މާލޭގައި 21000 އާއިލާއެއް ދިރިއުޅެނީ އެކަށީގެން ނުވާވަރުގެ ތަންތަނުގައި: އަސްލަމް
މާލޭގައި 21،000 އެއްހާ އާއިލާ އުޅެނީ ދިރިއުޅެން އެކަށީގެން ނުވާވަރުގެ ކުދި ތަންތަނުގައި ކަމަށް ހައުސިން މިނިސްޓަރު އަސްލަމް ވިދާޅުވެއްޖެއެވެ.
ގެދޮރުވެރިކަމުގެ މަޝްރޫއުތަކާ ގުޅޭ ގޮތުން ނޫސްވެރިންނަށް މައުލޫމާތު ދެއްވުމަށް މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު އަސްލަމް ވިދާޅުވީ، މާލޭގައި ދިރިއުޅެން ކަމުނުދާ ފަދަ ތަންތަނުގައި 21،000 މީހުން ދިރިއުޅެމުންދާ ކަމަށާއި އެމީހުންނަށް ވަގުތުން ވަގުތަށް މާލެއިން ގެދޮރު ބޭނުންވެފައިވާ ކަމަށެވެ.
އަސްލަމް ވިދާޅުވީ ހިޔާ މަޝްރޫއިން ފްލެޓް ދީފައިވާ ގޮތް ބެލުމަށް ރައީސް އެކުލަވާލައްވާފައިވާ ރިޔާސީ ކޮމިޝަނުން މިހާތަނަށް 21،000 ފޯމް މިހާތަނަށް ވެރިފައިކޮށްފައިވާ އިރު އަދި 3،340 އެޕްލިކޭޝަން ވެރިފައިނުކުރެވިވާ ކަމަށެވެ.
"އަޅުގަނޑުމެން ދިރިއުޅުމަށް ކަމުނުދާ މިންވަރެއް ކަމަށް މި ބެލެނީ 600 އަކަފޫޓަށްވުރެ ކުޑަ ތަންކޮޅެއްގަ އާއިލާއެއް ދިރިއުޅެން ޖެހިފައިވާނަމަ،" މިނިސްޓަރު އަސްލަމް ވިދާޅުވި އެވެ.
ދިރިއުޅުމުގެ ފެންވަރު ބެލުމަށް ވެސް އެ ކޮމިޓީއިން ނިންމާފައިވާ އިރު މިނިސްޓަރު ވިދާޅުވީ 60 ޕަސެންޓް ގޭގެއަށް ޒިޔާރަތްކޮށް އަދި ދިރިއުޅުމުގެ ފެންވަރު ބެލިފައި ނުވާ ކަމަށެވެ. އަދި އެކަން މަޑު ޖެހިފައި އޮތީ، ކޮވިޑް-19ގެ ސަބަބުން މާލެ ފުރަބަންދު ކުރުމާ ގުޅިގެން ކަމަށް ވެސް މިނިސްޓަރު ވިދާޅުވި އެވެ.
އަސްލަމް އިތުރަށް ވިދާޅުވީ އަތޮޅުތަކުގައި ވެސް ގެދޮރުވެރިކަމުގެ މަޝްރޫއުތައް ކުރިއަށް ދާނެ ކަމަށާއިި ގެދޮރުގެ ދަތި ކަމަށް ހައްލުތައް ހޯދައިދެއްވާނެ ކަމަށެވެ. މިނިސްޓަރު ވިދާޅުވީ 14 ރަށަކުން ގޯތި ދޫކުރުމުގެ ހުއްދައަށް އެދިފައިވާ ކަމަށާއި އެ ހުއްދަ ލޭންޑްޔޫސް ޕްލޭންއާ އެއްގޮތަށް ދިނުމަށް ނިންމަވާފައިވާ ކަމަށެވެ.
