ސަފާރީ ކޭސްގައި ފުލުހުން ދައްކާ ވާހަކަ ގަބޫލުކުރަން ދަތި: އުޝާމް

ހުޅުމާލޭ ފަޅުގައި އަޅާފައި އޮތް ސަފާރީއެއްގައި ބިދޭސީ އަންހެނަކަށް ޖިންސީ އަނިޔާކުރި މައްސަލާގައި ފުލުހުން ދެމުންދާ މައުލޫމާތު ގަބޫލުކުރަން ދަތި ކަމަށް މަޖިލީހުގެ ވިލިމާލެ ދާއިރާ މެމްބަރު އަޙްމަދު އުޝާމް ވިދާޅުވެއްޖެއެވެ.

Ads by STELCO

މިދިޔަ ބުރާސްފަތި ދުވަހުގެ ރޭ ފަތިހު ސަފާރީއެއްގައި އަންހެނަކަށް ޖިންސީ ގޯނާ ކުރި މައްސަލާގައި ދެ މީހެއް ވަނީ ހައްޔަރު ކޮށްފައެވެ. ނަމަވެސް ފުލުހުން ވަނީ ފަހުން އެ ދެ މީހުން ދޫކޮށްލާފައެވެ.

މިކަމާ ގުޅިގެން އުޝާމް ކުރެއްވި ޓްވީޓެއްގައި ވިދާޅުވ ީމިފަދަ މައްސަލަތަކުގައި އެންމެ މުހިއްމި "ގޮލްޑެން އަވަރ" ނުވަތަ ރަން ގަނޑީގެ ތެރޭގައި ހެކި ހޯދުންކަން ފުލުހުންނަށް އެނގޭނެ ކަމަށެވެ.

އެފުރުސަތު ގެއްލުނީ ނުވަތަ ގެއްލުވާލީ ކޮން ސަބަބަކާ ގުޅިގެން ކަން އަދި މިހާތަނަށް ފުލުހުން ރައްޔިތުންނަށް ސާފުކޮށްދީފައެއް ނެތް." އުޝާމް ވިދާޅުވިއެވެ.

ފުލުހުން ބުނީ އެ މައްސަލަ ފުލުހުންނަށް ރިޕޯޓުކުރީ 26 ވަނަ ދުވަހުގެ ފަތިހު 5:00 ހާއިރު، ހުޅުމާލެ ލަކުޑި ޖެޓީ ސަރަހައްދުގައި އެ އަންހެން މީހާ އާއި އިތުރު ދެ ފިރިހެނަކު ތިއްބާ ފުލުހުން އެތަނަށް ގޮސް މައުލޫމާތު އޮޅުންފިލުވުމުން ކަމަށެވެ.

އެގޮތުން މި މަހުގެ 25 ވަނަ ދުވަހުގެ ރޭ ރައްޓެއްސެއްގެ ފަރާތުން ލިބުނު ދައުވަތަކަށް، މައްސަލައިގައި ތުހުމަތުކުރެވޭ ދެ މީހުންނާއެކު ސަފާރީއަކަށް ގޮސް ވަގުތު ހޭދަކުރި ކަމަށާއި އަދި އެ މީހުން، ސަފާރީ ތެރޭގައި އޭނާގެ ނުރުހުމުގައި އޭނާގެ ގައިގައި އަތްލައި ޖިންސީ ގޯނާކުރި ކަމަށާއި، އެމީހުންގެ އަމަލުތައް އެފަދަ އަމަލެއް ތަކުރާރުކޮށްފާނެތީ ސަލާމަތްވާން މޫދަށް ފުންމާލުމުން ޑިންގީއެއްގައި އެ ދެމީހުން އައިސް އޭނާ ޑިންގީއަށް ނަގައިގެން ގެންގޮސް ހުޅުމާލެ ޖެޓީއަށް ބޭލީ ކަމަށް އަންހެން މީހާ ބަޔާން ދީފައިވާ ކަމަށް ފުުލުހުން ބުންޏެވެ.

ފުލުހުން ބުނެފައި ވަނީ މައްސަލަ ހުށަހަޅާފައި ވަނީ ޖިންސީ ގޯނާގެ މައްސަލައެއްގެ ގޮތުގައި ކަމަށާއި، އަންހެން މީހާ ރޭޕް ކޮށްފައި ނުވާކަމަށް އޭނާ ތަކުރާރުކޮށް ބުނެފައިވާ ކަމަށެވެ.

އެހެން ނަމަވެސް އަންހެން މީހާ ރޭގަނޑުގެ ވަގުތެއްގައި މޫދަށް ފުންމާލައިގެން ފަތާފައި އެއްގަމަށް އަރަން މަސައްކަތް ކުރާނީ ބޮޑު ކަމެއް ވެގެން ކަމަށް ގިނަ ބަޔަކު އަންނަނީ ބުނަމުންނެވެ.

ފުލުހުން ބުނީ އަންހެން މީހާ މޫދަށް ފުންމާލަން ޖެހުނު ސަބަބަކީ ފުލުހުން ތަހުގީގު ކުރަމުން އަންނަ ކަމެއް ކަމަށެވެ. އޭނާ މޫދަށް ފުންމާލި ސަބަބާ ގުޅޭގޮތުން ސުވާލު އުފެދޭ ކަަމަށާއި އެހެން ނަަމަވެސް މިވަގުތު އެ ސުވާލަށް ޖަވާބެއް ދެވެން ނެތް ކަމަށް ވެސް ފުލުހުން ވަނީ ބުނެފައެވެ.