ކުޅުދުއްފުށި ރީޖަނަލް ހޮސްޕިޓަލުގައި ކޮވިޑަށް ޓެސްޓު ކުރަން ފަށައިފި
ކުޅުދުއްފުށި ރީޖަނަލް ހޮސްޕިޓަލުގައި ކޮވިޑް-19 އަށް ޓެސްޓު ކުރަން ފަށައިފިއެވެ.
ކޭއާރުއެޗުގެ މެނޭޖަރު އަހުމަދު ދާއޫދު "ކުޅުދުއްފުށި އޮންލައިން" އަށް މައުލޫމާތު ދެމުން ބުނީ އެ ހޮސްޕިޓަލުގައި ބެހެއްޓުނު ޕީސީއާރު މެޝިނުން ދުވާލަކު 72 ސާމްޕަލް ޓެސްޓް ކުރެވޭނެކަމަށެވެ.
"މިދިޔަ ހަފްތާއިން ފެށިގެން މެޝިން ވެލިޑޭޓް ކުރުމުގެ މަސައްކަތްކޮށް، އޮންލައިންކޮށް އިތުރު ތަމްރީނުތައް ކުރިއަށް ގެންގޮސްފައިވާނެ. މިހާރު މި ހޮސްޕިޓަލުން ވެސް ރިއަލްޓައިމް ޕީސީއާރު ޓެސްޓް ކުރެވޭނެ. މިއީ މި ސަރަހައްދުގެ ރައްޔިތުންނަށް ލިބިގެން ދާނެ ވަރަށް ބޮޑު ލުއި ފަސޭހައެއް ކަން ޔަޤީން." ދާއޫދު ވިދާޅުވި އެވެ.
އޭނާ ވިދާޅުވިގޮތުގައި ކުރިއަށް އޮތްތަނުގައި ޖީން އެކްސްޕަރޓް ކާރޓްރިޖްތައް ލިބޭނެކަމަށާ އެ ކާރޓްރިޖްތައް ލިބުމުން ޖީން އެކްސްޕަރޓް މެޝިންއިންވެސް ޓެސްޓް ކުރެވޭނެ ކަމަށެވެ. އަދި މިހާރު އެކަމަށް ވާން ޖެހޭ ހުރިހާ ތައްޔާރީތަކެއް މިހާރު ނިމިފައިވާކަމަށް އަހުމަދު ވިދާޅުވި އެވެ.
މި ވަގުތު ތަމްރީނު ފުރިހަމަ ކޮށްފައި ވަނީ ދެ ލެބް ޓެކްނޮލޮޖިސްޓުން ކަމަށް ވާތީ ފުލް ކެޕޭސިޓީގައި އަދި އޮޕަރޭޓް އަދި ނުކުރެވޭނެ ކަމަށާ ނަމަވެސް ކުރިއަށް އޮތްތަނުގައި އިތުރު މުވައްޒަފުން ތަމްރީނުކުރާނެކަމަށެވެ. ކޮވިޑް-19 ގެ ޓެސްޓް ތަމްރީނުކުރުމުގައި ކޭއާރުއެޗުގެ ދެ ލެބް ޓެކްނޮލޮޖިސްޓެއް ވަނީ އައިޖީއެމްއެޗުގައި ތިން ހަފްތާގެ ތަމްރީނު ޕްރޮގުރާމު ފުރިހަމަ ކޮށްފައި އެވެ.
ކޭއާރުއެޗްގެ އިތުރުން މިވަގުތު ކޮވިޑަށް ޓެސްޓު ކުރެވެނީ އައިޖީއެމްއެޗް، ޕޮލިސް ލެބޯޓަރީ، އޭޑީކޭ ހޮސްޕިޓަލުގެ އިތުރުން އައްޑޫ އީކުއަޓޯރިއަލް ހޮސްޕިޓަލުންނެވެ.
Ads by STO
