ރާއްޖޭގެ ބޯޑަރު ފަތުރުވެރިކަމަށް ހުޅުވާލުމުގައި އެކަށީގެންވާ މަސައްކަތެއް ކުރިވިފައެއް ނެތް: ސައީދު
ނިއު ނޯމަލްގައި ރާއްޖޭގެ ބޯޑަރު ފަތުރުވެރިކަމަށް ހުޅުވާލުމުގައި އެކަށީގެންވާ މަސައްކަތެއް ކުރިވިފައެއް ނެތް ކަމަށް މާވަށު ދާއިރާގެ މެމްބަރުު އަދި ޕީއެންސީގެ ނައިބު ރައީސް މުހައްމަދު ސައީދު ވިދާޅުވެއްޖެއެވެ.
ސަރުކާރުން ނިންމާފައި ވަނީ ކޮވިޑް-19 ފެތުރުން ކޮންޓްރޯލް ކުރުމަށް މިދިޔަ މާޗް 27 ގައި ރާއްޖޭގެ ބޯޑަރު ބަންދުކޮށްފައި އޮތް އޮތުން ނިމުމަކަށް ގެނެސް މިމަހުގެ 15 ގައި ބޯޑަރު ހުޅުވާށެވެ. އަލުން ދަތުރުތައް ފަށާއިރު، ޝެޑިއުލަށް ވުރެ ގިނައިން ރާއްޖެއަށް ކުރާނީ ޗާޓަޑް ދަތުރުތަކާއި ޕްރައިވެޓް ދަތުރުތައް ވާނެ ކަމަށް ޓްރާންސްޕޯޓް މިނިސްޓްރީން ލަފާ ކުރެ އެވެ.
މިކަމާ ގުޅިގެން ސައީދު ކުރެއްވި ޓްވީޓެއްގައި ވިދާޅުވީ ޔޫކޭ އާއި ޔޫރަޕްގެ ސޭފް ޓްރެވަލް ލިސްޓުގައި ރާއްޖެ ނުހިމެނުނީ، ޓޫރިޒަމް އާއި ފޮރިން މިނިސްޓްރީގެ ކޯޑިނޭޝަން ދަށްވުމުން ކަމަށެވެ.
Raajjey ge boader fathuruverikamah hulhuvaalumugai ekasheegen vaa masakkatheh kurevifa eh neiy. Uk aai Europe ge safe travel list gai raajje nuhimenunee, tourism aai foreign ministry ge coordination dhavvumun https://t.co/JizfCHPcmF
— Mohamed Saeed (@em_saeed) July 5, 2020
މިމަހުގެ 15 ގައި ބޯޑަރު ހުޅުވާލި ނަމަވެސް ގިނަ އެއާލައިންތަކުގެ ދަތުރުތައް ފަށަނީ އޮކްޓޫބަރުގައި ކަމަށް މޯލްޑިވްސް އެއާޕޯޓްސް ކޮމްޕެނީ ލިމިޑެޓް (އެމްއޭސީއެލް) އިން ވަނީ ބުނެފި އެވެ.
އެމްއޭސީއެލް އިން އާންމުކޮށްފައިވާ ލިސްޓުގައި ވަނީ 11 އެއާލައިނެއްގެ ދަތުރު ފަށާނެ ތާރީހުތައް އިއުލާނުކޮށްފަ އެވެ. ޖުލައި މަހު ގަތަރު އެއާވޭސް އާއި އިއްތިހާދު އެއާވޭސް އާއި އެމިރޭޓްސްގެ ދަތުރުތައް ވެލާނާ އިންޓަނޭޝަނަލް އެއާޕޯޓަށް ފަށާނެ އެވެ.
