ބޮޑުފިނޮޅު ހާދިސާއާ ގުޅިގެން 5 އިދާރާއެއް މަޖިލީހަށް ހާޒިރުކުރަނީ
ބ. ބޮޑުފިނޮޅުގައި މަސައްކަތް ކުރާ ބިދޭސީންތަކަކަށް މުސާރަ ނުދީ ރިޒް ކުންފުނިން މަސައްކަތް ކުރުވި މައްސަލާގައި ސަރުކާރުގެ ފަސް އިދާރާއެއް ރައްޔިތުންގެ މަޖިލީހަށް ހާޒިރުކޮށް ސުވާލުކުރަން މިއަދު ނިންމައިފި އެވެ.
މި މައްސަލަ ދިރާސާ ކުރަން ބޭއްވި ކޮމިޓީގެ މިއަދުގެ ބައްދަލުވުމުގައި ފާސްކޮށްފައި ވަނީ، ހޯމް މިނިސްޓްރީ އާއި، އިކޮނޮމިކް މިނިސްޓްރީ އާއި، އިމިގްރޭޝަނާއި، ފުލުހުންގެ އިތުރުން ލޭބާ ރިލޭޝަންސް އޮތޯރިޓީ ކޮމިޓީއަށް ހާޒިރުކޮށް ސުވާލު ކުރުމަށެވެ.
ކޮމިޓީން އެ ގޮތަށް ފާސްކުރުމުން އެ ކޮމިޓީގެ މުގައްރިރު، މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވީ، އެ ފަސް އިދާރާއާއި މަޝްވަރާކޮށް، މަޖިލީހުގެ ކޮމިޓީގައި އެ ބައްދަލުވުން ބޭއްވޭނެ އަވަސް ތާރީހަކަށް ތާވަލު ކުރަން މަސައްކަތް ކުރައްވާނެ ކަމަށެވެ.
ގައުމީ ސަލާމަތާއި ހާރިޖީ ގުޅުންތަކާ ބެހޭ ކޮމިޓީގައި ވާހަކަ ދައްކަވަމުން، ވިލުފުށީ ދާއިރާގެ އެމްޑީޕީގެ މެމްބަރު ހަސަން އަފީފު ވަނީ، މުސާރަ ނުލިބިގެން ވިޔަސް ބިދޭސީންތަކެއް ޝަކުވާ ކުރާއިރު އެ ހައްގު ކަށަވަރުކުރާ ފަރާތަކީ ކޮބައިތޯ ސުވާލު އުފައްދަވާފަ އެވެ.
މިލަންދޫ ދާއިރާގެ މެމްބަރު އަލީ ރިޒާގެ، ރިޒް ކުންފުނިން ބޮޑުފިނޮޅުގައި ބިދޭސީންނަށް ހަ މަހަށް ވުރެ ގިނަ ދުވަސް ވަންދެން މުސާރަ ނުދީ މަސައްކަތް ކުރުވި މައްސަލާގައި އެ މީހުން ވަނީ އެ ރަށުގައި ހަމަނުޖެހުން ހިންގައި، ދިވެހިންތަކެއް ރަހީނުކޮށްފައެވެ.
މުސާރަ ނުދެވުނީ އެ ރަށް ތަރައްގީކުރާ ސީލް މޯލްޑިވްސް އިން ފައިސާ ނުދިނުމުން ކަމަށް ރިޒް ކުންފުނިން ވަނީ ބުނެފަ އެވެ. އެކަމަކު ސީލް ވަނީ އެކަމަށް އިންކާރު ކޮށްފައެވެ.
