ގަދަ މީހާ ނިކަމެތި މީހާގެ ހައްގު މަތީ ފައި އަޅައިގެން ހުރެވޭ ނަމަ އަމާންކަމެއް ނާންނާނެ: ޒައިދު
ގަދަ މީހާ ނިކަމެތި މީހާގެ ހައްގު މަތީ ފައި އަޅައިގެން ހުރެވޭ ނަމަ އަމާންކަމެއް ނާންނާނެ ކަމަށް މަޝްހޫރު ދީނީ އިލްމުވެރިޔާ އަލީ ޒައިދު ވިދާޅުވެއްޖެއެވެ.
ޒައިދު މިހެން ވިދާޅުވީ ރައްޔިތުންގެ މަޖިލީހުގެ މިލަންދޫ ދާއިރާ މެމްބަރު އަހްމަދު ރިޒާގެ ރިޒް ކޮންސްޓްރަކްޝަންއިން ބ. ބޮޑުފިނޮޅުގައި ބިދޭސީންތަކެއް ލައްވާ މުސާރަ ނުދީ މަސައްކަތް ކުރުވި މައްސަލައެއް ފެންމަތިވެފައި ވަނިކޮށެވެ.
އެގޮތުން ޒައިދު ކުރެއްވި ޓްވީޓެއްގައި ވިދާޅުވީ ވެރިން އަދުލު އިންސާފު ހިންގުމުގެ ބާރު ރަނގަޅަށް ބޭނުން ކުރަން ޖެހޭ ކަމަށެވެ.
"ނިކަމެތި މީހާގެ ހައްގު ގަދަކަމުން ވިޔަސް އަނިޔާވެރިޔާގެ އަތުން އަތުލެވެން ޖެހޭނެ، ނޫން ނަމަ ވެރިން ފާފަވެރިވާނެ." ޒައިދު ވިދާޅުވިއެވެ.
Gadha myhaa nikamethi myhaa ge haggu mathy fai alhaigen hurevey nama amaan kameh naannaane!
Verin ebajehey Adhulu insaaf hingumuge baaru rangalhah beynun kuran! Nikamethi myhaa ge haggu gadha kamun viyas aniyaaveriyaa ge athun athuleven jeheyne! Noon nama Verin faafaveri vaane!
— Ali Zaid (@alizaid1000) July 5, 2020
މުސާރަ ނުދީގެން ބޮޑުފިނޮޅުގައި ބިދޭސީން ވަނީ، ހަމަނުޖެހުން ހިންގައި، ދިވެހިންތަކެއް ރަހީން ކޮށްފައެވެ. ފުލުހުން ވަނީ އެ ދިވެހިން ސަލާމަތްކޮށް، މިކަމާ ގުޅިގެން 19 ބިދޭސީން ހައްޔަރުކޮށްފައެވެ.
ރިޒާ މީގެ ކުރިން ވިދާޅުވެފައި ވަނީ، އެ ރަށުގައި މަސައްކަތް ކުރަމުންދާ މީހުންގެ ހަތަރު މަސް ދުވަހުގެ މުސާރަ ކޮވިޑް19 އާ ގުޅިގެން ނުދެވި ވާ ކަމަށެވެ.
މުސާރަ ނުލިބޭ އެ މަސައްކަތްތެރިންނަށް މުސާރަ ހޯދައިދިނުމަށް ގާނޫނީ އެހީތެރިކަން ދިނުމުގެ މަސައްކަތް ހިލޭ ސާބަހަށް ކޮށްދިނުމަށް ޕަބްލިކް އިންޓަރެސްޓް ލޯ ސެންޓަރު (ޕީއައިއެލްސީ) އިން ވަނީ މިހާރު ފަށާފައެވެ. އެގޮތުން މަދަނީ މައްސަލަތަކުގައި ހިލޭ ސާބަހަށް މަސައްކަތްކުރާ ޕީއައިއެލްސީގެ ވަކީލުންގެ ޓީމެއް އިއްޔެ ބޮޑުފިނޮޅަށް ގޮސް، އެތަނުގެ މުވައްޒަފުންނާ ވަނީ ބައްދަލުކޮށް ވާހަކަ ދައްކާފައެވެ.
