސައުންޑްކްލައުޑަށް "އަޕްލޯޑު" ކުރީ އިއްޔެގެ ވަގުތެއްގައެވެ. އަދި މިހާތަނަށް މި މެޝަޕަށް 100 އަށް ވުރެ ގިނަ މީހުން ލައިކް ދީފައިވާއިރު، 1000 އަށް ވުރެ ގިނަ މީހުން ވަނީ މި މެޝަޕް އަޑުއަހާފައެވެ.
މި މެޝަޕްގެ ސައުންޑްކްލައުޑް ލިންކު ތިރީގައި އެވަނީއެވެ.
Ads by STO
