ޝަމްވީލްގެ އައު ލަވަތަކެއް، މިއީ އޭނާގެ ލޯބީގެ އިތުރު ބާބެއްގެ ފެށުން ބާ؟
ޝަމްވީލް މުހައްމަދު (ބަރޯ) އަކީ ގިނަ ދިވެހީންނަށް އައު ނަމަކަށް ނުވާނެއެވެ. ގިނަ ބަޔަކަށް ޝަމްވީލް އެނގިގެން ދިޔައީ މޯލްޑިވިއަން އައިޑޮލް ސީޒަން 2 އިންނެވެ. އޭނާއަކީ މޯލްޑިވިއަން އައިޑޮލް ސީޒަން 2ގެ ސެކަންޑް ރަނަރއަޕް އެވެ. މޯލްޑިވިއަން އައިޑޮލް އަށް ފަހު ވެސް ޝަމްވީލްގެ ގިނަ ލަވަތަކެއް އޭނާގެ ފޭނުންނާއި ހަމައަށް ވަނީ ގެނެސްދީފައެވެ.
އެގޮތުން ޝަމްވީލްގެ އަޑު މިހާރު ދިވެހީންގެ ތެރޭގައި ބޮޑަށް މަގުބޫލު ވެފައިވަނީ ލޯބީގެ ލަވަތަކަށް ޚާއްޞަ އަޑެއްގެ ގޮތުގައެވެ. އޭނާއަކީ ގިނައިން ލޯބީގެ ލަވަތަކަށް ހާއްސަކޮށް ލަވަކިޔާ ފަންނާނެކެވެ. މީގެ ކުރިން ވެސް ޝަމްވީލް ވަނީ 2 "ލަވް މެޝަޕް" އެއް ބެލުންތެރިންނަށް ދޫކޮށްލާފައެވެ. އެ މެޝްއަޕްތައް ވެސް ގިނަ ބަޔަކަށް ވަނީ ކަމުގޮސްފައެވެ. އެގޮތުން ފުރަތަމަ މެޝްއަޕްގައި ހިމެނެނީ ލޯބީގެ ހިތްގައިމު 4 ލަވައެވެ. އެ މެޝްއަޕް ނެރެފައި ވަނީ ފާއިތުވެ ދިޔަ އަހަރުގެ މާރޗް 27ގައެވެ. އެ މެޝްއަޕްގެ ވީޑިއޯ ވެސް އަދި އޯޑިއޯ ވެސް ވަނީ ގިނަ ބައެއްގެ މަޤުބޫލުކަން ހޯދާފައެވެ.
ޝަމްވީލްގެ ދެވަނަ "ލަވް މެޝްއަޕް" އޭނާގެ ފޭނުންނާއި ހަމައަށް ދޫކޮށްލީ މިއަހަރުގެ ކުރީކޮޅުގައެވެ. އެއީ މިއަަހަރުގެ ފެބްރުވަރީ 10 ގައެވެ. ފެބްރުވަރީ މަހުގައި ޝަމްވީލް ބެލުންތެރިންނާއި ހަމައަށް ދޫކޮށްލީ އެ ލަވައިގެ އޯޑިއޯއެވެ.
މިއޮތީ ޝަމްވީލްގެ ލަވަތަކަށް ލޯބިކުރާ ފަރާތްތަކަށް އުފާވެރި ޚަބަރެކެވެ. ޝަމްވީލްގެ "ލަވް މެޝްއަޕް 2" ގެ ވީޑިއޯ އަކަށް އިންތިޒާރު ކުރަމުންދިޔަ ފަރާތްތަކުގެ އިންތިޒާރަށް މިއޮތީ ނިމުމެއް އަައިސްފައެވެ. މީގެ ދެދުވަހެއް ކުރިން ޝަމްވީލް މިވަނީ އޭނާގެ ލަވް މެޝަޕް 2 ގެ ވީޑިއޯ ބެލުންތެރިންނާއި ހަމައަށް ދޫކޮށްލާފައެވެ.
"ލަވް މެޝަޕް 2 ނެރުމުގެ އެންމެ ބޮޑު ސަބަބަކީ ލަވް މެޝަޕް 1 އަށްވެސް އެހާބޮޑު ތަރުހީބެއް ލިބުނީމަ. ލަވްމެޝަޕް 2 ގެ އޯޑިއޯއަށް ވެސް ވަރަށް ބޮޑު ތަރުހީބެއް ލިބުނު. އެހެންވެ އޭގެ 7 މަސް ފަހުން ލަވްމެޝަޕް 2ގެ ވީޑިއޯ އެއް މި ނެރުނީ"
ޝަމްވީލްގެ ވީޑިއޯ ލަވަ މިވަނީ މީސްމީޑިއާގައި ވެސް ވަރަށް ބޮޑަށް ވައިގައި ހިފާފައެވެ. މި ލަވައިގައި ފެނިގެން ދަނީ ޝަމްވީލް އާއި އިބްނާއެވެ. އިބްނާ އަކީ މިދާއިރާއަށް މުޅިން އައު މޫނެކެވެ. މި ލަވަ ފެނި ގިނަ ބަޔަކު ވަނީ ޝަމްވީލްގެ ލޯބީގެ އައު ސިލްސިލާއެއް ފެށުނީތޯ ސުވާލު އުފައްދާފައެވެ. ނޫސްތަކުގެ ފަލަ ސުރުހީގައިވެސް އެވާހަކަ އޮތީ މިސަބަބާއިހެދި ކަންނޭނގެއެވެ. ނަމަވެސް ހަގީގަތަކީ މިއީ ޝަމްވީލްގެ ލޯބީގެ ދެވަނަ ބާބެއްގެ ފެށުން ނޫންކަމެވެ.
ޝަމްވީލްގެ އަމިއްލަ އަލްބަމެއްގެ މަސައްކަތް ވެސް މިހާރު އެބަ ކުރިއަށްދެއެވެ. އެގޮތުން އެ އަލްބަމްގެ 2 ލަވައެއްވެސް ވަނީ ބެލުންތެރިންނާއި ހަމައަށް ދޫކޮށްލާފައެވެ އަދި ތިންވަނަ ލަވައެއްވެސް ބެލުންތެރިންނާއި ހަމައަށް ވަރަށް އަވަހަށް ދޫކޮށްލާނެ ކަމުގެ އުފާވެރި ޚަބަރު ޝަމްވީލް ވަނީ ދީފައެވެ. އެ ލަވައިގެ ނަމަކީ "ކިލަނބުކަން" އެވެ. މި އަލްބަމްގެ ނަމަކީ" ސޮރު" އެވެ. އެގޮތުން ނުކުމެފައިވާ ދެލަވައަކީ "އޮޑިގީލާ" އަދި "ފަރިހަނި" އެވެ.
ޝަމްވީލްގެ "ލަވް މެޝަޕް 2"ގެ މަސައްކަތުގައި ޝަމްވީލްއަށް ގިނަ ބައެއްގެ އެހީތެރިކަން ވަނީ ލިބިފައެވެ. އެގޮތުން ޝަމްވީލްގެ މި ލަވް މެޝަޕްގެ ވީޑިއޯ އަދި އޯޑިއޯ ރިކޯޑިންގްވެސް ހަދާފައިވަނީ މާސްކޭ ސްޓޫޑިއޯ އިންނެވެ. އަދި މިލަވައިގެ މިއުޒިކް ތައްޔާރު ކޮށްފައިވަނީ މުނާޒް ޒުބައިރު އެެވެ. އެހެންކަމުން ޝަމްވީލްގެ ހާއްސަ ޝުކުރު މާސްކޭ ސްޓޫޑިއޯ އަށާއި މުނާޒްއަށް އަދާކުރިއެވެ. އަދި ޝަމްވީލްގެ ޝުކުރުގެ ލިސްޓުގައި މި ވީޑިއޯ ލަވަ ޑައިރެކްޓުކޮށް، ކެމެރާކޮށް އަދި އެޑިޓް ކޮށްދީފައިވާ ޔާމީން ޒަކީގެ ނަން ފާހަގަކޮށް ޚާއްސަ ޝުކުރެއް އަދާކުރިއެވެ. އަދި ޝަމްވީލްގެ ޝުކުރުގެ ލިސްޓުގައި މި ވީޑިއޯގައި ކެމެރާ ފުރަގަހުން މަސައްކަތް ކޮށްދެއްވި، ޝަމްއޫން މުހައްމަދު ، ވިޝާލް އާމިރު، ލުބްނާ ނާސިރު އަދި ސަމަޓީއަށް ޝަމްވީލް ޚާއްސަ ޝުކުރެއް އަދާ ކުރިއެވެ.
ޝަމްވީލްގެ މި ލަވަ ޔޫޓިއުބުން ބަލާލެވޭނެއެވެ. އެއްފަހަރު ބަލައިފި ނަމަ ދެވަނަ ފަހަރަށް ނުބަލާ ނުހުރެވޭނެކަން ގައިމެވެ. އިޝްގުގައި ޖެހޭނެކަން ޔަގީނެވެ.
