ނަބީބޭކަލުންގެ ޤަބުރުފުޅުތައް ވީ ތަނެއް އެނގޭތަ؟
ނަބީބޭކަލުންނާއި ރަސޫލުބޭކަލުންނަކީ އިންސާނުންނަށް ތެދުމަގު ދެއްކެވުމަށްޓަކައި ﷲ ސުބުހާނަހޫ ވަތަޢާލާ އިންސާނުންގެ ތެރެއިން ޚިޔާރު ކުރައްވާފައިވާ ބޭކަލުންނެވެ. ނަބީބޭކަލުންނާއި ރަސޫލު ބޭކަލުންނަށް އީމާންވުމަކީ އީމާންކަމުގެ ރުކުންތަކުގެ ތެރޭގައި ހިމެނޭ ރުކުނެކެވެ. އެހެންކަމުން، ފުރިހަމަ މުސްލިމަކަށް ވުމަށްޓަކައި ރަސޫލުންނަށާއި ނަބިއްޔުންނަށް އީމާންވާން ޖެހޭނެއެވެ.
ނަބީބޭކަލުންނާއި ރަސޫލު ބޭކަލުންގެ ތަފާތަކީ ކޮބައިކަން ގިނަ މީހުންނަށް އެނގެއެވެ. އެހެންނަމަވެސް އެ ތަފާތު މިތަނުގައި މުރާޖަޢާ ކޮށްލާނަމެވެ. ރަސޫލުބޭކަލުންނަކީ އިންސާނުންނަށް ތެދުމަގު ދެއްކެވުމަށް ﷲ ތަޢާލާ ޚިޔާރު ކުރެއްވި ނަބިއްޔުންގެ ތެރެއިން އެބޭކަލުންގެ މައްޗަށް ފޮތް ބާއްވައިލެއްވި ބޭކަލުންނެވެ. އަދި ނަބީބޭކަލުންނަކީ އެބޭކަލުންގެ މައްޗަށް ފޮތް ބާއްވައިނުލައްވާ ބޭކަލުންނެވެ. އެހެންކަމުން، ކޮންމެ ރަސޫލަކީ ނަބިއްޔެކެވެ. ނަމަވެސް ކޮންމެ ނަބިއްޔަކީ ރަސޫލެއް ނޫނެވެ.
ނަބީބޭކަލުންގެ ޤަބުރުފުޅުވީ ތަންތަނުގެ ގޮތުގައި އެކި މީހުން އެކިތަންތަން ކިޔައި އުޅެއެވެ. އެގޮތުން އެއް ގައުމަކީ އޮމާން އެވެ. އޮމާނުގައި ނަބިއްޔުންގެ ގަބުރުފުޅުތައް ވާކަމަށް ބައެއް މީހުން ދައުވާ ކުރެއެވެ. މިއީ ފަހުގެ ތާރީހެއްގައި އިސްލާމީ އުއްމަތް ދުށް އެންމެ ވަރުގަދަ އިލްމުވެރިޔާ ސަމާޙަތުއްޝައިޚް ޢަބްދުލްޢަޒީޒު ބުން ބާޒު رحمه اللهއާ މީހަކު ކުރެއްވި ސުވާލަކާއި ޝެއިހްގެ ޖަވާބެވެ.
ބައެއް މީހުން ދަޢުވާކުރާ ގޮތުގައި، އަޅުގަނޑުމެން ޤައުމުގައި (އޮމާން ގައި) ނަބީބޭކަލުންތަކެއްގެ ޤަބުރުފުޅުތައްވެއެވެ. އަދި ވަކިން ޚާއްޞަކޮށް މިޤައުމުގެ ދެކުނުގައިވާ ޞަލާލާ ސަރަޙައްދުގައި، އެކި ނަބީބޭކަލުންގެ ނަންފުޅުން ނަންދެވިފައިވާ ޤަބުރުފުޅުތަކެއްވެއެވެ. މިއީ ތެދު ވާހަކައެއް ހެއްޔެވެ؟
ނަބީބޭކަލުންގެ ޤަބުރުފުޅުތަކެއް އޮމާންގައި ނުވަތަ އެނޫން ޤައުމެއްގައިވެސް ވާކަމުގެ ދަޢުވާ ކުރާ މީހަކު އެދައްކަނީ ތެދު ވާހަކައެއް ނޫނެވެ. އެއީ ދޮގެކެވެ. މަދީނާގައިވާ ނަބިއްޔާ ﷺ ގެ ޤަބުރުފުޅާ ފަލަސްޠީނުގެ ޚަލީލު އޭ ކިޔުނު ސަރަޙައްދުގައިވާ އިބްރާހީމުގެފާނުގެ ޤަބުރުފުޅު ފިޔަވާ އެހެން ޤަބުރުފުޅުތައް ވީތަނެއް ކަނޑައެޅިގެން ބުނާކަށް ނޭނގޭނެއެވެ. އެގޮތުން ނޫޙުގެފާނާއި ހޫދުގެފާނާއި ޞާލިޙުގެފާނު عليهم السلام އަދި އެނޫން ބޭކަލެއްގެ ޤަބުރުފުޅުވެސް ވީތަނެއް ކަނޑައެޅިގެން ނޭނގެއެވެ.
އެހެންކަމުން މުޙައްމަދުގެފާނާއި އިބްރާހީމުގެފާނު ފިޔަވާ އެހެން އެއްވެސް ނަބީބޭކަލެއްގެ ޤަބުރުފުޅުވީ ތަނެއް ނޭނގޭނެއެވެ. މުޙައްމަދު ﷺ މަދީނާގައި ފަސްދާނު ލެވިފައިވާކަމަށް މުސްލިމުން ވަނީ އިޖުމާޢުވެފައެވެ. އަދި އެއީ އެންމެން ވެސް ރަނގަޅަށް ދަންނަކަމެކެވެ. ހަމައެފަދައިން އިބްރާހީމްގެފާނުގެ ޤަބުރުފުޅު ވެސް، އަލްޚަލީލޭ ކިޔުނު ސަރަޙައްދުގައިވާ ހޮހޮޅައިގައި ވާކަމީ އެނގޭކަމެކެވެ. އެދެބޭކަލުން ފިޔަވާ އެހެން ބޭކަލުންގެ ޤަބުރުފުޅުތައް ވީތަނެއް ނޭނގޭކަމަށް ޢިލްމުވެރިން ވަނީ ކަނޑައެޅިގެން ވިދާޅުވެފައެވެ.
މަސްދަރު: ދި ސަލަފިއްޔާ
Ads by STO
