ލޯކަލް ކައުންސިލް އިންތިހާބުގައި 735 ވޯޓު ފޮށި ބަހައްޓަނީ
ކުރިއަށް އޮތް ލޯކަލް ކައުންސިލް އިންތިހާބުގައި 735 ވޯޓު ފޮށި ބަހައްޓަން އިލެކްޝަންސް ކޮމިޝަން (އީސީ) އިން ނިންމައިފިއެވެ.
މިއީ އީސީން ކުރިން ބަހައްޓަން ނިންމި އަދަދަށް ވުރެ ގިނަ އަދަދެކެވެ. މީގެކުރިން އީސީން ބަހައްޓަން ނިންމީ 532 ފޮއްޓެވެ.
އީސީން މިހާރު ކުރިއަށް ގެންދާ ނޫސްވެރިންގެ ބައްދަލުވުމުގައި ވާހަކަދައްކަވަމުން އެ ކޮމިޝަންގެ ރައީސް އަހުމަދު ޝަރީފް ވިދާޅުވީ 735 ވޯޓު ފޮށި ބަހައްޓާނެ ކަމަށާއި ވޯޓު ފޮށިތަކުގެ އަދަދު ގިނަވީ އެޗްޕީއޭގެ ގައިޑްލައިންތަކާ ގުޅިގެން ކަމަށެވެ.
މި ގެނައި ބަދަލާއެކު ކޮންމެ ފޮއްޓަކަށް 500 މީހުން ވޯޓު ލާއިރު، މާލޭގައި އިތުރު 68 ވޯޓު ބަހައްޓާނެއެވެ.
މީގެ އިތުރުން ވޯޓު ފޮށިތަކުގެ އަދަދު އިތުރުވެފައި ވުމާއެކު އޮފިޝަލުންގެ އަދަދު ވެސް އިތުރުކަން ޝަރީފް ފާހަގަ ކުރެއްވިއެވެ. ވޯޓުލާ މަރުކަޒުތަކަށް މިފަހަރު 8،000 އޮފިޝަލުން ބޭނުންވާ ކަން ފާހަގަކޮށް ޝަރީފް ލޯކަލް ކައުންސިލް އިންތިހާބަށް 1،000 އަށް ވުރެ ގިނަ އޮފިޝަލުން ބޭނުންވާ ކަމަށެވެ.
ލޯކަލް ކައުންސިލް އިންތިހާބު ބާއްވަން ނިންމާފައި އޮތީ އަންނަ އޭޕްރިލް މަހުގެ 25 ވަނަ ދުވަހުއެވެ.
