ކޮވިޑް-19 ވެކްސިން ޖަހަން މަޖުބޫރު: ނަޝީދު
ކޮރޯނާ ވައިރަސް އިން ދިފާއުވާން މިހާރު ދޭން ފަށައިފައިވާ ކޮވިޑް ވެކްސިން ޖަހަން މަޖުބޫރު ކަމަށާއި، ވެކްސިން ނުޖެހުމަކީ ގާނޫނީ ގޮތުން އޮތް ފުރުސަތެއް ނޫން ކަމަށް މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ނަޝީދު މިހެން ވިދާޅުވީ މިއަދު ބޭއްވި މަޖިލިސް ޖަލްސާގައި ވާހަކަ ދައްކަވަމުންނެވެ. ނަޝީދު ވިދާޅުވީ ވެކްސިން ޖެހުމަކީ ގާނޫނީ ގޮތުން މަޖުބޫރު ކަމެއް ކަމަށެވެ.
“"ހަގީގަތުގައި ވެކްސިން ޖެހުމަކީ ގާނޫނީ ގޮތުން މަޖުބޫރު ކަމެއް. އެހެންވީމާ މި ކޮންސެންޓް ފޯމްގެ ހަގީގީ ބޭނުމެއް އަޅުގަނޑަކަށް ސާފެއް ނުވޭ. އެންމެ ބޮޑަށް ސާފުވާ ސަބަަބަކީ މައުލޫމާތު ހޯދަން ކަން. އެއީ އެއްވެސް ކަހަލަ ރިއެކްޝަނެއް ނުވަތަ ވެކްސިން ޖެހީމާ ވެސް ގޮތެއް ވޭތޯ ބެލުން”ނަޝީދު ވިދާޅުވިއެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އާންމު ކޮށްފައިވާ ޑޭޓާއަަށް ބަލާއިރު 5،204 މީހުންނަށް މިއަދު ކޮވިޑަށް ވެކްސިން ދީފައި ވެއެވެ. އަދި މިހާތަނަށް މުޅި ރާއްޖެއިން ޖުމްލަ 43،817 މީހުންނަށް ވެކްސިން ދީފައި ވެއެވެ.
މާލެ ސަރަޙައްދުގައި ވެކްސިން ދިނުމަށް ގާއިމް ކޮށްފައިވާ 6 ސެންޓަރުން މިހާތަނަށް ޖުމްލަ 35،289 މީހުންނަށް ވެކްސިން ދީފައިވާއިރު އަތޮޅުތެރޭގެ ދެ ސެންޓަރުން މިހާތަނަށް ޖުމްލަ 8،429 މީހަކަށް ވެކްސިން ދީފައި ވެއެވެ. އަދި ރިސޯޓުތަކުން 99 މީހަކަށް ވެކްސިން ދީފައިވެއެވެ.
ރާއްޖޭގައި މިހާރު ދެމުން އަންނަނީ އިންޑިއާގައި އުފައްދާފައިވާ އޮކްސްފޯޑް-އެސްޓްރެޒެނިކާގެ ވެކްސިނެވެ.
